ادىلەت مينيسترلىگىندە سوت اكتىلەرىن ورىنداۋ كوميتەتىنىڭ ايماقتىق دەپارتامەنت باسشىلارىنىڭ قاتىسۋىمەن كەڭەيتىلگەن القا ءماجىلىسى بولىپ ءوتتى. ونى كوميتەت توراعاسى گ.كيم جۇرگىزدى. بايانداما جاساعان توراعا ورىنباسارى س.توعاەۆ رەسپۋبليكا بويىنشا سوت شەشىمدەرىنىڭ ورىندالۋ جايىنا, جەمقورلىقپەن كۇرەس بارىسىنا توقتالدى.
مۇنان كەيىن ءسوز العاندار كوميتەتتىڭ قايتا قۇرىلىمدانۋ بارىسىنىڭ تابىستى جۇرگىزىلىپ, مامان كادرلاردى جاساقتاۋ ءىسىنىڭ بۇگىنگى كۇنى تولىق اياقتالعاندىعىن, جەكە سوت ورىنداۋشىلار ينستيتۋتىن ەنگىزۋدىڭ دايارلىق جايى تۋرالى ايتتى. ايماقتاردىڭ ەكونوميكالىق قۇرىلىمدارىندا ءوزىندىك ەرەكشەلىكتەردىڭ بار ەكەنى ەسكەرىلىپ, اتقارۋشىلىق ءوندىرىستى تيىسىنشە قۇرۋ بويىنشا دەپارتامەنت باسشىلارىنا تاپسىرمالار بەرىلدى.
ءماجىلىستى قورىتىندىلاعان كوميتەت باسشىسى حالىقتان تۇسكەن ارىز-شاعىمدارمەن جۇمىس ىستەۋگە جانە اتقارۋشىلىق ءوندىرىسىنىڭ وزەگى رەتىندە سوت ورىنداۋشىلارىنا باسا نازار اۋدارۋ قاجەتتىگىن اتاپ ءوتتى.
«ەگەمەن-اقپارات».