بەلگرادتا ساۋدا-ەكونوميكالىق ىنتىماقتاستىق جونىندەگى قازاقستان – سەربيا ۇكىمەتارالىق كوميسسياسىنىڭ III وتىرىسى ءوتتى. قازاقستان دەلەگاتسياسىن پرەمەر-ءمينيستردىڭ ورىنباسارى سەرىك جۇمانعارين باسقاردى.
وتىرىس بارىسىندا سەرب تاراپى 2027 جىلعى 15 مامىر مەن 15 تامىز ارالىعىندا سەربيا استاناسىندا وتەتىن Expo 2027 Belgrade حالىقارالىق مامانداندىرىلعان كورمەسىن وتكىزۋ تۋرالى ايتتى.
ءوز كەزەگىندە «QazExpoCongress» ۇك» اق باسقارما توراعاسى دياس ازبەرگەنوۆ Expo 2017 Astana كورمەسى تۋرالى ايتىپ, قاتىسۋشىلاردى كورمە كەشەنىنىڭ اعىمداعى مارتەبەسىمەن تانىستىردى.
«EXPO كورمە كەشەنىنىڭ اۋماعى – بۇل ۇلتتىق جانە حالىقارالىق ۇيىمداردىڭ تابىستى قىزمەتى ءۇشىن بىرەگەي ەكوجۇيە قالىپتاستىرىلعان ىسكەرلىك ورتالىق. بۇگىنگى تاڭدا كەشەن 100% تولىق. ۇيىمداردىڭ سانى 150-دەن اسادى, رەزيدەنتتەردىڭ جالپى سانى 15 مىڭ ادامدى قۇرايدى», دەپ اتاپ ءوتتى د. ازبەرگەنوۆ.
EXPO الاڭىنىڭ ىسكەرلىك بولىگى جالپى اۋدانى 530 مىڭ م²-دەن اساتىن 15 عيماراتتان تۇرادى. عيماراتتاردا «استانا» حالىقارالىق قارجى ورتالىعى, Astana Hub IT-ستارتاپتار حالىقارالىق تەحنوپاركى جانە Astana IT University سياقتى ۇيىمدار ورنالاسقان. سونداي-اق تسيفرلىق ۇكىمەت ءوفيسى, قارجىلىق مونيتورينگ اگەنتتىگى, ستراتەگيالىق جوسپارلاۋ جانە رەفورمالار اگەنتتىگى جۇمىس ىستەيدى. بۇدان بولەك اۋماقتا كونگرەسس ورتالىعى, EXPO حالىقارالىق كورمە ورتالىعى, بولاشاق ەنەرگياسى مۇراجايى سياقتى ماڭىزدى نىساندار دا بار.
د.ازبەرگەنوۆ ءسوزىن قورىتىندىلاي كەلە, «QazExpoCongress» ۇلتتىق كومپانياسى كورمەلەردى وتكىزۋ جانە وعان قاتىسۋ تاجىريبەسىمەن الماسۋ, سونداي-اق ونى كورمەدەن كەيىنگى پايدالانۋعا قاتىستى ىنتىماقتاستىققا دايىن ەكەنىن اتاپ ءوتتى.
سونىمەن قاتار كەزدەسۋ اياسىندا تاراپتار سەربيا مەن قازاقستاندا وتكىزىلەتىن ءتۇرلى كورمەلەر ماسەلەسىن تالقىلادى, ولار ەكى ەلدىڭ كومپانيالارىنا وزدەرىن سەرب جانە قازاقستاندىق نارىقتاردا كورسەتۋگە سەپتىگىن تيگىزەتىنىن اتاپ ءوتتى. مۇنداي ءىس-شارالار ەكى ەلدىڭ ەكونوميكاسىن الەمدىك ەكونوميكالىق جانە ساۋدا اعىندارىنا نەعۇرلىم تىعىز بايلانىستىرۋ ءۇشىن كومپانيالاردىڭ ەكسپورتتىق جانە ينۆەستيتسيالىق كورسەتكىشتەرىن كۇشەيتۋگە مۇمكىندىك بەرەدى.
«QazExpoCongress» ۇك» اق ماركەتينگ جانە PR دەپارتامەنتى