ورال قالاسىنىڭ «جۇلدىز» شاعىن اۋدانىندا كەرنەۋى 110/10 كيلوۆاتتىق جاڭا قوسالقى ستانسا ىسكە قوسىلدى. ول اتالعان اۋداننان بولەك, ەسكى اۋەجاي, 6, 7, 8, 9, 10-شاعىن اۋدان تۇرعىندارىن ۇزدىكسىز ءارى ساپالى ەلەكتر قۋاتىمەن قامتاماسىز ەتەدى.
قۇرىلىس وتكەن جىلى باستالعان ەدى. زاماناۋي جوعارى كەرنەۋلى جابدىقتار ورناتىلعان قوسالقى ستانسادا قۋاتتى ەكى ترانسفورماتور, كەرنەۋى 110 كيلوۆولتتىق, ۇزىندىعى 300 مەترلىك 6 تىزبەكتى اۋە جەلىسى, 4 انكەرلى تىرەك, 5 كولىك سياتىن اۆتوتۇراعى بار جوندەۋ بازاسى, اكىمشىلىك-تۇرمىستىق كورپۋس سالىندى.
– جوباعا وتاندىق «Alageum Electric» كومپانياسىنىڭ جوعارى ۆولتتى جابدىقتارى پايدالانىلدى. نىسان تولىقتاي ىسكە قوسىلعان سوڭ, بۇل جەردە «باتىس قازاقستان ايماقتىق ەلەكتر جەلىلىك كومپانياسى» ماماندارى تۇراقتى تۇردە قىزمەت ەتەدى. قۇرىلىستى ساپالى ورىنداپ شىققان مەردىگەر ۇيىم قىزمەتكەرلەرىنە العىس ايتامىن. بۇل جوبا – ءوڭىرىمىزدىڭ ينفراقۇرىلىمدىق دامۋىنا سەرپىن بەرىپ, تۇرعىنداردىڭ تۇرمىس ساپاسىن جاقسارتۋعا ايتارلىقتاي ۇلەس قوسادى, – دەدى نىساننىڭ اشىلۋ سالتاناتىنا ارنايى كەلگەن باتىس قازاقستان وبلىسىنىڭ اكىمى ناريمان تورەعاليەۆ.
جاڭا ستانسا قالا ىرگەسىندەگى وندىرىستىك ايماقتاردى ەلەكترمەن قامتۋ ءىسىن دە سەنىمدى ەتە ءتۇستى. جوباعا رەسپۋبليكا قازىناسىنان 3,2 ملرد تەڭگە, جەرگىلىكتى بيۋدجەتتەن 190 ملن تەڭگە قاراجات بولىنگەن.
باتىس قازاقستان وبلىسى