كىشكەنتاي كورەرمەن ءۇشىن تاماشا جاڭالىق! مەملەكەتتىك قۋىرشاق تەاترى 13 قاراشا كۇنى بەردىبەك سوقپاقباەۆتىڭ ايگىلى «مەنىڭ اتىم – قوجا» شىعارماسىن العاش رەت قۋىرشاق بەينەسىندە ساحنالاپ, كوپشىلىك نازارىنا ۇسىنادى. قويىلىم رەجيسسەرى – ەركەبۇلان قابدىل.
قازاق بالالار ادەبيەتىنىڭ التىن قورىنان ويىپ ورىن العان كلاسسيكالىق تۋىندى – ۇلت رۋحانياتىنىڭ ماڭگىلىك قۇندىلىقتارىن دارىپتەيتىن شىعارمالاردىڭ ءبىرى. ال قوجا بەينەسىنىڭ ساحنا تورىنەن قۋىرشاق تىلىندە جاڭاشا سيپاتتا ءۇن قاتۋى – كىشكەنتاي كورەرمەن ءۇشىن ۇلكەن ونەر وقيعاسى بولارى انىق.
قويىلىمنىڭ رەجيسسەرى ەركەبۇلان قابدىل قولتاڭباسىنان شىعارمانىڭ باستى يدەياسى بالالىقتىڭ شىنايى الەمىن, وجەتتىگى مەن اڭعال تازالىعىن ساقتاي وتىرىپ, قازىرگى زامان بالاسىنا تۇسىنىكتى ءارى تارتىمدى تۇردە جەتكىزۋدى ماقسات ەتكەن شىعارماشىلىق ەركىندىكتى اڭعاردىق. ال ينستسەنيروۆكا اۆتورى دامير امانتاي كورەرمەنگە ادەبيەت پەن تەاتردىڭ تۇيىسكەن تۇسىندا جاڭا كوركەمدىك شەشىم ۇسىنىپتى. ونىڭ دراماتۋرگيالىق نۇسقاسى قوجانىڭ ىشكى جان دۇنيەسىن, ارمان-قيالىن ءھام ومىرگە دەگەن كوزقاراسىن قۋىرشاق تەاترىنىڭ پوەتيكاسىنا ساي شەبەر ۇيلەستىرىپ, شىعارمانىڭ رۋحىن تەرەڭ اشادى.
قويىلىمنىڭ بەينەلىك الەمىن قالىپتاستىرعان سۋرەتشى يۋليا چەرنوۆا بالالارعا تانىس اۋىل تىرشىلىگى مەن مەكتەپ ءومىرىن, قوجانىڭ ەركىن مىنەزىن بەينەلەيتىن ساحنالىق كەڭىستىك پەن قۋىرشاق كەيىپكەرلەردى كوركەم شەشىممەن شىنايى ۇسىنا ءبىلىپتى. قويىلىم كومپوزيتورى نۇرسۇلتان تورەاليدىڭ اسەرلى اۋەندەرى وقيعا جەلىسىن سەزىممەن ءورىپ, قوجانىڭ كوڭىل كۇيىن اۋەز ارقىلى ۇتىمدى جەتكىزەدى. ال قويىلىمنىڭ بي قيمىلدارىن تارتىمدى ۇيلەستىرە بىلگەن بالەتمەيستەر رينات بيليباەۆ ساحنا ىرعاعىنا جۇمىرلىق ۇستەپ, كورىنىستەرگە سەرپىن مەن ويىندىق سيپات سىيلاي العان.
ء«بىز ءۇشىن بەردىبەك سوقپاقباەۆتىڭ شىعارماسىن قۋىرشاق تەاترى ساحناسىنا شىعارۋ – ۇلكەن جاۋاپكەرشىلىك. بۇل تۋىندى ءار بۋىننىڭ جۇرەگىنە جول تاپقان. ەندى سول رۋحاني مۇرانى قۋىرشاق ونەرى ارقىلى جاڭعىرتىپ, جاس كورەرمەنگە جەتكىزۋ – ءبىزدىڭ باستى ماقساتىمىز», دەدى مەملەكەتتىك قۋىرشاق تەاترىنىڭ ديرەكتورى المات امانگەلدى.
جاقىندا مەرەيلى 90-ماۋسىمىنىڭ شىمىلدىعىن اشقان تەاتردىڭ كەزەكتى پرەمەراسى – ادەبي مۇرانى زاماناۋي ساحنا ونەرى ارقىلى ناسيحاتتاۋدىڭ بىرەگەي ۇلگىسى. كورەرمەن قوجانىڭ كۇلكى مەن قايشىلىققا تولى بالالىق الەمىنە ەنىپ, ونىڭ وي-ساناسىنىڭ قالىپتاسۋ جولىنا كۋا بولادى. قويىلىم تەك بالالارعا عانا ەمەس, اتا-انالارعا دا اسەرلى تۋىندى بولادى دەپ كۇتىلۋدە. ويتكەنى ءاربىر ەرەسەك كورەرمەن ءوز بالالىق شاعىن, العاش جاساعان قاتەلىكتەر مەن ارمان-قيالىن قوجانىڭ بەينەسىنەن قايتا تابارى ءسوزسىز.