كەيىنگى بىرنەشە جىلدىڭ بەدەرىندە وبلىس ورتالىعى تاراز قالاسىنىڭ كوشەلەرى ەداۋىر جاڭاردى. مەملەكەت باسشىسى قاسىم-جومارت توقاەۆ جولداۋلارىندا كولىك-لوگيستيكا سالاسىن جاقسارتۋ, قالا جولدارىنىڭ ساپاسىن ارتتىرۋ تۋرالى تاپسىرما بەرگەنى بەلگىلى. سودان دا بولسا كەرەك, قالا ىشىندەگى كوشە جولدارىنىڭ ساپاسى جىل وتكەن سايىن جاقسارىپ كەلەدى. جەرگىلىكتى اتقارۋشى بيلىك وكىلدەرىنىڭ ايتۋىنشا, بۇل باعىتتا قولعا الىنعان جۇمىس ىلكى ساتكە دە توقتاماق ەمەس.
تارازدا وتكەن جىلى باستالعان نەگىزگى كوشەلەردىڭ جولىن جوندەۋ, جاڭادان جول سالۋ جۇمىسى بيىل دا قارقىندى جالعاسىن تاۋىپ جاتىر. «جول ازابىن تارتۋداي-اق تارتىپ كەلدىك. بىزگە قاشان جول سالىنادى؟» دەپ الدەنەشە جىل بويى جەرگىلىكتى اتقارۋشى بيلىككە بازىناسىن ايتقان تارازدىق الەۋمەتتىڭ ءوتىنىشىن شاھار باسشىسى ءجىتى نازاردا ۇستاپ وتىر.
اسىرەسە ەلىمىزدەگى ەڭ ۇلكەن شاعىن اۋدان ساناتىنا ەنگەن « ۇلى دالا» شاعىن اۋدانىنىڭ ماڭىنداعى «بۋرىل» تۇرعىن الابىندا قونىستانعان تۇرعىندار ءوتىنىشى قاناعاتتاندىرىلىپ, بىرنەشە كوشەگە جاڭا اسفالت سالىنعانىنا حالىق ريزا.
قالا بيلىگى كەلتىرگەن دەرەككە جۇگىنسەك, وبلىس ورتالىعىنداعى جول جوندەۋ جوبالارىنىڭ سانى وتكەن جىلعى دەرەكپەن سالىستىرعاندا ەكى ەسەگە دەيىن ارتقان. بۇل رەتتە, حالىق سۇرانىسىنا وراي, وبلىس ورتالىعىنداعى نەگىزگى كوشەلەردىڭ جولىن قالپىنا كەلتىرۋگە باسىمدىق بەرىلىپ وتىر.
جالپى, جامبىل وبلىسىنداعى جەرگىلىكتى ماڭىزى بار اۆتوجولدار مەن ەلدى مەكەن كوشەلەرىن جوندەۋگە قازىنادان 28 ملرد تەڭگە قاراستىرىلعان, ونىڭ ەداۋىر بولىگى وبلىس ورتالىعىنا باعىتتالعان.
«بيىل جالپى ۇزىندىعى 61,4 شاقىرىمدى قۇرايتىن 95 كوشە, بۇرىلىس, تۇيىق, وتكەلگە ورتاشا جوندەۋ جۇمىسىن جۇرگىزۋ جوسپارلانعان. بۇدان بولەك, 100 كوشەگە, 20 تۇرعىن الابىنا شاعال توسەلىپ, جالپى ۇزىندىعى 35,3 شاقىرىمدى قۇرايتىن جاياۋ جۇرگىنشىلەر جولى جوندەلەدى. وسىلايشا, جەرگىلىكتى حالىقتىڭ سۇرانىسىن قاناعاتتاندىرۋعا دەن قويىپ وتىرمىز. جۇمىستى حالىق تالاپ-تىلەك ەتكەندەي, بارىنشا ساپالى اتقارۋعا نيەتتىمىز», دەيدى تاراز قالاسى اكىمىنىڭ ورىنباسارى نۇرسۇلتان يسابەكوۆ.
باقىتجان ورىنبەكوۆ تاراز قالاسىنىڭ اكىمى قىزمەتىنە تاعايىندالعاننان كەيىن باق وكىلدەرىمەن جۇزدەسىپ, وبلىس ورتالىعىنداعى كوشە جولدارىن قالپىنا كەلتىرۋ باعىتىندا قولدان كەلگەنشە قىزمەت اتقاراتىنىن ءمالىم ەتكەن ەدى. شاھار باسشىسى «بۋرىل» تۇرعىن الابىنداعى كوشەلەرگە جاڭادان جول سالۋعا ىقپال ەتۋ ارقىلى جەرگىلىكتى حالىقتىڭ نەگىزگى ماسەلەسىن شەشۋگە باسىمدىق بەرىپ وتىرعانىن دالەلدەدى. «بۋرىل» تۇرعىن الابى « ۇلى دالا» شاعىن اۋدانىمەن قاپتالداسىپ جاتقانىن, مۇندا بىرنەشە قوعامدىق كولىك قاتىنايتىنىن ەسكەرسەك, قالا اكىمىنىڭ بۇل قادامى, راسىندا دا, كوڭىل قۋانتادى.
«وبلىس ورتالىعىنداعى 37 كوشە, بۇرىلىس, تۇيىقتار مەن وتكەلدەردە جول جوندەۋ جوسپارعا سايكەس قارقىندى جۇرگىزىلىپ جاتىر. ماسەلەن, «بۋرىل ا, ب, ۆ» تۇرعىن الابىنداعى جالپى ۇزىندىعى 33,2 شاقىرىمدى قۇرايتىن 75 كوشەگە اسفالت جابىندىسىن توسەۋ قاراستىرىلعان بولسا, قازىرگە دەيىن 61 كوشەدە جۇمىس اياقتالعان. قالعان 14 كوشەگە دە جول توسەلەدى», دەيدى قالا اكىمىنىڭ ورىنباسارى.
تارازداعى جول جوندەۋ جۇمىسى جەرگىلىكتى حالىقتىڭ كوڭىلىنەن شىعىپ وتىر. شاھار تۇرعىندارى جىلدار بويى ايتىلعان وزەكتى ماسەلەنىڭ دەر كەزىندە وڭىنان شەشىلىپ جاتقانىنا قۋانىشتى. سول رەتتە قارقىندى جۇرگىزىلىپ جاتقان جۇمىس توقتاماسا ەكەن دەپ تىلەيدى.
ء«بىراز جىل بويى ايتىلىپ كەلگەن كوكەيكەستى ماسەلە شەشىمىن تاۋىپ جاتىر. كوشەلەر جارىقتاندىرىلعان, اۋىزسۋ ماسەلەسى شەشىلگەن. ەندى, مىنە, قالا اكىمدىگى بەرگەن ۋادەسىن ورىنداپ, كوشەلەرگە اسفالت توسەپ جاتىر. جول ازابىن جىلدار بويى ءبىر كىسىدەي سەزىندىك. تۇرعىندار تالاي رەت كوتەرگەن وزەكتى ماسەلەنىڭ وڭىنان شەشىلگەنىنە, جالپى العاندا, وبلىس ورتالىعىندا اتقارىلىپ جاتقان جۇمىستارعا جەرگىلىكتى جۇرت ءدان ريزا», دەيدى تاراز قالاسىنىڭ تۇرعىنى, ارداگەر باقىت سامىراتبەكوۆ.
راسىندا دا, كەيىنگى بىرنەشە جىلدا وبلىس ورتالىعىندا كوشە جولدارىن جوندەۋ, جاڭادان جول سالۋ, كوشەلەردى جارىقتاندىرۋ جۇمىسى جوعارى قارقىندا جۇرگىزىلىپ جاتىر. شاھار باسشىسىنىڭ ەكى جىل بۇرىن بەرگەن ۋادەسىن ۋاقتىلى ورىنداپ جاتقانى كوڭىل توعايتادى.
تاراز