ءبىر جاعى ءبىلىم سالاسىندا جۇرگەندىكتەن بولار, مەملەكەت باسشىسىنىڭ حالىققا قاراتىپ ايتقان بارلىق جولداۋىنان حاباردارمىز دەسەك تە بولادى. بىراق وسى ۇندەۋدەگى كوكەيىمنەن شىققان سوزدەردى قۇزىرلى ورىندار تىڭداپ, كەلەلى شەشىمدەر قابىلداسا ەكەن دەگەن تىلەكپەن, ءۇنسىز قالا المادىم.
ەندى سولاردىڭ كەيبىرەۋلەرىنە ءىشىنارا توقتالا كەتسەم, پرەزيدەنت: «مەملەكەت قارجىسىنىڭ تۇراقتىلىعىن قامتاماسىز ەتۋدىڭ بىردەن ءبىر جولى – كورپەگە قاراي كوسىلۋ. سوندىقتان بيۋدجەت قاراجاتىن ستراتەگيالىق ماڭىزى جوق, اسا شۇعىل ەمەس شارۋالارعا وڭدى سولدى شاشۋدى دوعارۋ كەرەك», دەدى. تولىقتاي كەلىسەمىن. ماسەلەن, الماتى قالاسىندا ءبۇپ-ءبۇتىن تۇرعان اسفالت جولداردى, جيەكتاستاردى (بورديۋرلەر), بەتون ارىقتاردى قيراتىپ, قايتادان سالىپ جاتادى. جىلدا كورەتىنىمىز وسى كورىنىس. ەسەسىنە ءدال قازىر الماتىنىڭ ىرگەسىندە, قالا شەكاراسىنان ءبىر شاقىرىم جەردەگى قاراساي اۋدانى جاڭاتۇرمىس اۋىلىندا جىلدار بويى جولدارى اسفالتتالماي كەلەدى. اۋىل تۇرعىندارى وسىنىڭ سەبەبى نەدە ەكەنىن تۇسىنبەۋمەن كەلەدى.
سونىمەن بىرگە مەملەكەت باسشىسىنىڭ: ء«ىرى كاسىپ يەلەرى وسى ەلدىڭ ازاماتى رەتىندە ەل يگىلىگىنە جارايتىن مەكتەپ, اۋرۋحانا, ستاديون, مۋزەي جانە باسقا دا الەۋمەتتىك-مادەني نىساندار سالۋعا قوماقتى قارجى بولۋگە مىندەتتى. مۇنداي كاسىپكەرلەردىڭ ەسىمى جومارت جانداردىڭ «التىن تىزىمىنە» جازىلادى. ال ودان باس تارتقان نەمەسە سوزبۇيداعا سالعان كاسىپكەرلەرگە قاتىستى اڭگىمە باسقاشا بولادى», دەگەن ءسوزى دە كوكەيگە قوندى.
پرەزيدەنت اگروونەركاسىپ كەشەنىن دامىتۋعا بايلانىستى تىڭ ويلارىن ايتتى. وتە ورىندى. ماسەلەن, اۋىل شارۋاشىلىعىن دامىتۋعا بولىنگەن سۋبسيديانى شىن مانىندە دالا توسىندە ەڭبەكتەنىپ جاتقاندار ەمەس, شەنەۋنىكتەرمەن جەڭ ۇشىنان جالعاسقان پىسىقاي دەلدالداردىڭ الىپ كەتەتىنى تۋرالى ءىشىنارا ەستىپ قالامىز.
وسى تۇرعىدا ءبىزدىڭ كافەدرانىڭ عالىمدارى دا اۋىل شارۋاشىلىعىن دامىتۋ ءۇشىن قاجەتتى, ماڭىزدى عىلىمي جوبالارمەن اينالىسىپ جاتقانىن ايتقىم كەلەدى. اتاپ ايتقاندا, ءتۇرلى اۋىل شارۋاشىلىعى داقىلدارىنىڭ, وزگە دە وسىمدىكتەردىڭ (مىسالى, سەكسەۋىل) ۇرىقتارىن پوليمەر ۇلدىرمەن وراۋ ارقىلى العاشقى ەگىلگەن كەزدە ولاردىڭ ءتۇرلى زيانكەستەرگە, تابيعي سىناقتارعا توتەپ بەرۋىنە قول جەتكىزۋگە بولادى. ايتپەسە, بۇگىنگى تاڭدا دۇكەندەردە ساتىلاتىن كوكونىس ۇرىقتارىنىڭ بارلىعى دەرلىك وزگە ەلدەردەن كەلگەن.
پرەزيدەنتتىڭ «اۋىل تۇرعىندارىنا ءوز ونىمدەرىن وڭدەۋگە جانە ساتۋعا مۇمكىندىك بەرەتىن ينفراقۇرىلىم قۇرۋ وتە ماڭىزدى» دەگەن ءسوزى دە كوڭىلدەن شىقتى. ويتكەنى, استىق وندىرۋشىلەردىڭ كۇزدە ءوز ونىمدەرىن ساتا المايتىنى جونىندە ءجيى ەستيمىز. ال ءدال سول كەزدە جەردە ءبىر كۇن دە جۇمىس ىستەمەگەن, جەڭ ۇشىنان جالعاسىپ, مەملەكەتتەن شەت ەلگە استىق ساتۋعا ليتسەنزيا العان پىسىقتار استىقتى ديحانداردان بارىنشا ارزان باعاعا ساتىپ الىپ, سىرت مەملەكەتتەرگە ۇستەمە باعامەن ساتادى ەكەن. وسىدان كەيىن ماڭداي تەرى اقتالمايتىن قاراپايىم ەڭبەك ادامىنىڭ جۇمىس ىستەۋگە قايدان زاۋقى بولادى؟
مەملەكەت باسشىسى مۇناي-گاز-حيميا سالاسىن ودان ءارى دامىتۋ – ماڭىزدى مىندەت ەكەندىگىنە توقتالدى. وسى تۇرعىدا, ءبىزدىڭ كافەدرادا بيوىدىرايتىن پوليمەر ۇلدىرلەر الۋ ءۇشىن عىلىمي ىزدەنىستەر, جۇمىستار جاسالىپ جاتقانىن ايتا كەتكەن ءجون دەپ بىلەمىن.
ءيا, مەملەكەت باسشىسىنىڭ ەكونوميكا, ەكولوگيالىق احۋال, دەنساۋلىق ساقتاۋ, ءبىلىم بەرۋ سالاسى, ەلدە زاڭ مەن ءتارتىپتىڭ ساقتالۋى ت.ب. ماسەلەلەرگە قاتىستى ايتقان ويلارىنىڭ بارلىعى دا قۇپتارلىق.
مەملەكەت باسشىسى جولداۋداعى مىندەتتەردى ورىنداۋعا بار كۇش-جىگەرىمدى سالامىن دەدى. ەندەشە, ءبىز دە ءوز سالامىزدا ناتيجەلى ەڭبەك ەتىپ, ەلىمىزدىڭ دامۋىنا ۇلەسىمىزدى قوسقانىمىز ابزال.
پەريزات ۇركىمباەۆا,
ءال-فارابي اتىنداعى قازۇۋدىڭ دوتسەنتى