الماتى قالاسىنىڭ تىلدەردى دامىتۋ باسقارماسى قر تىلدەردى قولدانۋ مەن دامىتۋدىڭ 2001-2010 جىلدارعا ارنالعان مەملەكەتتىك باعدارلاماسى بويىنشا 2010 جىلى شىعارىلعان باسپا جانە ەلەكتروندى ونىمدەردىڭ تۇساۋكەسەرىن وتكىزدى. شارا بارىسىندا جۇرتشىلىق بيىلعى جىلى جارىق كورگەن بالالارعا ارنالعان اۋديوكىتاپتارمەن, انيماتسيالىق فيلمدەرمەن, رەسمي ءىس قاعازدارىنىڭ مەملەكەتتىك تىلدەگى ۇلگىلەرىمەن, ەلەكتروندى نۇسقالارىمەن, سالالار بويىنشا تەرميندىك سوزدىكتەرمەن, تىلدەسكىشتەرمەن تانىستى.
– بۇل اۋديوكىتاپتار مەكتەپ وقۋشىلارىنىڭ سۇرانىسىن قاناعاتتاندىرۋ ماقساتىندا جارىق كورىپ وتىر. رەسپۋبليكادا تۇڭعىش رەت 3D-فورماتىنداعى گرافيكالىق تاسىلمەن جاسالعان انيماتسيالىق ءمۋلتفيلمنىڭ باستى ەرەكشەلىگى – ونىڭ ۇلتتىق قۇندىلىقتاردى ناسيحاتتاۋىندا. سوڭعى زاماناۋي تەحنيكالىق قۇرالداردىڭ مۇمكىنشىلىگىمەن جاسالعان مۋلتفيلمنىڭ بۇلدىرشىندەرگە مەملەكەتتىك ءتىلدى ۇيرەتۋدە, ءتىل ۇستارتۋدا ىقپالى ايرىقشا بولماق», – دەپ اتاپ ءوتتى قالالىق تىلدەردى دامىتۋ باسقارماسىنىڭ باستىعى احەتوۆ ماماي. ونىڭ ايتۋىنشا, ەرتەڭنەن باستاپ اتالمىش كىتاپتار قالانىڭ بارلىق كىتاپحانالارى مەن بالاباقشالارىنا تەگىن تاراتىلاتىن بولادى.
جيىن بارىسىندا الماتى قالاسى تىلدەردى دامىتۋ باسقارماسىنىڭ تاپسىرىسىمەن جاسالعان ارقايسىسى 16 ساعاتتىق «اسىل ءسوز», «شاكىرتتەرگە شاشۋ» اتتى قازاق ادەبيەتىنىڭ ۇزدىك ۇلگىلەرىنەن قۇرالعان اۋديوكىتاپتار دا تانىستىرىلدى. تۇساۋكەسەردە سونىمەن قاتار, كاسىبي سالالار بويىنشا جارىق كورگەن تەرميندىك سوزدىكتەر مەن تىلدەسكىشتەر, ءىس قۇجاتتارىنىڭ ۇلگىلەرى ەنگىزىلگەن كىتاپتار, سونداي-اق 30 سەريادان تۇراتىن «الدار كوسەنىڭ كوڭىلدى وقيعالارى» اتتى انيماتسيالىق مۋلتفيلم دە كوپشىلىك نازارىنا ۇسىنىلدى.
«تاربيەلىك ءمانى زور بۇل تۋىندىلار جەتكىنشەكتەر زەردەسىن دامىتىپ, سويلەۋ مادەنيەتىن قالىپتاستىرۋعا ىقپال ەتەرى ءسوزسىز», – دەيدى الماتى قالاسى اكىمدىگى ىشكى ساياسات باسقارماسىنىڭ باستىعى كەنجەحان ماتىجانوۆ. ونىڭ ايتۋىنشا, كاسىبي سالالار بويىنشا جارىق كورگەن تەرميندىك سوزدىكتەر مەن تىلدەسكىشتەر, ءىس قۇجاتتارىنىڭ ۇلگىلەرى مەملەكەتتىك مەكەمەلەر مەن ۇيىمدارعا ادىستەمەلىك كومەك رەتىندە بەرىلمەك.
گۇلزەينەپ سادىرقىزى.