«بىرلىك» ساياسي پارتياسى 20 اقپان كۇنگى ۇگىت-ناسيحات جۇمىسىن الماتىدان باستادى. پارتيا توراعاسى سەرىك سۇلتانعالي «GreenBusCompany» جانە «كازترانسگازونىمدەرى» جاۋاپكەرشىلىگى شەكتەۋلى سەرىكتەستىكتەرىنە بارىپ ۇجىم ەڭبەككەرلەرىمەن كەزدەستى.
ءوندىرىستىڭ جاعدايىمەن تانىسىپ, جۇمىسشىلاردى پارتيانىڭ سايلاۋالدى باعدارلاماسىنىڭ نەگىزگى باپتارىمەن تانىستىردى. سەرىك سۇلتانعالي ۇلىنىڭ ايتۋىنشا, پارتيا مۇشەلەرى ەكولوگيا جانە قورشاعان ورتانى قورعاۋ ماسەلەسىنە ايرىقشا ءمان بەرىپ وتىر. «ءبىز اتا-بابالارىمىز ءتارىزدى بولاشاق ۇرپاققا تابيعاتى ب ۇلىنبەگەن, تۇنىعى لايلانباعان قازاقستاندى امانات ەتۋىمىز كەرەك»,– دەدى ول بۇل رەتتە.
ءوز كەزەگىندە اتالعان مەكەمەلەردىڭ ەڭبەككەرلەرى پارتيانىڭ سايلاۋالدى باعدارلاماسى تۋرالى كەڭىرەك مالىمەت الۋعا ىنتالى ەكەندىكتەرىن بايقاتتى. ماسەلەن, ۇجىم مۇشەلەرىن قىزىقتىرعان تاقىرىپتىڭ نەگىزگى اۋانى الماتى سياقتى ءىرى مەگاپوليستىڭ بولاشاعى, سونىمەن قاتار, شاعىن جانە ورتا بيزنەستى قولداۋ ماسەلەسى توڭىرەگىندە ءوربىدى.
پارتيا باسشىلىعى وزدەرىنە قويىلعان سۇراقتارعا تۇشىمدى جاۋاپ بەرىپ, الداعى سايلاۋدا «بىرلىك» ساياسي پارتياسىنا داۋىس بەرۋگە شاقىردى. «بىرلىك» – ءوز مۇشەلەرىنەن ىزگى نيەتتى, ادال قىزمەتتى, تازا ورتانى تالاپ ەتەتىن پارتيا. سوندىقتان, ءوز بولاشاعىنا بەيجاي قارامايتىن ازاماتتاردىڭ «بىرلىككە» داۋىس بەرۋىن قالايمىز», – دەدى س.سۇلتانعالي.
كەشە «بىرلىك» ساياسي پارتياسىنىڭ توراعاسى سەرىك سۇلتانعالي ۇگىت-ناسيحات جۇمىستارىمەن اتىراۋعا باردى. مۇندا پارتيا جەتەكشىسى قاتارىنان ەكى وندىرىستىك كاسىپورىنعا باس سۇقتى. پارتيا توراعاسى «ىزگى نيەت, ادال قىزمەت, تازا ورتا» دەگەن ۇراندى تۋ ەتكەن «بىرلىك» پارتياسىنىڭ ۇستانىمى «ەكواناليتيك» عىلىمي-وندىرىستىك ورتالىعى مەن وندىرىستىك قالدىقتاردى باسقارۋ جونىندەگى «ۆەست-دالا» زاۋىتىنداعى سايلاۋشىلاردىڭ ماقسات-مۇراتىمەن ۇندەس ەكەنىن ايتىپ, بۇل كەزدەسۋدىڭ ەكى جاق ءۇشىن دە ماڭىزى ەرەكشە ەكەنىن اتاپ ءوتتى. سونىمەن قاتار, اتالعان كاسىپورىنداردىڭ دا, پارتيانىڭ دا العا قويعان ورتاق ماقساتتارىنىڭ ءبىرى – قورشاعان ورتانى قورعاۋ مەن الەۋمەتتىڭ ەكولوگيالىق مادەنيەتىن ارتتىرۋ ەكەنىن جەتكىزدى. بۇل كۇنى ۇگىت-ناسيحات جۇمىسىنا قاتىسقاندار كاسىپورىن ەڭبەككەرلەرىن پارتيانىڭ سايلاۋالدى باعدارلاماسىنداعى ەكولوگيا جانە قورشاعان ورتانى قورعاۋ جونىندەگى ۇسىنىستارىمەن تانىستىردى.
پارتيا توراعاسى س.سۇلتانعالي ءوندىرىس ۇجىمدارىنا ايماقتىڭ ەكولوگياسىن جاقسارتۋعا قوسقان ۇلەسى ءۇشىن ۇلكەن العىس ايتتى. سونداي-اق, ول وندىرىستىك كاسىپورىندار ەكولوگيانىڭ ەۋروپالىق ستاندارتقا ساي تالاپتارىن ورىنداعاندا عانا قازاقستان وندىرىلگەن يگىلىكتەردىڭ جالپى كولەمى عانا ەمەس, ءومىر ساپاسى جاعىنان دا دامىعان ەلدەردىڭ قاتارىنا كىرۋ مەرزىمىن جەدەلدەتەدى دەگەن ويىن جەتكىزدى.
جالپى, «بىرلىك» ساياسي پارتياسى ۇگىت-ناسيحات جۇمىستارىن جان-جاقتى باستاپ كەتتى. ماسەلەن, پارتيانىڭ رەسپۋبليكالىق شتابىندا «بىرلىكتىڭ» جاڭارتىلعان رەسمي سايتى تانىستىرىلدى. سايتتى دايىنداۋ جۇمىستارىنا ءبىر ايدان استام ۋاقىت كەتكەن ەكەن. پارتيا بەلسەندىلەرى ينتەراكتيۆتى تەحنولوگيالاردى پايدالانۋ ارقىلى سايلاۋشىلارمەن قارقىندى تۇردە جۇمىس جۇرگىزبەك. «www. pp-birlik.kz سايتى ينتەرنەت قولدانۋشىلارىنا ىڭعايلانىپ جاسالعان. وندا بىرنەشە جاڭا ءبولىم بار. اتاپ ايتقاندا, سايلاۋشىلارعا زاڭدىق كەڭەس بەرۋگە ارنالعان «زاڭگەر كومەگى» ءبولىمى ۇگىت-ناسيحات جۇمىستارى كەزىندە وتە پايدالى بولماق»,– دەيدى پارتيا وكىلدەرى.
سايتتا پارتيالىق ءتىزىم بويىنشا پارلامەنت ءماجىلىسى دەپۋتاتتىعىنا ۇسىنىلعان كانديداتتاردىڭ ءتىزىمى, ولاردىڭ ءومىربايانى تۋرالى تولىق ءمالىمەت جاريالانعان. سونداي-اق, سايلاۋشىلارعا, كانديداتتارعا, سونىمەن قاتار, كانديداتتاردىڭ سەنىم بىلدىرىلگەن ادامدارىنا ارنالعان ادىستەمەلىك نۇسقاۋلىقتار بار, ولارمەن كەرى بايلانىس ورناتۋ جەلىسى دە ىسكە قوسىلعان.
سونداي-اق, «بىرلىك» پارتياسىنىڭ مۇشەلەرى الەۋمەتتىك جەلىلەردە دە پارتيانىڭ جەكە پاراقشاسى جارىق كورەتىنىن, وسىلايشا ساياسي ۇيىم وكىلدەرى ۇگىت-ناسيحات شارالارىن جوعارى قارقىنمەن اتقارۋدى كوزدەپ وتىرعانىن جەتكىزدى.
ءلايلا ەدىلقىزى,
«ەگەمەن قازاقستان».