ەل ىشىندە ەرەكشە ادامدار كوپ قوي. ادەتتە ادامدار قارى تالعانشا, كىر تاستارىن قولدارىمەن كەزەك-كەزەك كوتەرىپ, ەلدى تاڭعالدىرىپ جاتادى ەمەس پە؟! ال جامبىل وبلىسى, قاراتاۋ قالاسىنىڭ تۇرعىنى بەرىك ءابىلحان ۇلى وسىناۋ ءزىل باتپان كىر تاستارىن قۇلاقتارىمەن كوتەرەدى. ءتىپتى 26 كيلوعا دەيىنگى كىر تاستارىن قۇلاعىمەن كوتەرىپ, قۇلاعىمەن كولىك تە سۇيرەيدى. جاستايىنان سپورتتى سەرىك ەتكەن بەرىك – بۇگىندە قاراتاۋ قالالىق سپورت مەكتەبىندە شاحمات جانە دويبى ويىندارى بويىنشا جاتتىقتىرۋشى.
– العاش رەت اكىمشىلىك عيماراتىنىڭ الدىندا جينالعان جۇرتشىلىقتىڭ كوزىنشە ءبىر كولىكتى 3 مەترگە دەيىن قۇلاعىممەن سۇيرەپ كوردىم. بۇل ونەرىمە ءوزىم دە تاڭعالدىم. قازىر جاتتىعۋلاردىڭ ارقاسىندا 3-5 مەترگە دەيىن تارتا بەرەمىن, – دەيدى بۇل جونىندە بەرىك ءابىلحان ۇلى.
اۋىلداعى اعايىن بەرىكتى «قۇرىش قۇلاقتى بەرىك» دەپ اتايدى ەكەن. «اكەم دانەكەرلەۋشى بولىپ جۇمىس ىستەيتىن. سودان, جاسىمىزعا قاراي ءتۇرلى سالماقتا كوتەرىپ شىنىعاتىن كىر تاستارىن جاساپ بەرەتىن. سونى كوتەرىپ, شىنىعىپ وستىك. مەن بۇل ونەرىم ارقىلى جاس ۇرپاققا الدىڭا ماقسات قويىپ, تالماي جاتتىقساڭ, ارمانىڭا قول جەتكىزەسىڭ دەگەندى ۇقتىرعىم كەلەدى. ءۇش قىز, ەكى ۇل تاربيەلەپ وتىرمىن. ءبىر بالام وسى ونەرىمدى جالعاستىرىپ, ول دا قۇلاعىمەن كىر تاسىن كوتەرەدى», – دەيدى قۇرىش قۇلاقتى بەرىك.
ورالحان ءداۋىت,
«ەگەمەن قازاقستان».
جامبىل وبلىسى.