مەملەكەت باسشىسىنىڭ تاپسىرماسىنا سايكەس وڭىرگە شەتەلدىك ينۆەستورلاردى تارتۋ جۇمىسى جامبىل جەرىندە جۇيەلى تۇردە جالعاسىپ كەلەدى. اسىرەسە وڭىردە ءوندىرىستى وركەندەتۋ بويىنشا اۋىز تولتىرىپ ايتارلىقتاي شارۋالار اتقارىلىپ جاتىر. مۇنى اۋىل شارۋاشىلىعى, حيميا ونەركاسىبى مەن ەنەرگەتيكا سالاسىنان دا بايقاۋعا بولادى.
تاياۋدا قۇرىلىسى بىلتىر باستالعان قورداي اۋدانىنداعى «Korcem» تسەمەنت زاۋىتىنىڭ وندىرىستىك جەلىسى پايدالانۋعا بەرىلدى. ورتا ازياداعى زاماناۋي ءارى قالدىقسىز ءونىم شىعاراتىن ىرگەلى زاۋىت تاۋلىگىنە 3 500 توننا تسەمەنتكە قاجەتتى كلينكەر شيكىزاتىن وندىرۋگە قاۋقارلى. مامانداردىڭ ايتۋىنشا, سينگاپۋرلىق «Internetional Cement Group LTD» كومپانياسىمەن ءوزارا ىنتىماقتاستىق ناتيجەسىندە بوي كوتەرگەن زاۋىتتىڭ كەلەشەگى جارقىن.
«قازاقستان, ونىڭ ىشىندە جامبىل ءوڭىرى شەتەلدىك ينۆەستورلارعا قولدان كەلگەنشە قولداۋ كورسەتىپ وتىر. بۇگىنگە دەيىن وڭىردە قولعا العان جوبالارىمىز جەمىستى بولعانىن ايتا كەتكەن ءجون. بىرلەسە اتقارعان ءتيىمدى جۇمىس ارقىلى كوڭىل كونشىتەرلىك ناتيجەگە قول جەتكىزدىك. قوڭىرجاي بەلدەۋدە ورنالاسقان قورداي اۋدانىنىڭ تابيعي رەسۋرسقا باي ەكەنىن ءبارىمىز جاقسى بىلەمىز. شەكارالىق ايماقتا ورنالاسقان اۋدان ورتالىق ازياداعى ەكسپورتتىق الەۋەتىمىزدىڭ ەسەلەنە تۇسۋىنە مۇمكىندىك بەرەدى. مۇنى كومپانيا وكىلدەرىنىڭ الدىن الا جاساعان بولجامى دا ايقىنداپ وتىر. سوندىقتان «Internetional Cement Group LTD» ۇجىمى الداعى ۋاقىتتا وڭىردەگى جەمىستى جۇمىستى جالعاستىرىپ, جاڭا جۇمىس ورىندارىن قۇرۋعا نيەتتى. سونداي-اق قازاقستانعا وزگە دە شەتەلدىك ينۆەستورلاردى تارتۋعا كۇش سالامىز», دەيدى كومپانيانىڭ اتقارۋشى ديرەكتورى بەندجامين چەن.
زاۋىت باسشىلىعى العاشقى كەزەڭدە 500 ادامدى تۇراقتى جۇمىسپەن قامتۋعا بەل بۋىپ وتىر. كاسىپورىن تولىق قۋاتپەن جۇمىس ىستەگەن كەزدە تۇراقتى جۇمىسپەن قامتىلعان ازاماتتار سانى 1 000-عا جەتپەك. رەسمي دەرەككە سەنسەك, زاۋىتتىڭ جالپى قۇنى 50 ملرد تەڭگەنى قۇرايدى. جاۋاپتى ازاماتتاردىڭ ايتۋىنشا, زاۋىت الداعى جىلدارى ەلىمىزدەگى تسەمەنت ءوندىرىسىنىڭ 35 پايىزىن قامتيتىن كورىنەدى.
«مۇنداعى ىسكە قوسىلعان قازاندىق بولىگى ءوندىرىس وشاعىنىڭ نەگىزگى تەتىگى ەكەنى ءمالىم. ول تسەمەنت وندىرىسىنە قاجەت سانالاتىن كلينكەر شيكىزاتىن وندىرەدى. قازىرگى كەزدە ەلدە قۇرىلىس جۇمىستارىنىڭ اۋقىمى ارتا تۇسكەنى بەلگىلى. بۇدان بولەك, تاياۋدا عانا اەس سالۋ بويىنشا ناقتى شەشىم قابىلدانعان بولاتىن. مۇنىڭ ءبارى ونىمگە دەگەن سۇرانىستى ارتتىراتىنى انىق. بىزگە جەتكەن دەرەككە سەنسەك, ءوڭىر جەراستى قازبا بايلىقتارى جونىنەن ەلدەگى ۇزدىك ۇشتىككە كىرەدى ەكەن. وسىعان قاراپ-اق ءبىزدىڭ كاسىپورىننىڭ مۇمكىندىگى مول ەكەنىن باعامداۋعا بولادى. بولاشاقتا شيكىزاتتان بولەك, بەتون بۇيىمدارىن شىعارۋعا دا نيەتتەنىپ وتىرمىز», دەيدى «Korcem» جشس اتقارۋشى ديرەكتورى ستانيسلاۆ ششەرباكوۆ.
زاۋىت قۇرىلىسىن جۇزەگە اسىرۋعا ىقپال ەتكەن سينگاپۋرلىق كومپانيا وكىلدەرى جەرگىلىكتى اتقارۋشى بيلىك تاراپىنان ايتارلىقتاي كولداۋ كورسەتىلگەنىن ايتىپ وتىر. سونداي-اق ولاردى ءوڭىردىڭ گەولوگيالىق احۋالى دا بەيجاي قالدىرماعان. دەرەككە جۇگىنسەك, «Internetional Cement Group LTD» كومپانياسى 1993 جىلدان بەرى تسەمەنت نارىعىندا جەمىستى جۇمىس ىستەپ ءجۇر. قازىر ءبىزدىڭ ەلدەن بولەك, ورتالىق ازياداعى تاجىكستاندا ەنشىلەس كومپانيالارى بار.
«ەل پرەزيدەنتىنىڭ تاپسىرماسى اياسىندا وڭىرىمىزدە بىرنەشە ءىرى ينۆەستيتسيالىق جوبا جۇزەگە اسىرىلىپ جاتىر. كلينكەر شيكىزاتىن وندىرەتىن ءوندىرىس جەلىسىنىڭ مەجەلى مەرزىمدە ىسكە قوسىلۋى – اتقارىلعان جۇمىستىڭ ناقتى ناتيجەسى. بولاشاقتا تاعى ءبىر سينگاپۋرلىق كومپانيامەن وسى سەكىلدى زاۋىت قۇرىلىسىن جۇرگىزۋ بويىنشا جۇمىستى قولعا الدىق. بۇل زاۋىت جىلىنا 1,5 ملن توننا شيكىزات وندىرەدى. ءونىم ىشكى نارىقتى قامتىپ قانا قويماي, ەكسپورتتىق الەۋەتىمىزدى كوتەرۋگە دە مۇمكىندىك بەرەدى. قالاي الىپ قاراساق تا, ءوڭىرىمىز ۋاقىت وتكەن سايىن قارقىندى دامىپ كەلەدى. سوندىقتان ينفراقۇرىلىمدىق كەشەن ءۇشىن قۇرىلىس ماتەريالدارىنا دەگەن سۇرانىس ۋاقىت وتكەن سايىن ارتا تۇسپەك. وسى تۇرعىدان العاندا كاسىپورىننىڭ تيگىزەر پايداسى زور», دەيدى ءوڭىر باسشىسى ەربول قاراشوكەەۆ.
جالپى العاندا, وڭىرگە شەتەلدىك ينۆەستورلاردى تارتۋ جۇمىسى الداعى ۋاقىتتا كەشەندى تۇردە جالعاسادى. قازىر وبلىستىڭ ينۆەستيتسيالىق قورجىنىندا جالپى قۇنى 3,4 ترلن تەڭگەنى قۇرايتىن 80-گە جەتەعابىل جوبا بار. بۇل جوبالار ىسكە اسقان جاعدايدا 4 مىڭنان استام ادام تۇراقتى جۇمىس ورنىمەن قامتىلماق.
جامبىل وبلىسى