«قوعامدى جاڭعىرتۋ ءۇشىن ءالى دە كوپ شارۋا اتقارۋىمىز كەرەك». پرەزيدەنت قاسىم-جومارت توقاەۆتىڭ حالىققا ارناعان جولداۋىندا ايتقان وسى ءسوزى – ءاربىر سانالى ازاماتتىڭ جۇرەگىنە جەتىپ, ەل الدىنداعى جاۋاپكەرشىلىكتى سەزىنۋگە ۇندەيدى.
ءبىز كۇن سايىن ەل ەكونوميكاسىنىڭ نەگىزىن قۇراپ وتىرعان ءوندىرىس سالاسىندا, ەلىمىزدىڭ بايلىعىن حالىق يگىلىگىنە اينالدىرۋ جولىندا ەڭبەك ەتىپ ءجۇرمىز. قوعام جاڭعىرۋى ءۇشىن ەڭبەك ادامىنىڭ ساناسى, بولمىسى دا جاڭعىرۋى كەرەك. بىزگە تەك مۇناي ءوندىرىپ قويماي, تەحنولوگيالىق ءتارتىپتى, ەكولوگيالىق جاۋاپكەرشىلىكتى, قاۋىپسىزدىك مادەنيەتىن دە بىرگە دامىتۋ مىندەتى جۇكتەلىپ وتىر.
پرەزيدەنت جولداۋدا رەفورمالاردىڭ سالماقتى ءارى ساپالى تۇردە جۇزەگە اسىرىلۋى كەرەكتىگىن باسا ايتتى. بۇل سوزدەر ءبىزدىڭ سالادا دا وتە وزەكتى. مۇناي-گاز – كۇردەلى ءارى ۇنەمى جاڭارىپ وتىرۋدى قاجەت ەتەتىن سالا. سوندىقتان ءبىز دە جاڭا تاسىلدەرمەن جۇمىس ىستەۋگە بەيىمدەلىپ, تسيفرلىق شەشىمدەردى مەڭگەرىپ, قاۋىپسىزدىك پەن تيىمدىلىكتى ءبىرىنشى ورىنعا قويۋىمىز كەرەك.
سونداي-اق پرەزيدەنتتىڭ وسكەلەڭ ۇرپاق باقىتتى جانە بەرەكەلى ءومىر سۇرۋگە ءتيىس دەگەن ءسوزى مەنى ەرەكشە تولعاندىردى. ويتكەنى ءبىز ەڭبەك ەتىپ جۇرگەن ءوندىرىس تەك بۇگىنگى كۇن ءۇشىن ەمەس, ەرتەڭگى ۇرپاق ءۇشىن جۇمىس ىستەپ كەلەدى. بۇگىنگى ءبىزدىڭ تاباندى ەڭبەگىمىز – بولاشاقتىڭ ىرگەتاسى.
ەلدە جاڭا ءوندىرىس ورىندارى اشىلىپ, ينفراقۇرىلىم دامىپ, ينۆەستيتسيا تارتىلىپ جاتىر. ءبىز بۇل جۇمىستى تەك سىرتتاي باقىلاۋشى ەمەس, تىكەلەي اتقارۋشى رەتىندە قابىلدايمىز. ءاربىر باررەل مۇناي, ءاربىر ينجەنەرلىك شەشىم – ەل دامۋىنا قوسىلعان ناقتى ۇلەس.
پرەزيدەنتىمىز جولداۋدا «جۇمىسىمىز قانشالىقتى كۇردەلى بولسا دا, ءبىز مىندەتتى تۇردە تابىسقا جەتۋىمىز كەرەك. باسقا جول جوق. سەبەبى بۇل – ەلىمىزدىڭ بولاشاعى, حالقىمىزدىڭ تاعدىرى», دەپ اتاپ ءوتتى. بۇل – جاي ءسوز ەمەس, بۇل – ناعىز ەڭبەك ادامىنا ارنالعان ۇندەۋ. سول ۇندەۋ اياسىندا ءبىز ەل يگىلىگى ءۇشىن ادال ەڭبەك ەتە بەرەمىز.
وسى ورايدا مەملەكەت باسشىسى جۇمىسشى ماماندىقتارىنا دەگەن قۇرمەتتى ارتتىرا ءتۇسۋ – مەملەكەتتىڭ نەگىزگى مىندەتتەرىنىڭ ءبىرى ەكەنىن دە العا قويدى. شىن مانىندە, بۇل – وندىرىسپەن تىكەلەي اينالىسىپ جۇرگەن ءبىز سەكىلدى ەڭبەك ادامدارى ءۇشىن ۇلكەن قولداۋ ءارى جاڭا مۇمكىندىكتەر كەزەڭى. مەملەكەت تاراپىنان كورسەتىلەتىن مۇنداي نازار جۇمىسشى ماماندىعىنىڭ مارتەبەسىن كوتەرىپ, كەلەشەك ۇرپاقتى ەڭبەككە دەگەن قۇرمەتپەن تاربيەلەۋگە ىقپال ەتەدى. سوندىقتان جۇمىسشى ەڭبەگىن باعالاۋ, جاستاردى ناقتى ءوندىرىس سالاسىنا تارتۋ, ولاردى تۇراقتى قولداۋ – بارشا قوعامنىڭ, اسىرەسە ەڭبەك ۇجىمدارىنىڭ الدىندا تۇرعان ماڭىزدى مىندەتتەردىڭ ءبىرى.
گۇلشارا وڭداشەۆا,
«ەمبىمۇنايگاز» اق «جىلىويمۇنايگاز» مگوب
مۇناي-گاز كەن ورنىن يگەرۋ جانە گەولوگيا ءبولىمىنىڭ گەولوگى