مەملەكەت باسشىسى قازاقستان حالقىنا ارناعان جولداۋىندا الداعى دامۋ كەزەڭىمىزگە بايلانىستى ەل الدىنا كوپتەگەن جاڭا مىندەت قويدى. اسىرەسە پرەزيدەنت ەلىمىزدىڭ كادرلىق الەۋەتىن بىرتىندەپ ارتتىرۋ وتە ماڭىزدى ەكەنىن ايتا كەلىپ, 2025 جىلدى «جۇمىسشى ماماندىقتار جىلى» دەپ جاريالاعانى – وسى سالادا ەڭبەك ەتىپ جۇرگەن قانشاما جۇمىسشى ماماننىڭ ەڭسەسىن ءبىر كوتەرىپ تاستادى.
بۇل جاعىمدى جاڭالىققا كاسىپتىك-تەحنيكالىق مامانداردى دايارلايتىن وقۋ ورىندارىنىڭ ۇجىمى دا قاتتى قۋانىپ وتىر. قازىر وقۋ ورىندارى جۇمىسشى ماماندىعىن جۇمىس بەرۋشىمەن بىرگە دايارلايدى. مۇنىڭ ناتيجەسى وتە جاقسى. ەندى مەملەكەت باسشىسىنىڭ وسى جولداۋىنان كەيىن جۇمىسشى مامانداردى دايارلايتىن ءبىلىم مەكەمەلەرى مەن جۇمىس بەرۋشىلەر اراسىنداعى بايلانىس, ىنتىماقتاستىق ودان ءارى بەكي تۇسەرى انىق. شىنىندا دا, ءبىر جىلدارى جۇمىسشى ماماندىعىنىڭ بەدەلى كۇرت تومەندەپ كەتكەن ەدى. قازىرگى ۋاقىت تالابى باسقا. سونى اتا-انالار مەن جاستار دا ءتۇسىندى. بۇگىندە جوعارى سىنىپ وقۋشىلارى اراسىندا جۇمىسشى ماماندىققا دەگەن قىزىعۋشىلىق ارتىپ وتىر. دەگەنمەن بۇل ماماندىق يەلەرىن دارىپتەۋ قوعامدا ءالى دە كەمشىن سەكىلدى كورىنەدى. سوندىقتان ەڭبەك مايتالماندارىن كوبىرەك ناسيحاتتاپ, جاستاردى ادال ەڭبەك ەتۋگە ۇيرەتسەك, ۇتارىمىز كوپ. ونى ءبىلىم ۇيىمدارى, اتا-انا جانە جۇمىس بەرۋشى مەكەمە – ۇشەۋى بىرلەسىپ جۇرگىزگەنى دۇرىس.
كەلەسى جىلعى «جۇمىسشى ماماندىقتار جىلى» اياسىندا ءبىراز جوبا قولعا الىنىپ, ەلدىڭ كوڭىلىنەن شىعاتىن يگىلىكتى ىستەر اتقارىلادى دەپ سەنەمىز. اسىرەسە كاسىپتىك-تەحنيكالىق كوللەدجدەردەگى دۋالدى وقىتۋدى قارجىلاندىرسا, ءبىراز دۇنيە العا باسار ەدى.
دۋالدى وقىتۋدىڭ ءبىر ەرەكشەلىگى – تەوريانى وندىرىسپەن ۇشتاستىرادى. وسى باعدارلاما شەڭبەرىندە وقۋ مەكەمەسى جۇمىسشى مامانداردى جۇمىس بەرۋشى بىرىگىپ دايارلايدى. ماسەلەن, ستۋدەنت ءوز ءبىلىمىن 60 پايىز تاجىريبەمەن, 40 پايىز تەوريامەن جەتىلدىرەدى. ياعني جۇمىس بەرۋشى ۇيىم تاجىريبە بارىسىندا ستۋدەنتتى وزدەرى ۇسىنعان ماماندىق بويىنشا دايارلايدى. بۇل – وتە جاقسى. الايدا تاجىريبەدەن ءوتىپ جۇرگەن ستۋدەنتكە تالىمگەردىڭ دە بەرەرى مول. بىراق سولاردىڭ ەڭبەگى كوپ جاعدايدا ەلەۋسىز قالا بەرەدى. سوندىقتان تالىمگەرلەردى ىنتالاندىرۋ ءۇشىن ولارعا دا قارجى ءبولىنۋى كەرەك.
الەمنىڭ ەكىنشى ۇستازى اتانعان ءابۋ ناسىر ءال-فارابي بابامىز «تاربيەسىز بەرىلگەن ءبىلىم – تۇل» دەپ بەكەر ايتپاعان. ساپالى بىلىممەن بىرگە ءتالىم-تاربيە دە قاتار ءجۇرۋى قاجەت. قازىر ءبىلىم بەرۋ سالاسىندا ء«بىرتۇتاس تاربيە» دەگەن باعدارلاما بار, سوندا جاستاردى ەڭبەككە باۋلۋ, وتانسۇيگىشتىككە تاربيەلەۋ, ەڭبەك ادامدارىنا قۇرمەتپەن قاراۋ سەكىلدى ىزگى ۇعىمدار انىق جازىلعان. قازىر ءبىزدىڭ كوللەدج وسى باعىتتا ءبىراز ءىس-شارا اتقاردى.
پرەزيدەنت جولداۋىندا كاسىپتىك ءبىلىم سالاسىنا رەفورما جاساۋ – ايرىقشا وزەكتى ماسەلە ەكەنىن جەتكىزدى. بۇل وسى سالادا ەڭبەك ەتىپ جۇرگەن پەداگوگتەردىڭ ءبىلىمى مەن بىلىكتىلىگىن دامىتۋعا, جەتىلدىرۋگە سەرپىن بەرەدى. سونىمەن قاتار كاسىپتىك-تەحنيكالىق وقۋ ورىندارىنىڭ ماتەريالدىق- تەحنيكالىق بازاسىن جاقسارتۋعا دا سەپتىگى تيەدى دەپ سەنەمىز. اسىرەسە وسى سالادا قىزمەت ىستەپ جۇرگەن پەداگوگتەردىڭ ەڭبەكاقىسىن كوتەرۋگە, وقۋ قۇرالدارىمەن قامتاماسىز ەتۋگە, وقۋ ورىندارىنىڭ بازاسىن جاڭعىرتۋعا قارجى بولىنسە, سالاداعى ءبىراز تۇيتكىلدى ماسەلەلەر وڭ شەشىمىن تابادى.
قازىر ەلىمىزدە جۇمىسشى ماماندىعىندا وقيتىن ستۋدەنتتەر تولىقتاي تەگىن ءبىلىم الادى. ماسەلەن, جۇمىسشى ماماندىعى جۇمىس بەرۋشىنىڭ سۇرانىسىمەن دايارلانىپ, سوعان سايكەس مەملەكەتتەن گرانت بولىنەدى. جۇمىسشى ماماندىقتارىنا تالاپكەرلەر وقۋعا ەمتيحانسىز قابىلدانادى. سونداي-اق وقۋ-اعارتۋ مينيسترلىگى دۋالدى وقىتۋ باعدارلاماسى بويىنشا ستۋدەنت تاجىريبەسى ەڭبەك وتىلىنە كىرەتىن وزگەرىس ەنگىزدى. وسىنىڭ ءبارى – جۇمىسشى مامانداردى دايارلاۋعا ۇكىمەت تاراپىنان جاسالىپ وتىرعان ۇلكەن قولداۋ.
ءبىر سوزبەن ايتقاندا, مەملەكەت باسشىسىنىڭ حالقىمىزعا ارناعان جولداۋى ەل دامۋىنا جاڭاشا سەرپىن بەرىپ قانا قويماي, جۇمىسشى ماماندىعىنىڭ بەدەلىن كوتەردى.
مىرزابەك كۇجىموۆ,
قازتۇتىنۋوداعى جوعارى كوللەدجىنىڭ ديرەكتورى