قالامى – قۋات, جۇرەگى – شۋاق
جاستىق جىگەرىن پاراساتىمەن شىڭداعان,
جۇرەكتىڭ جىرىن اقىل-ويىمەن تىڭداعان.
جاسامپاز جىلدار جانىندا ونىڭ تۋلاعان,
جالىنى لاۋلاپ, داۋىلى سامعاپ, تىنباعان,
جاقسى اعام مەنىڭ, قۋاتتى اعام, نۇرلى اعام.
قۋانىش اعام, شۋاقتى اعام, نۇرلى اعام,
قۇلاگەر-ويى قيانعا شاۋىپ تۇرماعان.
قيالى سوناۋ عارىشقا سامعاپ, زۋلاعان,
قاسىندا ىلعي جاڭا مەن وزىق دۋلاعان,
قايراتكەر اعام, جاڭاشىل اعام, نۇرلى اعام.
قۋانىش اعام, قۋانعان ەلى, نۇرلى اعام,
قوعامنىڭ ءسوزىن قۇلاققا قۇيسا, سىر باعام.
قازاقتىڭ ءسوزىن قالاۋىن تاۋىپ قىرناعان,
قاپىدا سوققان قارا داۋىلعا سىنباعان,
قاراعاي بويلى, داناداي ويلى, نۇرلى اعام.
قالامى جۇيرىك, قادامى قۇتتى نۇرلى اعام,
قاراۋلى سوزگە قاباعىن استە بۇرماعان,
قاناتتى جىلدار قادىرىن ونىڭ بۇلداعان,
قالاۋلى جەردە قازاقتىڭ ءدىلىن كورسەتكەن,
قاشاندا الدا ساپتاعى ساردار, نۇرلى اعام.
قۋانىش اعام, كوڭىلى تەڭىز, نۇرلى اعام,
قۋاتتى سوزبەن ءومىرى ەگىز, تىڭداعام.
قايىرىپ ايتىپ, قۋانىپ تالاي جىرلاعام,
قالامى – قۋات, جۇرەگى – شۋاق بىلگەنگە,
قازاققا بىتكەن وسىنداي ادام, نۇرلى اعام.
«جەتپىستە» دەيدى, جەتپىسى نەسى, ءشۇبام بار,
جەرىنە جەتپەي تومەنگە تۇسپەس قىراندار.
جۇرەگىندە ونىڭ ايتىلار ءالى مىڭ ءان بار,
جىگىتتىڭ جاسىن جۇرتىنان عانا سۇراڭدار,
جانارى اركەز جارقىلداپ, جانىپ ۇراندار.
«جەتپىستە» دەيدى, جەتپىسىڭ دەگەن وسى-اق پا,
جۇگەنىن سالار, ەرلەرىن ەرتتەپ قوس اتقا.
جۇيرىككە قۇمار جىگىتتىڭ جانىن بوساتپا,
جارقىلداپ جۇرگەن قۋانىش اعام, قاراسام,
جۇپ وتىز بەسىڭدى قۇرىقتاپ العان قوساققا.
جالاۋىن تىكسىن جارقىلداپ جەتكەن ارماندار,
جاپىراق جايسىن جاقسى ءبىر جولعا بارعاندار.
جۇگىرىپ جەتسىن ارتىنان ونىڭ قالعاندار,
جالىقپاي تۇرىپ, انىقتاي تۇرىپ سانايىق,
جۇزدەن كەيىن دە جۇرەككە جاقىن ساندار بار.
ارمانشىل ويى العا دا تارتقان ساناسىن,
ادال بوپ سۇيگەن كەڭ-بايتاق قازاق دالاسىن,
ادامي ءىستىڭ ۋاقىتقا قاققان تاعاسىن,
اللانىڭ بەرگەن جاسىنا جەتكىن, جاقسى اعا,
الاقان سوعىپ, قۋانا بەرسىن الاشىڭ.
وتەگەن ورالباي ۇلى.