«استانا وپەرا» تەاترىنىڭ ك.بايسەيىتوۆا اتىنداعى كامەرالىق زالى ساحناسىندا جاس دارىنداردى الەمدىك ساحنادا ىلگەرىلەتۋگە باعىتتالعان «Dala Voices» جارقىن كونتسەرتى كورەرمەننىڭ ىستىق ىقىلاسىنا بولەندى. كەشتە «قۇرمەت» وردەنىنىڭ يەگەرى رۋسلان ءبايمۋرزيننىڭ باسقارۋىنداعى كامەرالىق وركەستردىڭ سۇيەمەلدەۋىمەن الەمدىك ءھام وتاندىق كلاسسيكا جاۋھارلارى شىرقالدى.
ايتۋلى جوباعا جەتەكشىلىك ەتەتىن اگەنتتىكتىڭ اتقارۋشى ديرەكتورى ايسۇلۋ ءتاني اتاپ وتكەندەي, «Dala Voices» جاس ارتىستەردىڭ داۋىسى ارقىلى ەلىمىزدىڭ مادەنيەتىن جان-جاقتى قىرىنان ايگىلەيدى. «بۇل اتاۋدىڭ سيمۆولدىق ءمانى بار: «دالا داۋىستارى» – ەركىندىك, قۋات جانە وتاندىق ۆوكال مەكتەبىنە ءتان تابيعي دىبىس شىعارۋ كۇشى», – دەپ مالىمدەدى ول.
ارتىستەردى ىرىكتەۋ ونلاين-تىڭدالىم ارقىلى ءوتتى. وتىنىمدەر ەلىمىزدەن بولەك, قىرعىزستان, وزبەكستان, ۋكراينا, بەلارۋس, باسقا دا شەت مەملەكەتتەردەن كەلىپ تۇسكەن. ىرىكتەۋگە سونىمەن قاتار شەتەلدىك اگەنتتىكتەردەگى انشىلەر دە قاتىسقان.
ال جوبانىڭ كوركەمدىك جەتەكشىسى, قازاقستاننىڭ ەڭبەك سىڭىرگەن قايراتكەرى جۇپار عابدۋللينانىڭ ايتۋىنشا, «Dala Voices» اگەنتتىگىن قۇرۋ ونىڭ ءورشىل ويى بولعان ءارى بۇعان ول ۇزاق جىل دايىندالعان.
– انشىلەردى كاسىبي تۇرعىدا كوتەرمەلەپ وتىراتىن اگەنتتىك قۇرۋ – مەنىڭ بۇرىننان بەرگى ارمانىم ەدى. باتىستا بۇل جۇيە باياعىدان جۇمىس ىستەيدى. اگەنتتىك بولماسا, ءارتىس ۇلكەن ساحناعا شىعا المايدى دەۋگە بولادى. ءبىزدىڭ جاس ورىنداۋشىلارىمىزدىڭ دا الەمدىك ساحنالاردا جۇمىس ىستەۋ مۇمكىندىگى بولعانىن قالادىم, – دەدى ءانشى.
سونداي-اق جۇپار عابدۋللينا ءوزى ءۇشىن ءارتىستىڭ داۋسىنان بولەك, جەكە تۇلعاسى ماڭىزدى ەكەنىن دە اتاپ كورسەتتى.
– ءبىز ادامعا جان-جاقتى قارايمىز: تەمبر مەن تەحنيكا ماڭىزدى, الايدا ونىڭ ىشكى الەمى دە, جۇمىس ىستەۋگە جانە دامۋعا دايىندىعى دا زور مانگە يە, – دەپ اتاپ ءوتتى ول.
كوركەمدىك جەتەكشى باسا توقتالعانداي, جاس انشىلەر مەنەدجمەنتتىڭ ازدىعى, الاڭداردىڭ جەتىسپەۋشىلىگى, حالىقارالىق بايلانىستاردىڭ بولماۋى سىندى ايتارلىقتاي قيىندىقتارعا تاپ بولادى. سوندىقتان ەلىمىزدەگى العاشقى وپەرا اگەنتتىگىنىڭ اشىلۋى ولارعا ۇلكەن سەرپىن بەرەرى ءسوزسىز.
– ءبىزدىڭ ورىنداۋشىلارىمىزدىڭ داۋىستارى جاس, ولارعا ۇيرەنۋ, ءوسۋ جەڭىلىرەك. الايدا بۇل كەزەڭدە ولارعا كاسىبي قولداۋ دا كەرەك. جاس انشىلەردى قولتىعىنان دەمەپ, بايقاۋلار مەن حالىقارالىق فەستيۆالدارعا قاتىستىرۋ, سونداي-اق الەمدىك تەاترلارداعى وپەرالىق سپەكتاكلدەردە باستى پارتيالاردى ورىنداۋدى ۇيىمداستىرۋ ماڭىزدى, – دەگەن جۇپار عابدۋللينا العاشقى تانىستىرىلىم الاڭىنا اينالعان «استانا وپەراعا» ءوز ريزاشىلىعىن ءبىلدىردى:
– بۇل – بىزگە كورسەتىلگەن زور سەنىم. باستامامىزعا قولداۋ ءبىلدىرىپ, ەلىمىزدىڭ باس تەاترىنىڭ قابىرعاسىندا كونتسەرت ۇيىمداستىرۋعا جاعداي جاساعانى ءۇشىن ديرەكتور الەكساندر سوۆوستيانوۆكە العىسىمدى ايتامىن. اگەنتتىكتە الىس-جاقىن شەتەلدەن قۇرالعان كوپتەگەن حالىقارالىق بايقاۋلاردىڭ لاۋرەاتتارى, دارىندى جاس سوليستەردىڭ بار ەكەنىنە قاراماستان بۇگىنگى ءبىرىنشى كونتسەرتتىك باعدارلامامىز ازىرگە تەك وتاندىق ورىنداۋشىلاردىڭ قاتىسۋىمەن عانا ءوتىپ وتىر, – دەدى ءانشى.
«Dala Voices»-ءتىڭ جوسپارلارى اۋقىم-دى. الداعى ۋاقىتتا ۇجىم قۇرامى كەڭەيەدى, كەلەشەكتە حالىقارالىق مەنتورلاردىڭ قاتىسۋىمەن رەزيدەنت-باعدارلاما قۇرۋ, سونىمەن قاتار تمد مەن ەۋروپاعا گاسترولمەن بارۋ ماقساتى تۇر. نەگىزگى باسىمدىق – وتاندىق انشىلەردى الەمدىك دەڭگەيگە شىعارۋ. جۇپار عابدۋللينانىڭ ايتۋىنشا, كوپتەگەن ءىرى شەتەلدىك اگەنتتەر قازاقستاندىق ۆوكاليستەردىڭ ايرىقشا تەمبرلىك بوياۋىن اتاپ وتەدى, بۇل دارا قاسيەت ولاردى ەۋروپالىق ورىنداۋشىلاردىڭ اراسىندا ەرەكشەلەپ تۇرادى.
ايتۋلى كونتسەرت جوبانىڭ العاشقى قادامى ءارى ونىڭ رەسمي تۇردە دۇنيەگە كەلۋىنىڭ باستاۋى عانا ەمەس, سونىمەن قاتار كوركەمدىك جەتەكشى ايتقان ماقساتتارعا ءبىر تابان جاقىنداتقان جارقىن كەزدەسۋ بولعانى دا انىق. مازمۇندى ءارى سان الۋان باعدارلاما اياسىندا باتىس ەۋروپالىق ءھام وتاندىق كومپوزيتورلاردىڭ تۋىندىلارىنان تانىمال اريالار شىرقالدى. دالا داۋىسى اۋەلەگەن كەرەمەت كەشتە سوپرانولار – ۇلپان اۋباكىروۆا, ءلايلا الامانوۆا, فيرۋزا راحمەتوۆا مەن ءدىلناز ومارحانوۆا, تەنورلار – بالۋان بەركەنوۆ (الماتى), تالعات ءاللابىرىنوۆ, سونداي-اق باريتوندار دىنمۇحامەد كوشكىنباەۆ, راسۋل جارماعامبەتوۆ, ازات مالىك پەن سۇلتان باقىتجان ونەر كورسەتتى. مەتستسو-سوپرانو ەلميرا شپەكپاەۆانىڭ تاماشا داۋىسى دا تالعامپاز كورەرمەن كوڭىلىنەن ورىن الدى. الداعى ۋاقىتتا اگەنتتىك اتالعان كونتسەرتتىك باعدارلامانى الماتىدا تانىستىرۋدى جوسپارلاپ وتىر.