باتىس قازاقستان وبلىسىندا «قادىر» اتتى جاڭا عىلىمي-قوعامدىق جۋرنال جارىق كورمەك. توقسان سايىن كەمىندە ءبىر سانى جارىق كورەتىن جاڭا باسىلىم قازاقستان رەسپۋبليكاسى مادەنيەت جانە اقپارات مينيسترلىگىنىڭ اقپارات كوميتەتىندە تىركەلىپ, № KZ 90VPY00128389 كۋالىك العان.
«ناعىز اقىن قادىر مىرزا ءالى جونىندە مىڭ ماقتاننان – ءبىر قۇرمەت ارتىق. سونداي ءىلتيپات-ىزەتتىڭ ءبىرى – اقىن اتىمەن جۋرنال شىعارۋ. ءبىرازدان بەرى الەۋمەتتىڭ ويىندا جۇرگەن, زيالى قاۋىم جۇرگەن جەردە ءار كەز قوزعالىپ كەلە جاتقان تۇيتكىلدى ماسەلە ەدى, ماڭىزدى ماعىناعا اينالىپ كەمەلىنە كەلگەنى وسى بولىپتى», دەيدى ورالداعى قادىر مىرزا ءالى اتىنداعى مادەنيەت جانە ونەر ورتالىعىنىڭ باسشىسى داۋلەتكەرەي قۇسايىنوۆ.
جۋرنالدىڭ تۇڭعىش سانى قىركۇيەك ايىندا شىعادى. باسىلىمنىڭ قاعاز نۇسقاسى قولىنا تيمەي قالعان كوپشىلىك وقىرمان ارنايى سىلتەمە ارقىلى جۋرنالدىڭ ەلەكتروندى نۇسقاسىمەن تانىسا الادى.
جاڭا باسىلىمعا ساتتىلىك تىلەيمىز!
باتىس قازاقستان وبلىسى