قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ بەلگىلى پروفەسسورى, تۇركولوگيا عىلىمىنىڭ ءىرى وكىلى شاكىر يبراەۆ وقۋ ورداسىنىڭ كىتاپحاناسىنا 3000 كىتاپتان تۇراتىن جەكە قورىن سىيعا تارتتى, دەپ جازادى Egemen.kz.
فيلولوگيا عىلىمدارىنىڭ دوكتورى, پروفەسسور, «پاراسات» وردەنىنىڭ يەگەرى شاكىر يبراەۆ — تۇركولوگيا سالاسىنا ولشەۋسىز ەڭبەك سىڭىرگەن, كلاسسيكالىق اكادەميالىق مەكتەپتىڭ كورنەكتى وكىلى. بيىل عالىمنىڭ 75 جىلدىق مەرەيتويىنا وراي ۋنيۆەرسيتەت قابىرعاسىندا «تۇركولوگيا جانە شاكىر يبراەۆ زەرتتەۋلەرى» اتتى حالىقارالىق عىلىمي-تاجىريبەلىك كونفەرەنتسيا ۇيىمداستىرىلدى. ءىس-شارا ءحى تۇركولوگيا كونگرەسى اياسىندا ءوتتى.
پروفەسسوردىڭ ايتۋىنشا, كىتاپحاناعا تارتۋ ەتىلگەن بۇل قوردا ءوز ەڭبەكتەرىنەن بولەك, ءومىر بويى جيناعان سيرەك كەزدەسەتىن ادەبيەتتەر بار. ونىڭ ىشىندە قازاق, تۇرىك, ءازىربايجان, وزبەك, قىرعىز, تاتار, باشقۇرت, ۇيعىر, اراب, تۋۆا جانە باسقا دا تىلدەردەگى ەنتسيكلوپەديالار, سوزدىكتەر, فيلوسوفيا, فولكلور, ءتىل مەن ادەبيەتتانۋعا قاتىستى ەڭبەكتەر مەن كوركەم شىعارمالار كەزدەسەدى. سونداي-اق 1937, 1938, 1940 جىلدارى جارىق كورگەن «قازاق سوۆەت ادەبيەتى» مەن «ادەبيەت حرەستوماتياسى» سەكىلدى تاريحي باسىلىمدار دا بار.
كىتاپحانا قىزمەتكەرلەرى بارلىق ەڭبەكتەردى سالالارى بويىنشا سۇرىپتاپ, ارنايى بازاعا ەنگىزدى. بۇگىندە ستۋدەنتتەر مەن وقىتۋشىلار بۇل قوردى ەركىن پايدالانا الادى. عالىمنىڭ ايتۋىنشا, كىتاپ تارتۋ ەتۋدەگى باستى ماقسات – جىلدار بويى جيناقتالعان ءبىلىم كوزىن كەلەر بۋىنعا اماناتتاپ, جاس زەرتتەۋشىلەردىڭ ىزدەنىسىنە جول اشۋ.