تازالىق ايلىعى باستالدى

وتكەن سەنبى كۇنى ­وبلىس ورتالىعىن قوقىستان جاپپاي تازالاۋ جۇمىسى باستالىپ تا كەتتى. قالانىڭ 10-شاعىن اۋدانى, ەت كومبيناتى بولىگى, دەركول مەن زاچاگان كەنتىن بايلانىستىراتىن اينالما جول, جەلاەۆ جولى بويى تازالاندى. ءىس-شارالارعا ءبىر مىڭنان استام ادام, ستۋدەنتتەر, جاستار, مەملەكەتتىك قىزمەتشىلەر, ۇكىمەتتىك ەمەس ۇيىمدار اتسالىستى. ءبىلىم بەرۋ ۇيىمدارى, دەنساۋلىق ساقتاۋ مەكەمەلەرى, بيزنەس نىساندارى, كاسىپورىندار, كوپقاباتتى, جەكە سەكتورداعى تۇرعىن ءۇي يەلەرى وزدەرىنە قاراستى اۋماقتى جينادى. سەنبىلىك اياسىندا قالا اۋما­عىندا ءبىر كۇندە 400 توننا قوقىس قالدىعى شىعارىلدى.

– ءبىز قالا تازالىعىن ۇيىم­داستىرۋدى بىرنەشە باعىتقا ءبولىپ قولعا الدىق. قازىر اكىمدىكتىڭ ءبولىم ماماندارى قالانىڭ ءار ۋچاسكەسىندەگى بيزنەس نىسانداردى ارالاپ, ءوز اۋماعىن تازالاۋ جو­نىندە رەسمي حابارلاما تاراتىپ جاتىر. سانيتارلىق تازالىق ايلىق اياسىندا جاسايتىن جۇمىس كولەمى ناقتى جوسپارلانعان, – دەيدى ورال قالاسى اكىمىنىڭ ورىنباسارى جاندوس دۇيسەنعاليەۆ.

وسى جوسپارعا سايكەس, الداعى 5, 26 ساۋىردە وتەتىن سەن­بى­لىكتەر – كوشەت وتىرعىزۋ, تال-تەرەكتىڭ ءتۇبىن اكتەۋ, گۇل­زارلاردى قالپىنا كەلتىرۋ اپتا­لىعى بولماق. ورال قالا­سىندا 57 سكۆەر مەن ساياباق بار. ولاردىڭ ارقايسىسىنا وبلىس ورتالىعىنداعى دەپارتامەنتتەر مەن باسقارمالار جاۋاپتى بولىپ بەكىتىلگەن. ءار باسقارما وزىنە قاراستى اۋماقتى اباتتاندىرۋعا ءازىر.

جاندوس اسحات ۇلىنىڭ اي­تۋىن­شا, 19 ساۋىردە «تازا جاعالاۋ» ءىس-شاراسى وتەدى. ورال قالاسىن وراپ جاتقان دەركول, شاعان, جايىق وزەن­دەرىنىڭ جاعالاۋى تازالانادى. بۇل شاراعا دا ءتۇرلى مەكەمە, ۇيىم قىزمەتكەرلەرى جۇمىلدىرىلادى.

ءبىر ايتا كەتەرلىگى, ساني­تار­لىق-ەكولوگيالىق ايلىق ۋاقىتىندا سەنبى كۇندەرى ورال-ساراتوۆ تاس جولى بويىنداعى, اسان اۋىلىنىڭ ماڭىنداعى پوليگوندار تۇرعىنداردان كۇل-قوقىستى تەگىن قابىلدايتىن بولدى. ياعني جەكە اۋلاسى بار تۇرعىندار قىس بويى جينالىپ قالعان كوڭ-قوقىسىن ارنايى ورىندارعا تەگىن توگىپ كەتە الادى.

بۇگىندە ورال قالاسىنىڭ تازالىعىن كۇتىپ-ۇستاۋ تەندەر ناتيجەسىندە «جايىق تازا قالا» مەكەمەسىنە تاپ­سىرىلعان. كومپانيا 2026 جىلدىڭ سوڭىنا دەيىن قىزمەت كورسەتپەك. سونىمەن قاتار ءىرى گاباريتتى قالدىقتاردى شىعارۋعا «ستروي كومپاس» جشس دا اتسالىسادى.

«قالا اكىمدىگى قالا اۋما­عىندا كونتەينەر الاڭدارىن سالىپ, جاڭا ەۋروكونتەينەرلەر ساتىپ الۋ جۇمىسىن جالعاستىرىپ كەلەدى. بيىل جەرگىلىكتى بيۋدجەت قاراجاتى ەسەبىنەن 1 000 دانا ەۋروكونتەينەر الىنىپ, قاتتى تۇرمىستىق قالدىقتارعا ارنالعان 80-گە جۋىق جاڭا الاڭ جاسالاتىن بولادى», دەيدى ج.دۇيسەنعاليەۆ.

ورال قالاسىندا اباتتاندىرۋ ەرەجەسىن ساقتاۋ, بۇزۋشىلىققا جول بەرمەۋ ماقساتىندا قالالىق تۇر­عىن ءۇي كوممۋنالدىق شا­رۋاشىلىق بولىمىنە قاراستى مونيتورينگتىك توپ قۇرىلعان. توپ قۇرامىنداعى 15 ادام قالا اۋماعىندا كۇندە­لىكتى مونيتورينگ جۇرگىزىپ وتىرادى. توپتىڭ جۇمىسى وتە ناتيجەلى, 2025 جىلدىڭ باسىنان بەرى عانا ەرەجە بۇزۋشىلىقتى جويۋ جونىندە 1 188 حابارلاما بەرىلگەن.

قورشاعان ورتانى كۇتىپ ۇستاۋ, تازالىق ساقتاۋ – ار­كىمنىڭ مىندەتى. سوندىقتان مەكەمە, ۇيىمدار, اسىرەسە بيزنەس نىساندارى, كوممەرتسيالىق ۇيىمدار, قۇرىلىس مەكەمەلەرى وزدەرىنە تيەسىلى اۋماقتى رەتكە كەلتىرىپ, كۇل-قوقىستان تازالاۋ, اباتتاندىرۋ ىسىنە بەلسەندى قاتىسۋعا ءتيىس. سونداي-اق پيك, ميب, جس سياقتى كوپپاتەرلى ۇيلەردى باسقارۋشى نىساندار دا تازالىق ايلىعىنا ءبىر كىسىدەي قاتىسىپ, تۇرعىندار ءوز اۋلاسىندا, كوپقاباتتى ۇيلەردە سەنبىلىك ۇيىمداستىرىپ جاتىر.

باتىس قازاقستان وبلىسى