مەملەكەت باسشىسى ۇلتتىق قۇرىلتايدا ەل دامۋىنا قاتىستى كەلەلى ۇسىنىستارىن جاسادى. بىرىككەن پارلامەنت ەندى قۇرىلتاي دەپ اتالاتىن بولدى. بولاشاق دەپۋتاتتار سانى دا انىقتالدى.
سونداي-اق جاڭادان حالىق كەڭەسى قۇرىلاتىن بولدى. ياعني قحا مەن ۇلتتىق قۇرىلتاي بىرىگىپ, جىلىنا ءبىر مارتە باس قوساتىن ىرگەلى كەڭەسشى ورگان رەتىندە جۇمىس ىستەمەك.
پرەزيدەنت ءوز سوزىندە قىزىلوردا ءوڭىرىنىڭ قارىشتى دامۋىنا وڭ باعاسىن بەردى. ءبىزدىڭ نازارىمىزعا ونەر مەن مادەنيەت ماسەلەلەرى تۋرالى ايتقان سوزدەرى ءتۇستى.
«مەملەكەتتىك ساياساتتىڭ ستراتەگيالىق باعدارىنىڭ ءبىرى – مادەنيەت پەن ونەر. سەبەبى قوعامنىڭ ساناسى جاڭعىرماسا, رەفورمالار ويداعىداي ناتيجە بەرمەيدى. بۇل – اقيقات. سوندىقتان ءبىز رۋحانيات ماسەلەلەرىنە ايرىقشا ءمان بەرەمىز. بۇل سالادا بۇرىن-سوڭدى بولماعان اۋقىمدى شارۋالار قولعا الىنادى. اتاپ ايتقاندا, الماتى وبلىسىندا قازاق دراما تەاترى, اباي, اقتوبە وبلىستارىندا تەاترلار بوي كوتەرەدى. شىمكەنتتە دە وپەرا جانە بالەت تەاترىنىڭ قۇرىلىسى باستالماق.
بيىل مۇحتار اۋەزوۆ اتىنداعى قازاق ۇلتتىق دراما تەاترىنىڭ اشىلعانىنا 100 جىل تولدى. وسىعان وراي, تەاتر عيماراتىنا جۇرگىزىلىپ جاتقان كۇردەلى جوندەۋ جۇمىسى اياقتالماق.
ناتاليا ساتس اتىنداعى ورىس مەملەكەتتىك اكادەميالىق بالالار مەن جاسوسپىرىمدەر تەاترى دا جاڭعىرتىلادى. بۇدان بولەك, ەكى جىلدىڭ ىشىندە ەلىمىزدە 100-دەن استام مادەنيەت وشاعى جوندەلەدى».
مۋزەي ءىسىن دامىتۋ – ماڭىزدى مىندەتتىڭ ءبىرى ەكەنىن ايتقان پرەزيدەنت قىزىلوردادا اشىلعان جاڭا تاريحي-ولكەتانۋ مۋزەيىن ەرەكشە اتاپ ءوتتتى.
«مەن كۇزدە قالاعا جۇمىس ساپارىمەن كەلگەندە مۇراجايدى ارالاپ كوردىم. زامان تالابىنا ساي سالىنعان ورتالىقتا مۋزەي ءىسىن ۇيىمداستىرۋدىڭ تىڭ تاسىلدەرى قولدانىلعان. بۇل تاجىريبەنى باسقا وبلىستارعا ۇلگى ەتۋگە بولادى.
قىزىلوردادا جاڭا دراما تەاتر سالۋ جوسپارىمىزدا بار, بيىل قۇرىلىستى باستاۋىمىز كەرەك. وتكەن ساپارىمدا مەن وبلىستىڭ زيالى قاۋىم وكىلدەرىمەن كەزدەسكەن كەزدە زاماناۋي كىتاپحانا سالۋ كەرەك دەپ ايتتىم. ەندى بۇل قۇرىلىس بيىلدان باستاپ جۇرگىزىلەدى», دەدى مەملەكەت باسشىسى.
مىنە, رۋحاني سالادا وسىنداي جاڭالىقتار جۇزەگە اسادى. رۋحى مىقتى ەلگە اينالساق, باسقا ماسەلەلەردى تەز ەڭسەرۋگە بولادى.
نۇرتورە ءجۇسىپ,
سەنات دەپۋتاتى