باتىس قازاقستان وبلىسىنىڭ اقجايىق اۋدانىنا قاراستى قاراۋىلتوبە اۋىلىندا جاڭا باق اشىلدى. تۋىپ-وسكەن اۋىلىنا 30 ءتۇپ الما, 30 ءتۇپ المۇرت اعاشىن سىيلاعان – سوعىس ارداگەرى قامەش ءابىر ۇلىنىڭ ۇرپاقتارى.
جەڭىستىڭ 80 جىلدىعىن قاراۋىلتوبەلىكتەر ۇيىمشىلدىقپەن اتاپ ءوتتى. مەرەكە قارساڭىندا اۋىلدى اباتتاندىرۋعا, «زەردە» ساياباعىن جاڭارتۋعا, جەڭىس مەيرامىن لايىقتى اتاپ وتۋگە اۋىلداستار 7 ملن 150 مىڭ تەڭگە قاراجات جيناپتى. دەمەۋشىلەردىڭ ءبىر توبى «تۋعان ولكەم – قاراۋىلتوبە» ارحيتەكتۋرالىق نىسانىن ورناتسا, ەندى ءبىر توبى اۋىلعا كىرە بەرىستەگى قاقپانى جاڭارتقان. ءتىپتى ايالداما جانىنا جاڭا اجەتحانا ورناتىلىپ, كوپشىلىكتىڭ ءبىر قاجەتى تۇگەندەلگەن.
– اۋىلداعى كورنەكى تاقتالاردى دا تالاپقا ساي جاڭارتتىق. قازىر اۋىل كوشەلەرىندە تازالىق, ۇلتتىق قۇندىلىقتارىمىز, ەڭبەكقورلىق, ەل بىرلىگى, وتباسى تاربيەسى تۋرالى ونشاقتى باننەر ىلىنە باستادى. بۇل ءىس تە تولىعىمەن الماس وتەجانوۆ, اسىلحان شايحيەۆ, مەرەكە تۇرسىنعاليەۆ سەكىلدى ازاماتتاردىڭ قولداۋىمەن جۇزەگە استى. ءار باستاماعا قول ۇشىن سوزۋعا دايىن ازاماتتار از ەمەس. سونداي جانداردىڭ ارقاسىندا سوعىس جانە تىل ارداگەرلەرىنىڭ سۋرەتتەرى ىلىنگەن تاقتا جاڭارتىلدى, اۋىلدا دالا قىزىقتارى ۇيىمداستىرىلىپ, قوس كيىز ءۇي تىگىلىپ, اس بەرىلدى, – دەيدى اۋىلدىق وكرۋگتىڭ اكىمى جانىبەك ءابىروۆ.
سۇراپىل سوعىس جىلدارى قاراۋىلتوبە اۋىلىنان 400-گە جۋىق ازامات مايدانعا اتتانسا, ەلگە تەك 151-ءى امان ورالعان ەكەن. سول مايدانگەردىڭ ءبىرى – فين جانە ەكىنشى دۇنيەجۇزىلىك سوعىسقا قاتىسقان, كەيىن اۋىلدا ەڭبەك ەتكەن مارقۇم قامەش ءابىر ۇلى بولاتىن. باتىردان تاراعان ۇرپاق بۇگىندە ۇلكەن اۋلەتكە اينالعان. ولار جەڭىس كۇنى قارساڭىندا ات شاپتىرىم جەرگە جاڭا باق ورناتىپ, وعان «جەڭىس باعى» دەگەن اتاق بەردى.
اۋىلدا بۇدان باسقا دا يگى ءىس كوپ. جاقىندا قوس پاتەرلى ءۇي سالۋ قولعا الىندى. بۇدان بولەك, «الەۋمەتتىك كەڭسە» دەپ اتالاتىن عيماراتتىڭ دا قابىرعاسى تىكتەلىپ, شاتىرى جابىلا باستاپتى. وكرۋگ باسشىسىنىڭ ايتۋىنشا, كەڭسە اشىلعان سوڭ اۋىل تۇرعىندارى كەز كەلگەن قۇجات ءۇشىن اۋدان ورتالىعىنا شاپقىلاماي, وسى جەردەن شارۋاسىن بىتىرەدى ەكەن. ەلەكتروندى ۇكىمەت, تاعى سول سياقتى پورتالدار ارقىلى مەملەكەتتىك قىزمەت الۋعا, بانك قىزمەتىنە قولجەتىمدى ورتالىق بولماق. ەكى نىسان دا شىلدە ايىندا پايدالانۋعا بەرىلمەك.
باتىس قازاقستان وبلىسى