قازاقستان ۇكىمەتىنىڭ قاۋلىسىمەن قوستاناي قالاسىنداعى №9 قازاق ورتا مەكتەبىنە كورنەكتى اقىن, جازۋشى عافۋ قايىربەكوۆتىڭ ەسىمى بەرىلدى. قوستاناي قالاسىندا باستى كوشەلەردىڭ ءبىرى دە قازاق پوەزياسىنىڭ ءدۇلد ۇلى ەسىمىمەن اتالادى. عافۋ اقىن:
«قايدا جۇرسەم, سەنى ەسىمنەن تاستاماي,
ءوتىپ كەتتى جاقسى جىل مەن جاس تالاي.
مەنىڭ اتىم ساعىنىش بوپ وزگەردى,
ساعىنىشقا قولىڭدى بەر, قوستاناي!»
دەپ جىرلاعان تۋعان جەرىندە كوشە مەن مەكتەپ تۇتاس انسامبل قۇرىپ تۇرعانىن جۇرتى قالاعان ەدى. ءبىراز كۇتتىرگەن جىلداردان كەيىن اقىن جىرلارىنا ءتانتى حالقىنىڭ تىلەۋى ورىندالدى.
– تۋعان جەرى ازاماتىن, اقىنىن سىيلاپ, ءبىلىم وشاعىنا عافەكەڭنىڭ اتىن بەرگەنىنە ريزامىن. مەكتەپ وقۋشىلارى اتاسىنىڭ اتىنا كىر كەلتىرمەي, ءبىلىمدى ازامات بولسىن, – دەدى اقىننىڭ جارى بادەش حامزينا. سالتاناتتى ءىس-شارادا قوستاناي قالاسى اكىمىنىڭ ورىنباسارى م.قاليەۆ, اقىندار ا.شاياحمەت, س.وسپانوۆ, ن.مۇقاتوۆ, جازۋشى-ساتيريك ع.احمەتچين, ءتىل جاناشىرى ق.ورمانوۆ, جانگەلدين اۋدانى اكىمىنىڭ ەكونوميكا جونىندەگى ورىنباسارى د.سەرىك ۇلى, №9 ورتا مەكتەپ ديرەكتورى ءا.مولداحالىقوۆ جانە وبلىستىق تىلدەردى دامىتۋ باسقارماسىنىڭ وكىلدەرى قاتىسىپ, جىلى لەبىزدەرىن ءبىلدىردى.
وسى شاراعا وراي اقىنعا ارنالعان ادەبي كەش ءوتتى. مەكتەپتە بادەش اپايدىڭ باستاماسىمەن جانە ونىڭ ىزدەنۋىمەن, كومەگىمەن عافۋدىڭ مۋزەيى جاساقتالعان ەدى. كەشكە قاتىسۋشىلار وسى مۋزەيدى ارالاپ كوردى, ءبىلىم وشاعىنىڭ ونەرلى بالالارى قويعان كونتسەرتتى تاماشالادى.
ءنازيرا جارىمبەتوۆا
«ەگەمەن قازاقستان».
قوستاناي.