سۇلۋلىق پەن مەيىرىمدىلىك سالتانات قۇردى
ا.بايتۇرسىنوۆ اتىنداعى مەملەكەتتىك ۋنيۆەرسيتەتتە ءداستۇرلى «قىسقى كەش» ويىن-ساۋىق جانە بي كەشى ءوتتى. بيىل ءتورتىنشى رەت ءوتىپ وتىرعان بۇل شارا ەلىمىز تاۋەلسىزدىگىنىڭ 25 جىلدىعىنا جانە قوستاناي وبلىسىنىڭ 80 جىلدىعىنا ارنالدى. وندا ستۋدەنتتەردىڭ 42 جۇبى كلاسسيكالىق, وسى زامانعى بيلەردى بيلەيدى, سونىمەن قاتار, ستۋدەنتتەر وبلىستىڭ مەرەيلى جىلى بولعاندىقتان ءۇشىنشى ءبيدى «قوستاناي ءۆالسى» اۋەنىمەن بيلەدى.
سونىمەن قاتار, «قىسقى كەش» بي كەشىندە ۋنيۆەرسيتەت ستۋدەنتتەرى ءۇلكەن قايىرىمدىلىق شاراسىن دا اتقاردى. قوستاناي قالاسىنىڭ كىشكەنتاي تۇرعىنى 4 جاسار ايشا قابىلبەكوۆا اۋىر ناۋقاسقا شالدىققانىنا 2 ايدان اسا ايداي ۋاقىت بولدى. ق ۇلىنداي قۇلدىراڭداپ ويناپ جۇرگەن ايشانىڭ جۇزىنە ارانىن اشىپ قاراپ تۇرعان اجالدى كەيىن سەرپۋگە ستۋدەنتتەر دە قولدان كەلگەن كومەگىن اياماۋعا بەكىندى. اق قان اۋرۋىنا شالدىققان ءسابيدى ەمدەتۋ ءۇشىن كوپ مولشەردە قارجى كەرەك ەكەنى بەلگىلى.
– وسى كەشتە ايشانىڭ ەرتەگىسى ۇزىلمەسىن, ءتاۋىر بولىپ كەتسىن دەگەن ءۇمىتپەن «ەرتەگىگە ساياحات» دەگەن اتاۋمەن جەتى كوماندا جەتى ءتۇرلى ەرتەگى قويدى. «قىسقى كەش» وتكەن ورىنعا, ۋنيۆەرسيتەتكە «كومەككە بار الەمدى قوس!» دەگەن ۇرانمەن باننەر قويدىق. وندا ايشا قارىنداسىمىز تۋرالى, ونىڭ شوتتارى سەكىلدى اقپارات تۇگەل بەرىلگەن. ەندى رەپوست جاساۋ ارقىلى ايشاعا كومەك اكتسياسىن بۇكىل الەمگە تاراتامىز, – دەيدى ۋنيۆەرسيتەتتەگى جاستار باستامالارىن دامىتۋ ورتالىعىنىڭ ديرەكتورى بولات قاليەۆ.
– ستۋدەنتتەردىڭ بي كەشى مىڭداعان جاستار ءبىلىم الىپ جاتقان ۋنيۆەرسيتەتتەگى تاماشا ءداستۇردىڭ ءبىرى. ءسىزدەر ەرتەڭ ەلىمىزدىڭ مامانى بولىپ شىعاسىزدار. ال تاۋەلسىز ەلدىڭ باسەكەگە قابىلەتتى جاستارى تەك بىلىكتى مامان عانا ەمەس, جان-جاقتى بولۋى ءتيىس. ادەمى سويلەۋ, ادەمى كيىنۋ, سۇلۋ بولۋ, بيلەي ءبىلۋ ارتىق ەتپەيدى, رۋحاني ازىق ماماندى وسىرە تۇسەدى, – دەدى ۋنيۆەرسيتەت رەكتورى حۇسەيىن حاسەن ۇلى.
«قىسقى كەشتە» بيلەگەن بي جۇپتارىنىڭ, ەرتەگى كوماندالارىنىڭ ونەرىن تارازىلاۋعا وبلىستاعى بەلگىلى ونەر ادامدارى دا كەلدى. بىراق ستۋدەنتتەردىڭ وسىناۋ ۇلكەن شاراسىندا تەك كوماندالار نەمەسە بي جۇپتارى عانا ەمەس, دوستىق, ونەر جانە مەيىرىم مەن قايىرىمدىلىق جەڭدى. سۇلۋلىق سالتانات قۇردى.
ءنازيرا جارىمبەتوۆا,
«ەگەمەن قازاقستان».
قوستاناي.