قازىرگى تاڭدا اۋىل مەن قالا مەكتەپتەرى اراسىنداعى ءبىلىم بەرۋدىڭ الشاقتىعى وزەكتى ماسەلەنىڭ ءبىرى ەكەنى انىق. بۇگىنگى تامىز كونفەرەنتسياسىندا اۋىل مەكتەبىندەگى ءبىلىم ساپاسىن ارتتىرۋ ماسەلەسى دە كوتەرىلىپ, وسى سالاداعى تىڭ يدەيالار تالقىلاندى. سوندىقتان مۇنداي جيىننىڭ اۋىل مەكتەبىندەگى ءبىلىم ساپاسىن كوتەرۋگە سەپتىگى تيەدى دەپ ويلايمىن. سونداي-اق اۋىل مەكتەبىندە تسيفرلىق رەسۋرستار مەن ءبىلىم پلاتفورمالارى دا قولجەتىمدى ەمەس. وعان قوسا اۋىلداعى ينتەرنەت جىلدامدىعىنىڭ تومەندىگى, ءپان مۇعالىمدەرىنىڭ جەتىسپەيتىنى, جاراتىلىستانۋ پاندەرى بويىنشا زەرتحانالىق كابينەتتەردىڭ ازدىعى نەمەسە مۇلدەم جوقتىعى وقۋشىلاردىڭ ساپالى ءبىلىم الۋىنا كەدەرگى كەلتىرەدى.
وسى ماسەلەلەردى شەشۋ ءۇشىن اقتوبە وبلىسىندا «تسيفرلى تەحنولوگيالاردى قولدانىپ, شاعىن جيناقتى اۋىل مەكتەپتەرىنىڭ الەۋەتىن دامىتۋ» اتتى قاناتقاقتى جوبا جۇزەگە استى. جوبا اياسىندا وڭىردەگى شاعىن جيناقتى مەكتەپتەردىڭ 66 پايىزى ينتەراكتيۆتى پانەلدەرمەن, پەداگوگتەرگە ارنالعان دەربەس كومپيۋتەرلەرمەن, پاندەر بويىنشا ارنايى كورنەكىلىكتەرمەن, تولىقتاي تسيفرلىق كابينەتتەرمەن جانە زاماناۋي ءبىلىم بەرۋ قۇرالدارىمەن جابدىقتالدى. بۇل – اۋىل مەكتەپتەرىنە مەملەكەت تاراپىنان كورسەتىلگەن قولداۋ. جابدىقتالعان كابينەتتەردەگى ينتەراكتيۆتى پانەلدەردە «BilimLand», «Daryn Online», «Roqed Science» تسيفرلىق ءبىلىم بەرۋ پلاتفورمالارى ورناتىلدى. سونىمەن قاتار اۋىل مەكتەپتەرىنىڭ ينتەرنەت جىلدامدىعىن جاقسارتۋ ماقساتىندا بىرقاتار جۇمىس اتقارىلدى.
ماسەلەن, ءوزىم ەڭبەك ەتەتىن تالدىساي ورتا مەكتەبى ماگنيتتىك ءبىلىم ورداسى رەتىندە جۇمىس ىستەيدى. بۇل قاناتقاقتى جوبانىڭ ماقساتى – قالا جانە اۋىل مەكتەپتەرى اراسىنداعى الشاقتىقتى ازايتىپ, شاعىن جيناقتى مەكتەپتەردە ونلاين ءبىلىم بەرۋ تەحنولوگيالارىن حالىقارالىق ستاندارتتارعا ساي قولدانىسقا ەنگىزۋ. الداعى ۋاقىتتا وسى جوبانى رەسپۋبليكالىق دەڭگەيگە كوتەرسە, كوپتەگەن شاعىن جيناقتى اۋىل مەكتەبىنىڭ ءبىلىم ساپاسىن ارتتىرۋعا جاعداي جاسالاتىنى ءسوزسىز.
مەيىربەك قوجاعۇلوۆ,
اقتوبە وبلىسى, قوبدا اۋدانى, تالدىساي اۋىلدىق ورتا مەكتەبىنىڭ مۇعالىمى