ناۋرىز مەيرامى قارساڭىندا بۇقار جىراۋ اتىنداعى ادەبيەت جانە ونەر مۋزەيى يگى ءىس-شارالاردىڭ لەگىن باستاپ كەتتى. سونىڭ ءبىرى – وقۋشى قىز بالالار اراسىندا وتكەن ء«داستۇر – ۇلتتىڭ تامىرى» اتتى بايقاۋ.
قىز بالالاردىڭ بويىنا ۇلتتىق قۇندىلىقتاردى ءسىڭىرۋدى كوزدەيتىن بايقاۋعا وبلىس ورتالىعىنداعى مەكتەپتەردىڭ وقۋشىلارى ەرەكشە قىزىعۋشىلىقپەن قاتىستى.
– بايقاۋدىڭ نەگىزگى ماقساتى – حالقىمىزدىڭ سان عاسىرلىق ۇلتتىق ونەرى ۇرشىق ءيىرۋدى جاڭعىرتۋ, وقۋشىلاردى ءتول مادەنيەتىمىزگە باۋلۋ ءارى قولونەر تۋىندىلارىن كۇندەلىكتى ومىردە قولدانا بىلۋگە ۇيرەتۋ. بۇل ءىس-شارا جاس بۋىننىڭ شىعارماشىلىق ىزدەنىسىن ارتتىرىپ, قازاقتىڭ سالت-داستۇرىنە دەگەن قۇرمەتىن نىعايتۋعا باعىتتالعان, دەپ اتاپ ءوتتى مۋزەي قىزمەتكەرى نازىمگۇل شاپاعات.
ۇيىمداستىرۋشىلاردىڭ سوزىنشە, بايقاۋعا 6-9 سىنىپتاردا وقيتىن قىز بالالاردىڭ شاقىرىلۋى كەزدەيسوق ەمەس. سەبەبى بۇل كەزەڭدە ولاردىڭ بو-يىندا شەبەرلىككە, ەستەتيكالىق تالعامعا, ۇلتتىق تاربيەگە دەگەن قىزىعۋشىلىق قالىپتاسادى. ال ءداستۇر – حالىقتىڭ وتكەنى مەن بولاشاعىن جالعايتىن التىن كوپىر. بايقاۋ بارىسىندا قاتىسۋشىلار تەك ءوز ونەرلەرىن كورسەتىپ قانا قويماي, ۇلتتىق قولونەردىڭ قىر-سىرىن مەڭگەرىپ, ونى زاماناۋي مانەرمەن ۇشتاستىرۋدى ۇيرەندى.
العاشقى كەزەڭدە قاتىسۋشىلار ءجۇندى قولمەن ءتۇتۋ شەبەرلىگىن كورسەتتى. ال ەكىنشى بولىمدە جىلدام ءيىرۋ قابىلەتىن, ۇرشىقپەن جۇمىس ىستەۋدەگى ەپتىلىكتەرىن بايقاتىپ, ۇرشىقتىڭ جاسالۋ جولدارى مەن ءيىرۋ ادىستەرىن, قازاق انالارىنىڭ كۇندەلىكتى تۇرمىسىندا قانداي ماڭىزعا يە بولعانىن اڭگىمەلەدى.
بايقاۋ قورىتىندىسى بويىنشا ءبىرىنشى ورىندى ى.التىنسارين اتىنداعى دارىندى بالالارعا ارنالعان وبلىستىق قازاق گيمنازيا-ينتەرناتىنىڭ وقۋشىسى ديلناز تاتەنوۆا, ەكىنشى ورىندى №48 ورتا مەكتەپتىڭ وقۋشىسى نۇرسايا سارسەنباي جەڭىپ السا, جۇلدەلى ۇشتىكتى «جاس دارىن» مامانداندىرىلعان مەكتەبىنىڭ شاكىرتى ناعيما ۋاليدەن تۇيىندەدى. ءبىرىنشى ورىن يەگەرى پلانشەتكە, جۇلدەگەرلەر ۇيالى تەلەفونعا يە بولدى. قاتىسۋشىلارعا ۇلتتىق اشەكەيلەر سىيعا تارتىلدى.
پاۆلودار وبلىسى