پارلامەنت سەناتى اپپاراتىنىڭ دەلەگاتسياسى ازەربايجان ميللي مەدجليسىندەگى ارىپتەستەرىمەن كەزدەستى. ەكى ەل پارلامەنتى پالاتالارى اپپاراتتارىنىڭ باسشىلارى ماكسيم سپوتكاي مەن فاريد گادجيەۆ كەزدەسۋ بارىسىندا الداعى ۋاقىتتا ءوزارا قارىم-قاتىناستى ودان ءارى ارتتىرۋ جانە ىنتىماقتاستىقتى دامىتۋ ماسەلەلەرىنە كەڭىنەن توقتالدى.
ماكسيم سپوتكاي جوعارى دەڭگەيدەگى تۇراقتى ءوزارا ساپارلاردىڭ ماڭىزىنا نازار اۋدارىپ, قازاقستان مەن ازەربايجان اراسىنداعى قارىم-قاتىناستى نىعايتۋدا مەملەكەت باسشىلارىنىڭ ءرولى زور ەكەنىن اتاپ ءوتتى. سۇحبات كەزىندە ەكىجاقتى بايلانىستىڭ دامۋىندا پارلامەنتارالىق ىنتىماقتاستىقتىڭ دا ماڭىزدى ورىن الاتىنى ايتىلدى.
فاريد گادجيەۆ ەكى مەملەكەتتىڭ قارىم-قاتىناسى ورتاق تاريحي جانە مادەني قۇندىلىقتارعا, سونداي-اق دوستىق پەن باۋىرلاستىققا تابان تىرەيتىنىن اتاپ ءوتتى.
سونىمەن قاتار قازاقستان پارلامەنتىنىڭ دەلەگاتسياسى ميللي مەدجليسى مەن ونىڭ اپپاراتىنىڭ قۇرىلىمىمەن, قازىرگى كوميتەتتەر مەن كوميسسيالاردىڭ جۇمىسىمەن, ازەربايجاننىڭ سايلاۋ جۇيەسىمەن جانە زاڭ شىعارۋ ۇدەرىسىمەن تانىستى. سونداي-اق پارلامەنتتەن ورىن العان پارتيالاردىڭ قىزمەتى جانە وكىلدىك ورگاننىڭ سىرتقى بايلانىسى دا نازاردان تىس قالعان جوق. ديالوگ كەزىندە قازاقستان سەناتى مەن ونىڭ اپپاراتىنىڭ جۇمىسى اڭگىمەگە ارقاۋ بولدى.
قازاقستاندىق دەلەگاتسيا ازەربايجان پارلامەنتىنىڭ اكىمشىلىك عيماراتىنا دا بارىپ, دەپۋتاتتاردىڭ جۇمىس جاعدايىمەن, پلەنارلىق وتىرىس وتەتىن زالمەن جانە «جەڭىس بۇرىشىمەن» تانىستى. بۇدان باسقا ولار گەيدار اليەۆتىڭ زيراتىن زيارات ەتىپ, شەحيدتەر اللەياسىنا باردى.