ورتالىق كوممۋنيكاتسيالار قىزمەتiندە «سامۇرىق-قازىنا كەلىسىمشارت» جشس باس ديرەكتورى سەرiكبەك ەلشiبەكوۆ, ءماجىلىس دەپۋتاتى ەكاتەرينا نيكيتينسكايا جانە اتالعان ءال-اۋقات قورىنىڭ ساتىپ الۋ مونيتورينگى جانە مەتودولوگيا دەپارتامەنتىنىڭ ديرەكتورى مۇحيت ماعاجانوۆ بريفينگ وتكىزدى. وندا وتاندىق تاۋار وندىرۋشىلەردى قولداۋعا قاتىستى شارالار ءسوز بولدى.
«نۇر وتان» پارتياسىنىڭ كەزەكتەن تىس حVI سەزىندە مەملەكەت باسشىسى مۇمكىندىگىنشە وتاندىق تاۋار ءوندىرۋشى كاسىپورىندارعا قولداۋ كورسەتۋ كەرەكتىگىنە نازار اۋدارعان ەدى. نەگىزى ءوز ەلىمىزدە جاسالعان ونىمدەردى پايدالانۋ ارقىلى كاسىپورىنداردى قولداۋ شاراسى بىرنەشە جىلدان بەرى جالعاسىپ كەلەدى. دەسەك تە, سوڭعى ۋاقىتتاعى الەمدىك داعدارىس پەن كورشى رەسەي ەلىنىڭ ۇلتتىق ۆاليۋتاسىنىڭ ەسەلەپ قۇنسىزدانۋى بۇل شارانى تاعى دا شيراتا تۇسۋگە ءماجبۇر ەتىپ وتىر. وتاندىق كاسىپورىنداردىڭ شىعارعان تاۋارلارى ارزان باعامەن اعىلىپ كەلىپ جاتقان كورشى تاۋارىنا توتەپ بەرە الماي تۇر. وسى ورىندا وتاندىق كاسىپورىنداردىڭ جۇمىسىن ءالى دە جانداندىرا ءتۇسۋ ماقساتىندا «سامۇرىق-قازىنا» قورى بىرقاتار قولداۋ شارالارىن قولعا الىپتى.
قوردىڭ كومپانيالار توبىنداعى ساتىپ الۋدىڭ اشىقتىعى مەن قازاقستاندىق ۇلەستى ارتتىرۋ جونىندە اڭگىمەلەگەن س.ەلشىبەكوۆ ساتىپ الۋ ءتارتىبى قابىلدانعان 6 جىل ىشىندەگى جەتىستىكتەرگە توقتالدى. «بۇگىنگى تاڭدا «سامۇرىق-قازىنا» اق ساتىپ الۋ ءتارتىبىن قور قۇرامىنا كىرەتىن 250 ۇيىم ىسكە اسىرىپ وتىر. 2009 جىلدان بەرى 150 مىڭ ساتىپ الۋ شارتى جاسالعان. قوردىڭ ساتىپ الۋداعى 75 پايىزى قازاقستاندىق تاۋار وندىرۋشىلەردىڭ ۇلەسىندە جانە بۇل كورسەتكىش ءوسۋ ۇستىندە. قوردىڭ ساتىپ الۋ تارتىبىنە سايكەس وتاندىق وندىرۋشىلەرگە 14 جەڭىلدىكتەن تۇراتىن پرەفەرەنتسيالار قاراستىرىلعان. ءبىز وسى تارتىپكە ساتىپ الۋ سالاسىنداعى وزىق تاجىريبەلەردى قولداندىق, قاتىسۋشىلاردىڭ پىكىرىنشە ساتىپ الۋ ءۇردىسى ىڭعايلى ءارى ءتيىمدى قالىپقا كوشتى. ناتيجەسىندە ساتىپ الۋ, كەلىسۋ مەن شەشىم قابىلداۋ شارتتارى وڭتايلانىپ, نەگىزگى جابدىقتاۋشىلارعا قويىلاتىن تالاپتار جەڭىلدەتىلدى», دەدى باس ديرەكتور.
نۇرباي ەلمۇراتوۆ,
«ەگەمەن قازاقستان».