قازاقستان رەسپۋبليكاسى پرەزيدەنتى مۇراعاتىنىڭ جانىنان قوعامدىق كەڭەس قۇرىلىپ, ونىڭ العاشقى وتىرىسى ءوتتى. كەڭەستىڭ ماقساتى – ازاماتتىق قوعام ينستيتۋتتارىمەن ءوزارا ارەكەت ەتۋدى قامتاماسىز ەتۋ جانە ولارمەن تىعىز بايلانىس ورناتۋ, ارحيۆ قىزمەتىن ىسكە اسىرۋ بارىسىندا ارحيۆتىك اقپاراتتى قولدانۋشىلاردىڭ مۇددەسىن ەسكەرۋ بولىپ تابىلادى.
قوعامدىق كەڭەس ستراتەگيالىق جوسپارلاردى جانە دامۋ باعدارلامالارىن, بيۋدجەتتەردى, ەسەپتەردى, ماقساتتى ينديكاتورلاردىڭ جەتىستىكتەرىن, ازاماتتاردىڭ قۇقىقتارى مەن ەركىندىكتەرىنە قاتىستى ءنورماتيۆتى-قۇقىقتىق اكتىلەرىنىڭ جوبالارىن تالقىلاۋعا وكىلەتتى. جۋىردا قوعامدىق كەڭەستىڭ العاشقى وتىرىسى ءوتىپ, وندا 2016 جىلعا ارنالعان جۇمىس جوسپارىنىڭ جوباسى جانە ۇيىمداستىرۋ ماسەلەلەرى تالقىلاندى.
قوعامدىق كەڭەستىڭ توراعاسى ۆ.شەپەل اعىمداعى جىلدىڭ 1 قاڭتارىنان باستاپ قوعامدىق كەڭەستەردىڭ قۇقىقتىق مارتەبەسىن, قۇرىلۋ ءتارتىبىن جانە قىزمەتىن ۇيىمداستىرۋ قىزمەتىن انىقتايتىن 2015 جىلدىڭ 2 قاراشاسىنداعى «قوعامدىق كەڭەستەر تۋرالى» قازاقستان رەسپۋبليكاسىنىڭ زاڭى كۇشىنە ەنگەندىگى تۋرالى حابارلادى. قوعامدىق كەڭەستىڭ قىزمەتى ارحيۆ ءۇشىن قابىلداناتىن وزەكتى شەشىمدەر كەزىندە اقپاراتتىڭ جاريالىلىعىنا جانە اشىقتىعىنا سەپتەسۋگە باعىتتالادى.
قوعامدىق كەڭەس مۇشەلەرىن جۇمىستىڭ باستالۋىمەن قازاقستان رەسپۋبليكاسى پرەزيدەنتى ءارحيۆىنىڭ ديرەكتورى ب.جاپاروۆ قۇتتىقتاپ, ارحيۆ تاۋەلسىز باعالاۋعا مۇددەلى ەكەندىگى, سونداي-اق, ءارحيۆتىڭ جۇمىسىن ودان ءارى جەتىلدىرۋگە قاتىستى بارلىق ۇسىنىستار مەن ەسكەرتپەلەر نازاردان تىس قالمايتىنى جايلى مالىمدەمە جاسادى.
قوعامدىق كەڭەس مۇشەسى قاتارىندا ساياساتتانۋشى, تاريحشى دانيار اشىمباەۆ, ش.ءۋاليحانوۆ اتىنداعى تاريح جانە ەتنولوگيا ينستيتۋتىنىڭ تاريحناما, دەرەكتانۋ جانە زاماناۋي ادىستەمە ءبولىمىنىڭ مەڭگەرۋشىسى, تاريح عىلىمدارىنىڭ دوكتورى, پروفەسسور گۇلبانۋ جۇگەنباەۆا, جۋرناليست-جازۋشى ۆلاديسلاۆ ۆلاديميروۆ, ش.ءۋاليحانوۆ اتىنداعى تاريح جانە ەتنولوگيا ينستيتۋتىنىڭ كەڭەس داۋىرىندەگى قازاقستان تاريحى ءبولىمىنىڭ عىلىمي قىزمەتكەرى, PhD دوكتورانتى, جاس عالىمدار كەڭەسىنىڭ توراعاسى الماس جۇنىسباەۆ, «تۋعان ولكە» («رودنوي كراي») جۋرنالىنىڭ باس رەداكتورى ساۋلە بورانباەۆا, قازاقستان پرەزيدەنتى ءارحيۆىنىڭ ءباسپاسوز حاتشىسى (قوعامدىق كەڭەستىڭ حاتشىسى) جانار ساتاەۆا بار.
گۇلزەينەپ سادىرقىزى,
«ەگەمەن قازاقستان».