ەركەعالي راحماديەۆ اتىنداعى استانا قالاسى اكىمدىگىنىڭ مەملەكەتتىك اكادەميالىق فيلارمونياسىنىڭ ۇيىتقى بولۋىمەن «جاساي بەر, قازاق ەلى» اتتى كونتسەرت ءوتتى. ەلىمىزدىڭ ەڭ باستى قۇندىلىعى – اتا زاڭىمىزدى ۇلىقتاعان كەش كورەرمەندەرگە ەرەكشە رۋحاني اسەر سىيلادى.
مەرەكەلىك كەشتىڭ شىمىلدىعى قازاق رۋحانياتىنىڭ اينىماس رامىزىندەي بولعان «اتامەكەن» انىمەن اشىلدى. ەل مەن جەرگە دەگەن پەرزەنتتىك ماحابباتتى اسقاقتاتقان بۇل شىعارما قايروللا جۇماكەنوۆ اتىنداعى ۇرلەمەلى وركەستردىڭ سۇيەمەلدەۋىندە كورەرمەنگە ەرەكشە شابىت سىيلاپ, كامەرالىق حور مەن ءانشى الماس ءنۇرساتتىڭ ورىنداۋىندا شەبەر شىرقالدى.
كونتسەرت بارىسىندا جۇرگىزۋشىلەر كونستيتۋتسيانىڭ ەل دامۋىنداعى ماڭىزىن تاريحي دەرەكتەرمەن ۇشتاستىرا بايانداپ, زاڭ مەن ءتارتىپتىڭ قوعامداعى ورنىن ايقىنداي وتىرىپ, كەشتىڭ يدەولوگيالىق تۇعىرىن نىعايتتى.
ءان مەن كۇيدىڭ الۋان بوياۋىنان قۇرالعان باعدارلامادا 17 ءتۇرلى ءنومىر ورىندالدى. ولاردىڭ ارقايسىسى ەلىمىزدىڭ مادەني بايلىعى مەن رۋحاني قۋاتىن پاش ەتكەن شىعارمالار ەدى. «اتا زاڭ ءانى» (ورىنداۋشىسى ءادىل سۇلتان), «تۋعان ەل» مارشى, سەيدوللا بايتەرەكوۆتىڭ «قازاقستان» ءانى سىندى شىعارمالار ەلگە دەگەن سۇيىسپەنشىلىكتى وياتتى. حالىق اندەرىنەن قۇرالعان «ياپۋراي-قاماجاي» ءپوپۋرريى ۇلتتىق مۇرانى ەل جادىندا جاڭعىرتتى.
كونتسەرتتە دومبىراشى مۇحيت سالىبەكوۆ حالىق كومپوزيتورى قۇرمانعازىنىڭ «اداي» كۇيىن تارتقاندا دومبىرا ءۇنى ۇرلەمەلى وركەسترمەن ۇتىمدى ۇيلەسىپ, كورەرمەندەردىڭ جانىن باۋراپ, جۇرەگىن جاۋلاپ كەشتىڭ كوركەمدىك دەڭگەيىن كوتەرىپ-اق تاستادى. سونىمەن قاتار كەش قوناقتارىنىڭ ءبىرى – قازاقستاننىڭ ەڭبەك سىڭىرگەن قايراتكەرى بيبىگۇل جانۇزاقتىڭ ورىنداۋىنداعى «قايىقتا» ءانى نازىك ليريزم مەن ۇلتتىق رومانتيكانى ۇيلەستىرە ءتۇستى. ودان ءارى اباي قۇنانباي ۇلىنىڭ 180 جىلدىعىنا ارنالعان «بويى بۇلعاڭ» ءانى ورىندالدى.
بيىلعى جۇمىسشى ماماندىقتارى جىلى اياسىندا دا كونتسەرتتە ەڭبەك ادامىنىڭ ءرولى ۇمىت قالمادى. مەرەكەلىك كەشتە تىڭدارمان نازارىنا ۇسىنىلعان «قازاق ەلى», «قازاقستان جاستارى», «تسۆەتي, زەمليا مويا», «باقىت دەگەن», «ەلىمنىڭ جۇرەگى – استانا» سياقتى ءتۇرلى جانر جانە تىلدەگى شىعارمالار كونتسەرتتىڭ ۇيلەسىمدىلىك پەن ءوزارا تۇسىنىستىكتى ارتتىرۋعا قوسقان ۇلەسىندەي. كەشتىڭ فينالىندا ورىندالعان «اتامەكەن» ءانى حالىقتىڭ بىرلىگىن, تۇتاستىعىن جانە ەلگە دەگەن ۇلى ماحابباتىن ۇلىقتاعانداي.
كەشتىڭ كوركەمدىك جەتەكشىلەرى – ن.پوچيتالين (ۇرلەمەلى وركەستر), د.ساتاەۆا (ەسترادالىق ۆوكال ءبولىمى), ر.شوتقاليەۆا (كلاسسيكالىق ۆوكال ءبولىمى) سىندى بىلىكتى ماماندار ءوز سالاسىنىڭ مايتالماندارى ەكەنىن تاعى ءبىر دالەلدەدى. بۇل كەش ارقىلى كورەرمەن اسەم ءان-كۇيگە بولەنىپ قانا قويماي, ەلىنىڭ تاريحى مەن مادەنيەتىنە تاعى ءبىر ۇڭىلە ءتۇستى.
باعدات بايجانتاەۆ,
ەركەعالي راحماديەۆ اتىنداعى مەملەكەتتىك اكادەميالىق فيلارمونيانىڭ باس رەداكتورى