ومىردە بار ەكەنىن دالەلدەي الماي ءجۇر
اقتوبەنىڭ 29 جاستاعى تۇرعىنى, ەكى بالانىڭ اناسى ايىمگۇل كوشەرباەۆا ەشبىر جەردە تىركەۋدە جوق. ءتىپتى ونىڭ قولىندا ومىرگە كەلگەنىن راستايتىن قۇجاتى دا بولماعان. سوندىقتان ول بۇگىندە ءوزىنىڭ ومىردە بار ادام ەكەنىن دالەلدەي الماي ءجۇر.
سوڭعى ءۇش جىلدا كەلىنشەكتىڭ بارماعان جەرى, باسپاعان تاۋى قالمادى. سوتقا دا شاعىمدانىپ كوردى. الايدا, ول جەردە دنك ساراپتاماسىنان ءوتۋ كەرەكتىگى ايتىلعان. ال مۇنداي ساراپتامانىڭ قۇنى 150 مىڭ تەڭگە تۇرادى. بالا كۇتىمى بويىنشا دەمالىستا وتىرعان انا ءۇشىن بۇل قوماقتى قارجى. دەگەنمەن, تەك وسى ساراپتاما قورىتىندىسىنان كەيىن عانا ول ەلىمىزدىڭ ازاماتى ەكەنىن دالەلدەي الادى.
ءوزىنىڭ ومىردە بار ادام ەكەنىنە وزگەلەردىڭ كوزىن جەتكىزۋ ءۇشىن ادىلەت باسقارماسى مەن «نۇر وتان» پارتياسىنا دا بارعان. بىراق ايىمگۇلدىڭ تۋعانى تۋرالى ەشبىر جەردە تىركەلمەگەندىكتەن, اتالعان مەكەمەلەر دە كومەك بەرە الماي وتىر.
كەزىندە قوي باققان اتا-اناسى ورتالىقتان الىس تۇرعىندىقتان, بالانىڭ قۇجاتتارىن راسىمدەمەگەن. ەندى 1986 جىلى كەتكەن سول قاتەلىكتەن قىزدارى زارداپ شەگۋدە.
قۇجاتسىز ازاماتشا ءوز تاعدىرىن بالالارى قايتالاي ما دەپ قورقادى. سەبەبى, بالالارىنىڭ تۋ تۋرالى كۋالىگىن جاساتۋ ءۇشىن دە انالارىنىڭ قۇجاتى قاجەت. ايىمگۇل, ءتىپتى, ون جىل وتاسقان جولداسىمەن دە زاڭدى نەكەگە تۇرا الماي كەلەدى.
ەلامان قوڭىر,
«ەگەمەن قازاقستان».