وبلىس ورتالىعى تاراز قالاسىنداعى «ەجەلگى تاراز» مەملەكەتتىك تاريحي-مادەني مۋزەي قورىعىنىڭ قورىندا تاريحى تەرەڭنەن تامىر تارتقان جادىگەرلەر از ەمەس. ىقىلىم زاماننان سىر شەرتكەن قۇندىلىقتاردىڭ دەنى 2011–2017 جىلدار ارالىعىندا جۇرگىزىلگەن ارحەولوگيالىق قازبا جۇمىسى كەزىندە تابىلعان.
مەكەمەدەگى مامانداردىڭ ايتۋىنشا, مۇنداعى جادىگەرلەردىڭ بىرقاتارى ەرتە جانە ورتا عاسىرلارعا تيەسىلى كورىنەدى. ءىح-ءحىى عاسىرلاردىڭ كوزىندەي بولعان جادىگەرلەردىڭ ىشىندە قولادان جانە قىشتان جاسالعان ءتورت بىلتەلى شىراعداندار دا بار.
«2011–2017 جىلدار ارالىعىندا ەجەلگى تاراز قالاسىنىڭ اۋماعىندا جۇرگىزىلگەن ارحەولوگيالىق قازبا جۇمىستارىنىڭ ناتيجەسىندە قىشتان جانە قولادان جاسالعان ورتاعاسىرلىق شىراعداندار تابىلدى. جادىگەرلەردىڭ تاريحى ەرتە داۋىردەن باستالادى.
ەجەلگى تاراز قالاشىعى اۋماعىنان تابىلعان قولا شىراعدانداردى تەك اقسۇيەك, باقۋاتتى وتباسىلار عانا پايدالانعان دەگەن دەرەك بار. سەبەبى ولاردىڭ جاسالۋ تەحنيكاسىنا قاراي قۇنى دا جوعارى بولعان دەگەن بولجام ايتىلادى. ءبىر تاڭعالارلىعى, وسىمدىك ويۋ-ورنەگىمەن اشەكەيلەنگەن بۇل جادىگەرلەرگە قاراپ وتىرىپ, ورتا عاسىرلاردا دا قازاق جەرىندە ساۋلەت ونەرىنىڭ ەرەكشە دامىعانىن اڭعارۋ قيىن ەمەس.
تۇعىرلى قولا شىراعداندار ءدىني سالتتار مەن كۇندەلىكتى تۇرمىستا قولدانىلعان كورىنەدى. ماسەلەن, كەيبىر شىراقتاردىڭ بيىكتىگى ءبىر مەترگە دەيىن جەتەدى. اتالعان شىراعدانداردىڭ بارلىق بولىكتەرى بەزەندىرىلىپ, ورنەكتەرمەن جانە اراب ارىپتەرىمەن اشەكەيلەنگەن. بۇل دۇنيەلەر سول داۋىرلەردە دە وڭىردە ساۋلەت ونەرىمەن قاتار, جازۋ مادەنيەتىنىڭ دە قالىپتاسقانىن ايعاقتايدى», دەيدى «ەجەلگى تاراز» مەملەكەتتىك تاريحي-مادەني مۋزەي قورىعىنىڭ قور ساقتاۋ جانە ەسەپكە الۋ ءبولىمىنىڭ باسشىسى ۇلبوسىن ءالىمحانوۆا.
تاراز