قوعامنىڭ قوزعاۋشى كۇشىنە اينالعان جاستارعا بيلىك تاراپىنان بارىنشا قولداۋ كورسەتىلىپ كەلە جاتقانى بەلگىلى. ويتكەنى ولار قاي ىستە دە بەلسەندىلىگىمەن دارالانادى. جانارىندا جالىنى لاۋلاعان جاستار قامقورلىقتان تىس قالعان ەمەس.
ءوڭىر حالقىنىڭ 29,1 پايىزىن جاستار قۇراپ وتىر. تسيفرمەن سويلەتسەك, جامبىل وبلىسى تۇرعىندارىنىڭ 355 مىڭنان استامىن 14-35 جاستاعى بۋىن قۇرايدى ەكەن. كەيىنگى جىلدارى وڭىردە جاستار ساياساتىنا ايرىقشا قولداۋ كورسەتىلىپ جاتىر. سودان دا بولسا كەرەك, جاڭاشىل بۋىن قولدان كەلگەنشە جارقىن ىستەرگە باستاماشىل بولىپ ءجۇر.
ء«بىزدىڭ وڭىردە جاستار اراسىنداعى جۇمىسسىزدىقپەن كۇرەسكە ايرىقشا باسىمدىق بەرىلگەنىن ايتپاي كەتۋگە بولماس. ءتۇرلى دەڭگەيدە كورسەتىلگەن قولداۋ ارقىلى وتكەن جىلدىڭ ەكىنشى توقسانىندا جۇمىسسىز جاستار سانى 3,5 پايىزدى قۇراعان بولسا, بۇل كورسەتكىش جىل ىشىندە 0,7 پايىزعا ازايدى. ناقتىراق ايتار بولساق, ەكى قولعا ءبىر كۇرەك تاپپاي جۇرگەن زامانداستارىمىزدىڭ قاراسى 9 134-تەن 7 100-گە ازايعان. بۇل باعىتتاعى جۇمىس الداعى ۋاقىتتا دا جالعاسادى», دەيدى وبلىستىق جاستار رەسۋرستىق ورتالىعىنىڭ ديرەكتورى ايبەك قادىراليەۆ.
ورتالىق باسشىسى كەلتىرگەن دەرەككە جۇگىنسەك, ۋاقىتشا بوس جۇرگەن جاستاردىڭ ۇلەس سالماعى دا ايتارلىقتاي ازايىپتى. ناقتىراق ايتساق, وتكەن جىلدىڭ ەكىنشى توقسانىندا NEET ساناتىنا ەنگەن جاستاردىڭ سانى 23 351 ادامدى قۇراعان بولسا, وسى جىلدىڭ ەكىنشى توقسانىندا بۇل كورسەتكىش ءبىرشاما ازايعان كورىنەدى.
«مەملەكەتتىك ساياساتتىڭ باسىم باعىتتارىنىڭ ءبىرى – جاستاردى جۇمىسپەن قامتۋ. وسى ورايدا جەرگىلىكتى اتقارۋشى بيلىك تاراپىنان بولىنگەن قاراجات ەسەبىنەن 35 جاسقا دەيىنگى 21 080 جاس جۇمىسپەن قامتۋدىڭ بەلسەندى شارالارىنا تارتىلعانىن ايتا كەتكەن ءجون. جالپى, جىلداعى داستۇرگە سايكەس جاستارعا ارنالعان بوس جۇمىس ورىندارىنىڭ جارمەڭكەلەرى تۇراقتى تۇردە ۇيىمداستىرىلادى. ماسەلەن, وسى جىلدىڭ باسىنان بەرى 102 بوس جۇمىس ورىندارىنىڭ جارمەڭكەسى وتكىزىلدى. وعان 2 108 جۇمىس بەرۋشى مەكەمە قاتىسىپ, 5 291 بوس جۇمىس ورىندارى ۇسىنىلدى. ءىس-شاراعا 6 مىڭعا جۋىق جاستار قاتىستى. ولاردىڭ قاتارىندا NEET ساناتىنداعى جانە پروباتسيا قىزمەتى ەسەبىندە تۇرعان زامانداستارىمىز دا بار», دەيدى ا.قادىراليەۆ.
جاۋاپتى ورتالىق باسشىسى كەلتىرگەن مالىمەتكە سۇيەنسەك, وتكىزىلگەن جارمەڭكەلەردىڭ قورىتىندىسىندا 156 جاس اقىلى قوعامدىق جۇمىسپەن قامتىلعان. سونداي-اق 18 ازامات الەۋمەتتىك ساناتتاعى جۇمىس ورىندارىنا ورنالاسسا, 240 ازامات «جاستار تاجىريبەسى» باعدارلاماسى ارقىلى جۇمىس ىستەۋگە مۇمكىندىك العان. بۇعان قوسا, 281 جاس تۇراقتى جۇمىس ورىندارىنا ورنالاسىپتى.
«وسى جىلى جاستاردى ماۋسىمدىق جۇمىسپەن قامتۋعا جانە ەكولوگيالىق مادەنيەتتى قالىپتاستىرۋعا باعىتتالعان «جاسىل ەل» جوباسىنا جەرگىلىكتى قازىنادان 173,5 ملن تەڭگە قاراجات قاراستىرىلدى. بولىنگەن قارجى ەسەبىنەن 2 مىڭ جاستى ماۋسىمدىق جۇمىسپەن قامتۋ مۇمكىندىگى تۋدى. «جاسىل ەل» جاستار ەڭبەك جاساقتارى جوباسى دەر كەزىندە ءوز جۇمىسىن باستاپ, تاراز قالاسى مەن اۋدانداردا جالپى سوماسى 155,2 ملن تەڭگەگە 1 789 جاس ماۋسىمدىق جۇمىستارعا تارتىلعانىن ايتا كەتكەن ءجون. ونىڭ ىشىندە 94-ءى ۋاقىتشا بوس جۇرگەن جاستار بولسا, 23-ءى – پروباتسيا تىزىمىندە تۇرعان جاستار», دەيدى ورتالىق باسشىسى.
وڭىردە بىرنەشە جىل دەربەس باسقارما رەتىندە جۇمىس ىستەگەن جاستار ساياساتى ماسەلەلەرى باسقارماسى وسى جىلى وبلىستىق اقپارات جانە قوعامدىق دامۋ باسقارماسىنىڭ قاناتىنىڭ استىنا ءوتتى. دەرەككە سەنسەك, بۇگىنگە دەيىن جاستار اراسىندا 10 500 ءىس-شارا ۇيىمداستىرىلعان.
كەيىنگى ۋاقىتتا جاستار اراسىندا ءتۇرلى شىعارماشىلىق بايقاۋ ۇيىمداستىرىلىپ كەلە جاتقانىن دا ايتا كەتكەن ءجون. «اۋليەاتا ۇزدىگى», «جاس ساق» سەكىلدى ءىرى دودالار سوزىمىزگە دالەل بولا السا كەرەك. بۇعان قوسا, بىرنەشە جىلدىڭ بەدەرىندە وڭىردە «اۋليەاتا جاستارى» باعدارلاماسى اياسىندا سان سالادا ەڭبەك ەتىپ كەلە جاتقان جاستار باسپانالى بولىپ جاتىر. باياندى باستاما وسى جىلى دا جالعاسادى. جىل اياعىنا دەيىن ونداعان جاس وتباسى تۇرعىن ءۇي كىلتىنە يە بولماق.
جامبىل وبلىسى