بيىلعى قىس ەلىمىزدىڭ كوپ ايماعىندا جىلىشاراي تانىتىپ تۇر. جەلتوقسان ايى قار باسىپ قالاتىن ەلوردادا كۇن رايى ادەتتەگىدەن جىلى. وسىعان قاراماستان, قالا تازالىعىنا جاۋاپتى «استانا تازالىق» مەكەمەسى كۇشەيتىلگەن رەجىمدە جۇمىس ىستەپ جاتىر.
جاقىندا ءبىر توپ باق وكىلدەرى «استانا تازالىق» كاسىپورنى ۇيىمداستىرعان ءباسپاسوز تۋرىنا بارىپ, مەكەمەنىڭ قىسقا قامدانىسى بارىسىن باقىلاپ قايتتى. سەرىكتەستىكتىڭ باس ديرەكتورى زامير ساعىنوۆ كۇن سايىن جەلىگە 700 جول جۇمىسشىسى شىعاتىنىن, ورتا ەسەپپەن 408 ارنايى تەحنيكا قار تازالاۋعا, قولايسىز اۋا رايىندا جەدەل ارەكەت ەتۋگە دايىن تۇراتىنىن ءمالىم ەتتى. قار قاتتى تۇسپەسە دە, جاياۋ جۇمىسشىلار مەن كولىك جۇرگىزۋشىلەرى ادەتتەگىدەي جۇمىسقا جۇمىلعان. مەكەمە كولىكتەرى قار تازالاپ, كوك مۇزعا تۇز سەبۋگە عانا شىقپايدى. قالادا اسفالت توسەلمەگەن كوشەلەر بار, كەڭ جولداردىڭ ءوزى ىزعارلى اۋا رايىندا لايلانادى. ونى تازالاۋعا ارنايى تەحنيكا قاجەت. جاياۋ جۇمىسشىلار قارمەن قوسا كۇل-قوقىستاردى, تۇرمىستىق قاتتى قالدىقتاردى, لايدى تازالايدى.
«قالا جىلدان-جىلعا كەڭەيىپ, تۇرعىن ۇيلەر كوبەيىپ بارادى. جول ءۇستى, جيەگى ب ۇلىنبەي تۇرمايدى. قالا ماڭىندا اسفالت توسەلمەگەن كوشەلەر كوپ. سول ايماقتان شىققان اۋىر, جەڭىل كولىكتەر قالاعا كىرەدى. ولاردىڭ الىپ كەلگەن باتپاق, باسقاسىن تازالاۋعا ءبىزدىڭ مەكەمە جۇمىلادى. بۇگىندە قىسقا قاجەتتى ماتەريالدار قورىن تولىق كولەمدە جيناقتادىق. قويمالاردا 1 200 تەكشە مەتردەن استام قۇم, 4 400 توننا كوكتايعاققا قارسى قوسپالار, 1 000 توننا رەاگەنت ساقتاۋلى. ارنايى تەحنيكانىڭ ۇزدىكسىز جۇمىسىن قالادا ورنالاسقان ءۇش سۇيىق رەاگەنت قۇيۋ پۋنكتى قامتاماسىز ەتەدى. ولار «ەسىل», «نۇرا», «سارايشىق», «الماتى», «سارىارقا», «بايقوڭىر» اۋداندارىنا قىزمەت كورسەتىپ, ەلوردا حالقىنىڭ جولدا الاڭسىز قوزعالۋىنا مۇمكىندىك بەرەدى», دەيدى ز.ساعىنوۆ.
قىسى قاتال, ايازدى بولاتىن استانانىڭ اۋا رايى – كوممۋنالدىق قىزمەتكە جاۋاپتى مەكەمەلەرگە ناعىز سىناق. ىزعارلى جەلدىڭ ەكپىنى كۇشەيگەندە كوشە جيەگىندەگى قاردى كۇرەۋ – ءتىپتى بەينەتتى ەڭبەك. سول سەبەپتى قالا تازالىعىنا جاۋاپتى مەكەمەنىڭ باسشىلىعى جۇمىسشىلارعا جايلى جاعداي جاساۋعا تىرىسادى. قىزمەتكەرلەردىڭ بارلىعى دەرلىك جۇمىسقا مەكەمەنىڭ كولىگىمەن قاتىنايدى. سۋىق كۇندەرى از-كەم تىنىعىپ, جىلىنىپ الۋعا قولايلى ورىندار سايلانعان. بەت قاراتپايتىن بوراندا جۇمىسشىلار سوندا تىنىعادى. بارلىق جۇمىسشىعا تۇسكى اس بەرىلەدى. وسىعان قوسا, مەكەمە باسشىلىعى جۇمىستى جەدەلدەتەتىن, قاۋىپسىزدىكتى قامتاماسىز ەتەتىن تىڭ شەشىمدەر قابىلداپ جاتىر. سونىڭ كوبى تسيفرلاندىرۋمەن بايلانىستى. مىسالى, بۇدان بىلاي باسشىلىق استانا كوشەلەرىنە شىققان ءار تەحنيكانىڭ قاي باعىتتا جۇرگەنىن, قانداي كولەمدە رەاگەنت شاشقانىن, قاشان جۇمىس باستاعانىن – ءبارى-ءبارىن ناقتى ۋاقىت رەجىمىندە ءبىلىپ وتىرادى. بۇل ەڭبەك ونىمدىلىگىن ارتتىرىپ, قالا تازالىعىنداعى جۇمىستى شيراتۋعا كومەكتەسەدى.
«ەلەكتروندى جول پاراعى» دەپ اتالاتىن جۇيەنى تەك باقىلاۋ قۇرالى دەپ تانىعانىمىز دۇرىس ەمەس. بۇل – كوممۋنالدىق قىزمەتتىڭ اشىقتىعىن ارتتىراتىن, جۇمىستىڭ تيىمدىلىگىن بىرنەشە ەسە كۇشەيتەتىن جاڭاشىلدىق. جۇيەگە قازىر قالانىڭ 393 ارنايى تەحنيكاسى قوسىلدى. جوباعا الماتى قالاسىنىڭ اكىمدىگى دە نازار اۋدارىپ, جۇيەنى ەنگىزۋ جونىندەگى ساتىپ الۋ راسىمدەرىن باستاپ كەتكەن. بۇدان وزگە, ءبىزدىڭ مەكەمە شىمكەنت قالاسىنىڭ, پاۆلودار, قىزىلوردا وبلىستارىنىڭ اكىمدىكتەرىمەن كەلىسسوز جۇرگىزىپ جاتىر. استانادا بۇل تەحنولوگيا «استانا-تەپلوترانزيت» اق كولىك قۇرالدارىنا ەنگىزىلىپ جاتىر. جۇيە جەكە كومپانيالاردىڭ دا ايتارلىقتاي قىزىعۋشىلىعىن تۋدىرىپ, كوممۋنالدىق سالاداعى تسيفرلىق شەشىمدەرگە دەگەن سۇرانىستىڭ ارتقانىن كورسەتىپ وتىر», دەدى ز.ساعىنوۆ.
جۇمىس بارىسىنداعى تاۋەكەلدەردى ازايتۋ ماقساتىندا سەرىكتەستىك «Med365», «Adal Check» جۇيەلەرىن ەنگىزگەن. بۇل پلاتفورمالار قىزمەتكەرلەردىڭ كۇندەلىكتى مەديتسينالىق تەكسەرۋدەن ءوتۋىن ونلاين فورماتتا تىركەپ, جۇرگىزۋشىلەردىڭ جۇمىسقا رۇقسات الۋ ءتارتىبىن باقىلايدى. ناتيجەسىندە, توتەنشە جاعدايلاردىڭ الدىن الۋ مۇمكىندىگى ارتادى. سونىمەن قاتار جۇرگىزۋشى قاۋىپسىزدىك بەلدىگىن تاقپاسا, مارشرۋت اۋىستىرسا نەمەسە ۇيىقتاپ كەتسە باقىلايتىن, ەسكەرتىپ, كومەكتەسەتىن تاعى ءبىر جۇيە ىسكە قوسىلعان. وسىنداي تسيفرلىق شەشىمدەر قازىردىڭ وزىندە تيىمدىلىگىن كورسەتىپ, جۇمىس ونىمدىلىگىنە, جۇمىسشىلاردىڭ قاۋىپسىزدىگىنە وڭ ىقپال ەتەتىنىن كورسەتكەن.
ءباسپاسوز تۋرى بارىسىندا جۋرناليستەر كاسىپورىننىڭ تەحنيكالارى الاڭىن, رەاگەنتتەر جينالعان قويمالارىن ارالاپ كورىپ, قىسقا دايىندىعىنا قانىقتى. سونداي-اق «استانا تازالىق» سەرىكتەستىگىنىڭ جۇمىسشىلارعا كورسەتىپ وتىرعان الەۋمەتتىك قولداۋ شارالارىمەن تانىستى.