پرەمەر-ءمينيستردىڭ ورىنباسارى قانات بوزىمباەۆ ەكولوگيا جانە تابيعي رەسۋرستار مينيسترلىگى مەن توتەنشە جاعدايلار مينيسترلىگى باسشىلىعىنىڭ قاتىسۋىمەن ءورت قاۋپى جوعارى كەزەڭىنە دايىندىقتى كۇشەيتۋ ءىس-شارالارىن پىسىقتادى.
بۇگىنگى تاڭدا تجم-دە 441 ءورت ءسوندىرۋ بولىمشەسى جۇمىس ىستەيدى. وڭىرلەردە 230 ەرىكتى قۇرىلىم, سونداي-اق جەرگىلىكتى اتقارۋشى ورگانداردىڭ 709 بەكەتى بار. ۆيتسە-پرەمەر مەملەكەتتىك ورتكە قارسى قىزمەت جوق جەرلەردە تاعى 49 ءورت ءسوندىرۋ بەكەتىن قۇرۋدى جەدەلدەتۋدى تاپسىردى.
ءورت قاۋپى جوعارى كەزەڭگە دايىندىق شەڭبەرىندە 272,5 ملن گا الاڭدا عارىشتىق مونيتورينگ جۇرگىزىلەدى. الايدا جەر سەرىكتەرىنەن الىنعان دەرەكتەر, تەك ەل اۋماعى تولىق بارلانعان سوڭ, بىرنەشە ساعاتتان كەيىن تجم ستانساسىنا جىبەرىلەدى. بۇگىندە ءتسدياوم ۆيرتۋالدى ستانسا قۇرۋ بويىنشا جۇمىس ىستەۋدە. بۇل ءورت وشاعىن انىقتاۋ جانە جەر سەرىكتەن ءتۇسىرىلىمدى جۇكتەۋ اراسىنداعى ۋاقىتتى 20-40 مينۋتقا دەيىن قىسقارتۋعا مۇمكىندىك بەرەدى.
ورمان قورىنىڭ قاۋىپسىزدىگىن قامتاماسىز ەتۋ جانە ءورت قاۋپى جوعارى كەزەڭگە دايىندىق بارىسى پرەزيدەنت پەن ۇكىمەتتىڭ ەرەكشە باقىلاۋىندا. ەكولوگيا جانە تابيعي رەسۋرستار مينيسترلىگى 158 مەملەكەتتىك ورمان يەلەنۋشىنى تەكسەردى. تەكسەرۋ قورىتىندىسى بويىنشا سالا باسشىسى ەرلان نىسانباەۆ «سەمەي ورمانى» رەزەرۆاتى, سونداي-اق پاۆلودار, اقمولا جانە قوستاناي وبلىستارى ءورت قاۋپى جوعارى كەزەڭگە تولىق دايىن ەمەس دەپ مالىمدەدى.
سونىمەن قاتار ججم رەزەرۆىنىڭ جوقتىعى, ورمان ءورت ءسوندىرۋ ستانسالارى عيماراتتارىنىڭ اپاتتى كۇيدە نە تىپتەن بولماۋى, ءورت ءسوندىرۋ مۇنارالارىنىڭ جەتىسپەۋشىلىگى, ارنايى تەحنيكانىڭ توزۋى سىندى كەمشىلىكتەر انىقتالعان. راتسيالاردىڭ بولماۋى جانە ارنايى كيىمدەردىڭ جەتىسپەۋشىلىگى ماسەلەلەرى دە وزەكتى.
قانات بوزىمباەۆ بىلتىرعى «سەمەي ورمانى» رەزەرۆاتىنىڭ تراگەدياسى قايتالانباۋعا ءتيىس ەكەنىن اتاپ ءوتىپ, انىقتالعان كەمشىلىكتەردى جويۋ بويىنشا شۇعىل شارالار قابىلداۋدى تاپسىردى.
«اباي جانە قوستاناي وبلىستارىندا بولعان ءىرى تابيعي ورتتەردىڭ سالدارى ءالى دە ەسىمىزدە. ءاربىر قىزمەتكەردى ورتكە قارسى ارنايى كيىممەن, راتسيالارمەن جانە قاجەتتى قۇرال-جابدىقتارمەن مىندەتتى تۇردە قامتاماسىز ەتۋ قاجەتتىگىنە ەرەكشە نازار اۋدارعىم كەلەدى», دەدى ق.بوزىمباەۆ.
كەڭەس قورىتىندىسى بويىنشا ۆيتسە-پرەمەر وڭىرلەردىڭ اكىمدىكتەرىنە ءبىر اپتادا تابيعي ورتتەر قاۋپىن تومەندەتۋ بويىنشا وڭىرلىك ءىس-شارالار جوسپارىن ازىرلەۋدى جانە بەكىتۋدى تاپسىردى.
«وبلىس اكىمدەرى وڭىرلىك ءىس-شارالار جوسپارلارىن ىسكە اسىرۋعا تىكەلەي جاۋاپتى», دەدى ۆيتسە-پرەمەر.
سونداي-اق تجم-گە ءبىر اپتالىق مەرزىمدە اەروۆيزۋالدى باقىلاۋ جانە ءورتتى ءسوندىرۋ ءۇشىن كورسەتىلەتىن تىكۇشاق قىزمەتىنىڭ كولەمىن ۇلعايتۋ بويىنشا ۇسىنىستار ەنگىزۋ تاپسىرىلدى.
ەكولوگيا مينيسترلىگىنە ورمان قورى اۋماعىندا ورتتەردى ەرتە انىقتاۋ جۇيەلەرىن ورناتۋ, ورمان جانە تابيعاتتى قورعاۋ مەكەمەلەرىن ماتەريالدىق-تەحنيكالىق جاراقتاۋ جۇمىستارىن جانداندىرۋ تاپسىرىلدى.
بۇدان بولەك, ءىىم مەن اكىمدىكتەر ءورت قاۋپى جوعارى كەزەڭدە جەكە تۇلعالاردىڭ ورمان قورى اۋماعىندا بولۋىنا جول بەرمەۋ, ونىڭ ىشىندە ىقتيمال قاساقانا ورتەۋدەن ساقتاۋ شارالارىن قابىلدايدى. مۇنداي فاكتىلەر انىقتالعان جاعدايدا ازاماتتار زاڭعا سايكەس جاۋاپكەرشىلىككە تارتىلادى.