ونەردە جوق شەكارا

جاھاندىق تۋرنە

تۋرنە فرانتسيا, يسپا­نيا, سونداي-اق اقش ەل­دەرىن قامتىدى. ءار قا­لا­داعى كونتسەرت باعدارلاماسى وتاندىق كومپوزيتورلىق مەكتەپ پەن ورىنداۋشىلىق ءداستۇردى كلاس­سيكالىق ەۋروپالىق جانە امەريكالىق كامەرالىق مۋزىكا مۇراسىمەن ۇيلەستىردى. پاريجدەن بوستونعا دەيىنگى سەريا قازاقستان مۋزىكاسىن الەمدىك دەڭگەيدە كور­سەتۋگە, تىڭدارماندارعا ۇلت­تىق مادەنيەتتىڭ جاڭا قىرىن تانىس­­تى­­رۋ­عا مۇمكىندىك بەردى.

«مۋزىكادا شەكارا جوق. ءبىز قازاقستاننىڭ داۋسىن بۇكىل الەم­گە ەستىرتكىمىز كەلەدى. ۇلتتىق مۋزى­كا­مىزدىڭ جاڭا كلاسسيكالىق كە­ڭىستىكتىڭ اجىراماس بولىگى رە­تىندە قابىلدانۋىن قالايمىز», – دەدى كۆار­تەتتىڭ كوركەمدىك جەتە­شىسى, قازاق­ستاننىڭ ەڭبەك سىڭىرگەن قاي­راتكەرى ەرنار مىڭتاەۆ تۋرنە ماق­ساتىنىڭ قىر-سىرىنا توق­تا­لىپ.

1988 جىلى ستۋدەنتتىك ۇجىم رەتىندە قۇرىلعان كۆارتەت ءتورت ونجىلدىق ىشىندە ەۋرازياداعى ەڭ بەدەلدى كامەرالىق توپتاردىڭ بىرىنە اينالدى. يتالياداعى (Rovere d’Oro, Bellini Competition), جاپونياداعى (Osaka International Competition), يسپانياداعى حالىق­ارالىق كونكۋرستاردىڭ لاۋرەاتى اتانىپ, ەۋروپا, ازيا, سونىمەن قاتار امەريكاداعى ەڭ ءىرى ساح­­نا­لاردىڭ تورىنە كوتەرىلدى. قا­­زىر­گى قۇرامدا ونەر كورسەتىپ جۇر­­گەن ايدار توقتاليەۆ ء(بىرىنشى سكريپكا), الەكسەي لەبەدەۆ (ەكىنشى سكريپ­كا), بەكزات سايلاۋباي ۇلى (الت), ەرنار مىڭتاەۆ (ۆيولونچەل) باستاعان مۋزىكانتاردىڭ قاي-قايسىسى دا شەبەرلىگىمەن كوپ­­­تى ءتانتى ەتكەن كانىگى ماماندار. بۇگىن­دە عازيزا جۇبانوۆا اتىنداعى مەم­لە­كەتتىك ىشەكتى اسپاپتار كۆار­تەتى تەك ەلىمىزدىڭ باي مادەني ءداستۇرىن عانا ەمەس, سونىمەن بىرگە زاماناۋي مۋزىكالىق كەڭىستىككە اشىق, الەم­دىك دەڭگەيدەگى ورىن­داۋشىلىق مەك­تەپ­تىڭ ايناسى رەتىن­دە تانىلىپ وتىر.

پاريج: ۇستازعا تاعزىم

تۋرنەڭىڭ العاشقى ايالداماسى – پاريج. الەمگە ايگىلى «Salle Cortot» زالىندا كۆارتەت ونەر ۇجىمىنىڭ رۋحاني ۇستازى, اتاقتى ۆيولونچەليست ۆالەنتين بەرلينسكيدىڭ 100 جىلدىعىنا ارنالعان فەستيۆال باعدارلاماسىندا ونەر كورسەتتى.

«بۇل ساحنادا ونەر كورسەتۋ – ەل مادەنيەتىنىڭ الەمدىك ارەناداعى مارتەبەسىن پاش ەتۋدىڭ سيمۆولى», – دەيدى كۆارتەت مۇشەلەرى.

ساحنادا Danel Quartet, ميحايل كوپەلمان, بوريس اندريانوۆ, نيكوليا بالدەرۋ جانە ليۋدميلا بەرلينسكايا سياق­تى ايگىلى مۋزىكانتتارمەن بىرگە ونەر كورسەتكەن كۆارتەتتىڭ شى­عارماشىلىق الەۋەتىنە كارى قۇر­لىق كورەرمەندەرى ءتانتى بولدى. باعدارلامادا يوزەف گايدن, دميتري شوستاكوۆيچ, سەرگەي پروكوفەۆ, عازيزا جۇبانوۆا شىعارمالارى ورىندالدى.

مادريد: ءۇش الەم ءھام ءبىر ءتۇن

كەلەسى ايالداما – مادريد. «Auditorio Nacional de Música» ساحناسىندا رەسپۋبليكا كۇنىنە وراي يسپانياداعى قازاقستان ەلشىلىگىنىڭ قولداۋىمەن «Tres Mundos y una Noche» – ء«ۇش الەم جانە ءبىر ءتۇن» اتتى كونتسەرت ءوتتى.

كۆارتەت باعدارلامادا ماەسترو البەرت سكۋراتوۆ جەتەكشىلىك ەتەتىن «Madrid Festival Orchestra», سونداي-اق «Bauhas Quartet» پەن «Parallel Quartet» انسامبلدەرىمەن بىرگە ونەر كورسەتتى. مادريد كەشىنىڭ تاعى ءبىر ەرەكشەلىگى – قازىرگى وتاندىق مۋزىكا كوشباسشىلارىنىڭ ءبىرى قۋات شىلدەباەۆتىڭ شىعارما­لارى ەۋروپالىق جانە يسپان كوم­پوزيتورلارىنىڭ تۋىندىلارىمەن قاتار شىرقالىپ, قازاق مۋزىكاسىنىڭ الەمدىك مادەني كەڭىستىكتەگى ورنىن ايقىندادى. سونداي-اق كۆارتەتپەن بىرگە ر.وماروۆ اتىنداعى قازاق حالىق اس­پاپ­تارى وركەسترىنىڭ كوركەمدىك جە­تەك­شىسى, قازاقستاننىڭ ەڭبەك سىڭىر­گەن قايراتكەرى, دومبىرا­شى تالعات كارىموۆ ونەر كورسەتىپ, ءابدىمومىن جەلدىباەۆتىڭ «ەركە سىلقىم» كۇيىن ورىندادى. وسىلايشا, ءمادريدتىڭ تىڭ­دارماندارىنا ءۇش الەمنىڭ مۋزى­كالىق ءۇنى – قازاق, ەۋروپا جانە يسپان ءداستۇرى ءبىر كونتسەرتتە ۇيلەسىپ جەتتى.

اقش: مۋزىكالىق وليمپ

الەمدىك تۋرنەنىڭ اسا ماڭىز­دى نۇكتەسى— «Carnegie Hall» (Weill Recital Hall) ساحناسىنداعى كونتسەرت. نيۋ-يوركتەگى كونتسەرتتىڭ ۇيىمداستىرىلۋىنا الەمدىك ارەنادا قازاقستاندىق ونەردى ىلگەرى­لەتۋ باستاماسىن قولداعان «اتا­مە­كەن-اگرو» اۋىل شارۋاشىلىعى حولدينگى مۇرىندىق بولدى.

نيۋ-يوركتەگى ساحنا – الەمدىك كلاسسيكالىق مۋزىكاداعى مار­تەبەلى ورىنداردىڭ ءبىرى. بۇل جەر­دە ونەر كورسەتۋ از عانا وتان­دىق مۋزىكانتقا بۇيىرعان. ال كۆارتەت ءۇشىن بۇل – كاسىبي دەڭ­گەيىنىڭ الەمدىك قاۋىمداستىقتا مويىن­دالۋىنىڭ بەلگىسى, سونىمەن قاتار قازاقستاننىڭ اكادەميالىق مەكتەپ ءداستۇرىنىڭ ابىرويىن پاش ەتەتىن سيمۆولدىق ءسات.

كەش باعدارلاماسىنا يوگاننەس برامستىڭ فا مينور, Op.34 فورتەپيانولىق كۆينتەتى كىردى. ونى حالىقارالىق كونكۋرستاردىڭ لاۋرەاتى, نيۋ-يوركتەگى «Mannes College of Music» تۇلەگى, ەرەكشە تەحنيكاسى مەن تەرەڭ ەموتسيالىق ين­تەرپرەتاتسياسىمەن تانىمال پيا­نيست تيمۋر مۋستاكيموۆ ورىندادى. تالانتتى ونەرپازدىڭ قاتىسۋى كونتسەرتكە ەرەكشە قۋات بەرىپ, قازاقستان مەن الەم اراسىنداعى شىنايى مۋزىكالىق ديالوگ جاسادى. كۆارتەتتىڭ كونتسەرتى سونىمەن قاتار چارلز-تاۋن, حات­بورو, فيلادەلفيا, مەيپل-گلەن قالالارىندا دا جالعاستى. ءار قالاداعى كورەرمەن وتاندىق ورىن­داۋشىلارعا شەكسىز ىقىلاسىن ءبىلدىردى. بوستوندا انسامبل موتسارت, شۋبەرت, باربەر, قۋات شىلدەباەۆ شىعارمالارىنان تۇراتىن وزگە كامەرالىق باعدار­لامامەن شىقتى. كۆارتەت ۇسىنعان كونتسەرتتىك باعدارلامانىڭ قاي-قايسىسى دا كورەرمەن كوڭىلىنە جول تاپقان ايرىقشا تولقۋلى ءسات بولعانى انىق. ال ايتۋلى تۋرنە – قا­زاق مۋزىكاسىنىڭ الەمدىك ارەنادا ءوز بيىگىن باعىندىرعاندىعىنىڭ ايقىن ايعاعى.