جىل سايىن جاڭا وقۋ جىلى قارساڭىندا ەلىمىزدە «مەكتەپكە جول» اكتسياسى وتەدى. ءبىلىم الەمىنە بەتتەگەن وقۋشىنىڭ مۇقتاجى بولسا, ونىڭ كەم-كەتىگىن تولتىرۋعا مەملەكەت تە, جەكە ادامدار دا اتسالىسادى. بۇل يگى ءىس اقجايىق وڭىرىندە دە ۇيىمشىلدىقپەن ءوتىپ جاتىر.
اتالعان اكتسيانىڭ ماقساتى – از قامتىلعان جانە كوپبالالى وتباسىلاردان شىققان وقۋشىلارعا, جەتىم بالالار مەن اتا-اناسىنىڭ قامقورلىعىنسىز قالعان بالالارعا وقۋ جىلىنىڭ باستالۋىنا دايىندىق كەزىندە كومەك كورسەتۋ. نەگىزى ۇكىمەتتىڭ 2008 جىلعى 25 قاڭتارداعى №64 قاۋلىسى نەگىزىندە جەرگىلىكتى بيۋدجەت ەسەبىنەن قۇرىلعان جالپىعا بىردەي ءبىلىم بەرۋ قورى بار. وسى قوردان مەملەكەتتىك اتاۋلى الەۋمەتتىك كومەك الۋعا قۇقىعى بار وتباسى بالالارىنا, مەملەكەتتىك اتاۋلى الەۋمەتتىك كومەك المايتىن, بىراق تابىسى تومەن وتباسى بالالارىنا, قامقورشى قولىندا تۇراتىن جەتىم بالالارعا جانە اتا-انا قامقورلىعىنسىز قالعان بالالارعا, توتەنشە جاعداي سالدارىنان شۇعىل جاردەمدى تالاپ ەتەتىن وتباسى بالالارىنا جانە ءبىلىم بەرۋ ۇيىمىنىڭ القالى باسقارۋ ورگانى ايقىنداعان وزگە دە ساناتتارعا قارجىلاي كومەك بەرىلەدى.
– بيىل باتىس قازاقستان وبلىسى بويىنشا جالپىعا بىردەي ءبىلىم بەرۋ قورىنان وقۋشىلارعا كەڭسە تاۋارلارىن, مەكتەپ فورماسىن, سپورتتىق كيىم, اياق كيىم, ت.ب. زاتتاردى ساتىپ الۋعا 434,0 ملن تەڭگە قاراجات قاراستىرىلدى. قازىرگە دەيىن 1991 وقۋشىعا جالپى سوماسى 92,0 ملن تەڭگە كولەمىندەگى قاراجات اتا-انالاردىڭ كارت-شوتتارىنا اۋدارىلدى. ياعني ءار وقۋشىعا 46 228 تەڭگە كولەمىندە اقشالاي كومەك كورسەتىلدى, – دەيدى وبلىستىق ءبىلىم باسقارماسى باسشىسىنىڭ مىندەتىن ۋاقىتشا اتقارۋشى اقجارقىن تەمىرحانوۆا.
بىلتىر باتىس قازاقستان وبلىسى سۋ تاسقىنىنان كوپ زارداپ شەكتى. بىراق 2024 جىلى «مەكتەپكە جول» اكتسياسى اياسىندا سۋ تاسقىنىنان زارداپ شەككەن وتباسى بالالارىنا كومەك تە كوپ بولىپتى. ماسەلەن, «Jelken foundation» قوعامدىق قورى, «Freedom Holding Corp» كومپانياسى جاردەمگە كيىم جانە وقۋ قۇرالدارىن بەرگەن. «يگىلىك-مەرەي» قوعامدىق قورى بايتەرەك اۋدانى ءبىلىم بەرۋ ءبولىمىنىڭ «چەبوتارەۆ «مەكتەپ-بوبەكجاي-بالاباقشا» كەشەنىنە» وقۋشىلاردى تاسىمالداۋ ءۇشىن «پاز» اۆتوبۋسىن سىيلاعان.
ءبىلىم باسقارماسى وڭىردەگى بارلىق اۋقاتتى ازاماتتى, كاسىپكەردى, شارۋا قوجالىعى يەلەرىن وسى ءبىر قايىرىمدىلىق ءىس-شاراسىنا اتسالىسۋعا شاقىرىپ, ۇندەۋ جاريالادى. بۇل يگى باستامانى بىردەن قولداپ كەتكەندەر دە بار.
– ءبىز «مەكتەپكە جول» اكتسياسىنا جىل سايىن قاتىسامىز. بيىل دا تەرەكتى اۋدانىنىڭ ءسارىومىر جانە اڭقاتى اۋىلدىق وكرۋگىنە, سىرىم اۋدانىنىڭ توعاناس جانە العاباس اۋىلدىق وكرۋگىنە ارقايسىسىنا 150 مىڭ تەڭگە, بارلىعى 600 مىڭ تەڭگە قاراجات بەرىپ وتىرمىز. اتالعان ءار اۋىلدىڭ از قامتىلعان 5 وقۋشىسى 30 مىڭ تەڭگەگە مەكتەپكە قاجەت زاتتارىن الادى. بۇل وقۋشىلاردى اۋىل اكىمدىگى وزدەرى تاڭدايدى, – دەيدى «دادەم اتا-جۇماعازى حازىرەت» قورىنىڭ باسشىسى عاريفوللا جانبوزوۆ.
«مەكتەپكە جول» اكتسياسى قىركۇيەك ايىنىڭ سوڭىنا دەيىن جالعاسادى.
باتىس قازاقستان وبلىسى