مۇنايلى ولكەدەگى قالامى قارىمدى قالامگەردىڭ ءبىرى – جولامان بوشالاق. وتكەن عاسىردىڭ 70-ءشى جىلدارىنان بەرى جۇرەگى قالاعان كاسىبى – جۋرناليستيكاعا ادالدىعىنان جاڭىلمادى. وسى سالادا تابان اۋدارماستان 40 جىلدان استام جەمىستى ەڭبەك ەتتى. اۋداندىق باسىلىمنان ارنا تارتقان ەڭبەك جولى تەك باسپاسوزبەن بايلانىستى ءورىلدى. قالامىنان شىققان تۋىندىلارىندا مايلى قيانعا اينالعان ماڭعىستاۋ ءوڭىرىنىڭ تۇيتكىلدى ماسەلەلەرىن كەڭىنەن تولعادى. وڭىردەگى جاقسى ىستەردى وقىرمانعا جەتكىزۋگە اسىقتى. اۋليەلەر مەكەنىندەگى جاسامپاز ىستەرمەن بىرگە, ايتۋلى ادامدارى جونىندە دە قالام تەربەدى.
جولامان اعامىز تاقىرىپ تالعاماي جازاتىن قالامگەر عانا ەمەس, ارىپتەستەرىن جاقسى ىستەرگە ۇيىستىرا بىلەتىن تاماشا باسشى بولۋىمەن دە تانىلدى. تەلەارنانى دا باسقاردى, اسىرەسە, «ماڭعىستاۋ» گازەتىنە باس رەداكتورلىق ەتكەن جىلداردا ۇيىمداستىرۋشىلىق قابىلەتى جارقىراي كورىندى. ارىپتەس اعامىزدىڭ ءوزى ەل باسىلىمى – «ەگەمەن قازاقستاننىڭ» ماڭعىستاۋداعى مەنشىكتى ءتىلشىسى قىزمەتىن اتقارعان جىلدارىن ءومىرىنىڭ ءبىر بەلەسىنە بالايدى.
جاقىندا «ەگەمەننىڭ» ارداگەرى جولامان بوشالاقتى جىلىوي اۋدانىنىڭ اكىمى ماقسىم ءىزباسوۆ ارنايى شاقىرىپ, ەرەكشە قۇرمەت كورسەتتى. ويتكەنى, جولامان اعامىز وسى اۋداندا دۇنيەگە كەلىپ, وسى اۋداننان ۇلكەن ومىرگە قانات قاققان. ونى ۇدايى ايتىپ ءجۇرەدى. باۋىرمالدىعىمەن, ادامي قاسيەتتەرىمەن بارشاعا تىلەۋلەس بولىپ جۇرەتىن جولامان بوشالاققا جىلىوي اۋدانىنىڭ قۇرمەتتى ازاماتى اتاعى بەرىلدى.
– ەلدىڭ ىقىلاسىنان ارتىق نە بار؟ اسىرەسە, تۋعان جەردەگى جاقسى ىستەرگە ءسۇيسىنىپ, جەرلەستەردىڭ ىستىق ىقىلاسىنا بولەنگەنگە, قۇرمەتىن كورگەنگە نە جەتسىن! – دەپ اعىنان جارىلدى جولامان اعا.
جولداسبەك شوپەعۇل,
«ەگەمەن قازاقستان».
اتىراۋ وبلىسى.