بۇرناعى كۇنى قۇرلىقتىق حوككەي ليگاسى شەڭبەرىندە استانانىڭ «بارىسى» چەليابىنىڭ «تراكتورىن» قابىلدادى. سايىستىڭ پلەي-وفف ساتىسىنا جولداما الۋ ءۇشىن بارىن سالعان استانالىقتار ويىن سوڭىنداعى بۋلليتتەن 5:4 ەسەبىمەن جەڭىسكە جەتتى. اتالعان ماتچ ليگانىڭ تۇراقتى چەمپيوناتى بارىسىندا «بارىستىڭ» بيىلعى ماۋسىمداعى ءوز ايدىنىندا وتكىزگەن سوڭعى كەزدەسۋى ەكەنىن اتاپ وتكەن ءجون.
ويىن ايدىن يەلەرىنىڭ شابۋىلىمەن باستالدى. ناتيجەسىندە 4-مينۋتتا ويىنشى باسىمدىعىن جۇزەگە اسىرعان استانالىقتار نايدجەل دوۋستىڭ كومەگىمەن ەسەپ اشتى. ال 13-مينۋتتا ءبىزدىڭ كوماندا ساپىنان رومان ستارچەنكو تورەشى بەلگىلەگەن ءبۋلليتتى ءساتتى ورىنداپ, ەسەپتى ەسەلەدى. ارادا ءتورت مينۋت وتكەندە, «تراكتور» ويىنشى باسىمدىعىن پايدالانىپ, ءبىر شايبانىڭ قارىمتاسىن قايتاردى. وندا اندرەي پوپوۆ مەرگەندىگىمەن كوزگە ءتۇستى. دەگەنمەن, 19-مينۋتتا رومان ساۆچەنكو تاعى دا «بارىستى» ەكى شايبا ايىرماسىمەن العا شىعاردى.
ەكىنشى كەزەڭنىڭ العاشقى ءۇش مينۋتى ەلوردالىقتار ءۇشىن ناعىز سىن ساعاتى بولدى. كەزەڭ باستالا سالىسىمەن العا ۇمتىلعان رەسەيلىكتەر اينالدىرعان 52 سەكۋندتىڭ ىشىندە ءبىزدىڭ قاقپاعا ءۇش شايبا ەنگىزىپ ۇلگەردى. الدىمەن, 23-مينۋت باستالعان تۇستا تاعى دا ءبىر ويىنشىسى ارتىق بولعان «تراكتور» حوككەيشىلەرى انتون گلينكيننىڭ ناتيجەلى سوققىسىمەن ەكىنشى شايبالارىن سوقتى. سوسىن 20 سەكۋند وتكەندە, مارتين رۋجيچكا تارازى باسىن تەڭەستىردى. وسى گولدان كەيىن «بارىستىڭ» باس جاتتىقتىرۋشىسى اندرەي نازاروۆ قاقپاشى يان لاتسونىڭ ورنىنا پاۆەل پولۋەكتوۆتى شىعاردى. ايتكەنمەن, پاشا دا ايدىنعا اياعى تيگەن بويدا قاقپادان شايبا الىپ شىعۋعا ءماجبۇر بولدى. ياعني, رۋجيچكانىڭ گولىنان كەيىن 32 سەكۋند ۋاقىت وتكەندە, ماكسيم ياكۋتسەنيا ەسەپتى «تراكتوردىڭ» پايداسىنا 4:3-كە جەتكىزىپ, كومانداسىن العا شىعاردى. ۇزىلىسكە دەيىن وسى ەسەپ ساقتالدى.
سوڭعى بولىكتە «بارىس» ويىنشىلارى ساۋاتتى قيمىلدادى. ناتيجەسىندە 51-مينۋتتا داستين بويد قارسىلاستار قاقپاسىن ءدال كوزدەپ, ەسەپتى تەڭەستىردى. كەزدەسۋدىڭ نەگىزگى ۋاقىتىندا تابلوداعى كورسەتكىش وزگەرگەن جوق. بۇل كوماندالاردى وۆەرتايمعا الىپ باردى. بۇل ۋاقىتتا دا ءبىرىن ءبىرى الا الماعان ولار ويىن سوڭىنداعى بۋلليتكە جۇگىندى. ال اتالعان سىندا استانالىقتاردىڭ جولى بولىپ, «بارىس» ماڭىزدى جەڭىسكە قول جەتكىزدى.
بۇگىندە ءبىزدىڭ كوماندا 80 ۇپايمەن شىعىس كونفەرەنتسياسىندا 7-ورىندا كەلەدى. ال 8-ورىندا تۇرعان «اۆتوموبيليستە» 79 ۇپاي بولسا, 9-ساتىداعى «نەفتەحيميكتىڭ» قورجىنىندا 78 ۇپاي بار. بۇل ەكى كوماندانىڭ بىزدەن ءبىر ويىنى كەم ەكەنىن دە ەسكەرگەنىمىز ءجون. ودان بولەك, وسى ماتچتىڭ الدىندا «بارىس» ءوز ايدىنىندا «اۆانگاردتان» – 2:7, ال پلەي-وفف جولداماسىنا تالاستا باستى باسەكەلەسى «نەفتەحيميكتەن» 1:2 ەسەبىمەن جەڭىلدى. سوندىقتان ەلوردالىقتارعا ليگانىڭ تۇراقتى چەمپيوناتى شەڭبەرىندەگى قالعان بەس كەزدەسۋدە ايتارلىقتاي تەر توگۋگە تۋرا كەلەدى. نازار اۋدارارلىعى, بۇل بەس ويىن دا سىرت الاڭداردا وينالادى.
ايتا كەتەيىك, «بارىس» كەلەسى كەزدەسۋىن 1 اقپاندا ۋفادا جەرگىلىكتى «سالاۆات يۋلاەۆپەن» وتكىزەدى.
ەلامان قوڭىر,
«ەگەمەن قازاقستان».