جۇمىسشى ماماندىقتارىن قولداۋ ارتادى

شىن مانىندە, ءبىز ينفراقۇرى­لىم مەن ەكونوميكانى دامىتۋ تۋرالى ايتقاندا ەڭ ءبىرىنشى كەزەكتە بىلىكتى مامانداردىڭ جەتىسپەۋشىلىگى دەگەن ماسەلەگە تاپ كەلەمىز. بارلىق سالادا قازىر وسىنداي كورىنىس. سوندىقتان پرەزيدەنت باستاماسى جۇمىسشى ماماندىقتارىنىڭ بەدەلىن كوتەرىپ, ەلگە قاجەتتى كادرلاردى دايارلاۋعا ارنالىپ وتىر.

ايتالىق, بەس جىل بۇرىن جاستارعا كوللەدجدە ءبىلىم الۋ ءۇشىن كوپتەگەن گرانت بولدىك. بىراق بۇل ماسەلەنى شەشتى مە؟ شىنىن ايتۋ كەرەك, جۇمىسشى ماماندىقتارىنا جاستار كوپ قىزىعا بەرمەيدى. ونىڭ بەدەلى ايتارلىقتاي جوعارى ەمەس. ءتىپتى گرانت سانى مەن شاكىرتاقىنىڭ وسكەنىنە قاراماستان, كوللەدجدە وقۋعا ىنتا بىلدىرۋشىلەر قاتارى از. سوندىقتان بۇل جولداۋىندا پرەزيدەنت جۇمىسشى مامان­دىقتارىن قولداۋ تۋرالى ايتتى. ءتىپتى وسى سالانىڭ ۇزدىكتەرىنە ارنالعان مەملەكەتتىك ناگرادالار ەنگىزىلمەك.

جۇمىسشى ماماندىقتارىنا قىزىعۋشىلىقتىڭ تومەندىگىنە ەڭ باستى سەبەپ – جالاقىنىڭ ازدىعى. سالىستىرمالى تۇر­دە ايتساق, ءبىز بۇعان دەيىن مۇعا­لىم­دەردىڭ جالاقىسى تومەن بولعا­نىن بىلەمىز. سونىڭ سالدارىنان بۇل ماماندىققا كوبىنەسە ۇلتتىق بىرىڭعاي تەستىلەۋدە شەك­تى بالدى ارەڭ جيناعان, ياعني ۇلگەرىمى تومەندەۋ تۇلەك­تەر كەلەتىن. ال ولاردان قان­داي ۇستاز شىعادى؟ كەيىن ءبىز سالادا تۇبەگەيلى رەفورما جۇرگى­زىپ, ولاردىڭ جالاقىسىن بىر­نە­شە ەسەگە ءوسىرىپ, قاجەتسىز جۇ­مىستاردان ارىلتقاندا جاعداي مۇلدەم وزگەردى. بۇگىنگى تاڭدا مۇعالىم ماماندىعىنا ءتۇسىپ جات­قان تالاپكەرلەردىڭ ورتاشا جينايتىن بالى 100-دەن اسىپ جىعىلادى. سوندىقتان كەز كەلگەن ماماندىقتىڭ جاستار تاراپىنان قىزىعۋشىلىق تۋدىرۋى ءۇشىن, ەڭ الدىمەن, ونىڭ جا­لاقىسىن كوتەرۋ كەرەك.

بيىل جازدا وڭىرلەردە بول­عانىمىزدا ەلىمىزدە دانە­كەرلەۋشى, كران ءماشينيسى, سۋ جولى قىزمەتكەرى, سلەسار سەكىلدى قاجەت مامانداردىڭ جەتىسپەيتىنىن كوردىك. سەبەبى سول – ولاردىڭ جالاقىسى از. سوندىقتان ول ماماندىقتارعا ەشكىم بارعىسى كەلمەيدى. قا­زىر پارلامەنت تاراپىنان قا­بىلدانعان نورماتيۆتىك-قۇ­قىقتىق بازا بۇل باعىتتا جۇمىس ىستەۋ ءۇشىن جەتكىلىكتى. زاڭدار بار, ەندى اتقارۋشى ورگاندار ءبىز ايتىپ وتىرعان جالاقى ماسەلەسىن كوتەرۋ جاعىمەن شۇعىلدانۋى كەرەك.

اسحات ايماعامبەتوۆ,

ءماجىلىس دەپۋتاتى