پرەمەر-مينيستر ولجاس بەكتەنوۆتىڭ توراعالىعىمەن «قازاقستان–ەۋرووداق» ديالوگ پلاتفورماسىنىڭ 14-وتىرىسى ءوتتى. وتىرىسقا ەۋروپالىق وداققا مۇشە مەملەكەتتەردىڭ ديپلوماتيالىق ميسسيالارىنىڭ باسشىلارى, سونداي-اق بىرقاتار ەۋروپالىق كومپانيالاردىڭ توپ-مەنەدجەرلەرى قاتىستى.
كۇن تارتىبىندە ساۋدا-ەكونوميكالىق جانە ينۆەستيتسيالىق ىنتىماقتاستىق ماسەلەلەرى قارالىپ, سۋ رەسۋرستارىن باسقارۋ جانە اۋىل شارۋاشىلىعىن دامىتۋ سالاسىنداعى بىرلەسكەن جۇمىستىڭ پەرسپەكتيۆالارى بەلگىلەندى.
ۇكىمەت باسشىسى ەلىمىزدە بولعان سۋ تاسقىنى جاعدايى اياسىندا تۇراقتى سۋ ينفراقۇرىلىمىن دامىتۋ ءۇشىن ەو ەلدەرىمەن ارىپتەستىكتى كەڭەيتۋدىڭ ماڭىزدىلىعى مەن قاجەتتىلىگىن اتاپ ءوتتى.
«تابيعي اپاتتىڭ اۋقىمى مەن سالدارى بىزدەن رەسۋرستاردى دۇرىس پايدالانۋ جانە بولاشاقتا وسىنداي جاعدايلاردىڭ الدىن الۋ ءۇشىن تۇبەگەيلى جاڭا تاسىلدەر قابىلداۋدى تالاپ ەتەدى. بۇل ماسەلەدە ءبىزدى ەۋروپا ەلدەرى مەن كومپانيالارىنىڭ وزىق تاجىريبەلەرى مەن ازىرلەمەلەرى ەرەكشە قىزىقتىرادى. قازاقستان ۇكىمەتىنىڭ كۇش-جىگەرىن ەۋرووداقتىڭ قولداۋ باعدارلامالارىمەن ۇيلەستىرۋ ماڭىزدى», دەپ اتاپ ءوتتى و.بەكتەنوۆ.
بۇگىندە ۇكىمەت سۋ رەسۋرستارىن باسقارۋ جۇيەسىن دامىتۋ تۇجىرىمداماسىن قابىلدادى. ونى جۇزەگە اسىرۋ ناتيجەسىندە سۋدى تاسىمالداۋدا ىسىراپ ازايادى, سۋارمالى جەرلەردىڭ جاعدايىن باقىلاۋ جۇيەسى جەتىلدىرىلەدى, سونداي-اق توتەنشە جاعدايلاردىڭ تۋىنداۋ قاۋپىن ازايتۋ ءۇشىن گيدروتەحنيكالىق قۇرىلىستار جاڭعىرتىلادى.
ءوز كەزەگىندە ەۋروپالىق وداق وكىلدىگىنىڭ ەلشىسى كەستۋتيس يانكاۋسكاس بەلگىلەنىپ وتىرعان باعىتتىڭ باسىمدىعىن راستادى. ماسەلەن, اۋىل شارۋاشىلىعى جانە سۋ رەسۋرستارىن باسقارۋ سالاسىنداعى ءوزارا ءىس-قيمىل بيىل ەكىجاقتى كۇن تارتىبىندەگى نەگىزگى ماسەلەلەر بولماق.
«سۋ ماسەلەسى – ورتالىق ازيامەن ىنتىماقتاستىعىمىزدىڭ باسىمدىعى. باسقا تابيعي رەسۋرستار سياقتى, سۋدى ءتيىمدى پايدالانۋ ءۇشىن ونىڭ قۇنى بولۋى كەرەك. بۇل ءتيىمدى تەحنولوگيالاردى ەنگىزۋگە تۇرتكى بولادى جانە كوپتەگەن ەۋروپالىق كومپانيالار وسى باعىتتا جۇمىس ىستەۋگە دايىن», دەدى كەستۋتيس يانكاۋسكاس.
سونداي-اق ول سۋ باسسەيندەرى مەن وزەندەردى تۇراقتى باسقارۋ سالاسىنداعى ءبىلىم مەن تەحنولوگيانىڭ بەرىلۋىن قامتاماسىز ەتۋگە دايىن ەكەنىن راستادى.
سونىمەن قاتار جيىنعا قاتىسۋشىلار ەۋروپالىق ونىمدەردى قازاقستان نارىعىندا ىلگەرىلەتۋ جانە ەو نارىقتارىندا قازاقستاندىق ءونىم اسسورتيمەنتىن ارتتىرۋ ماقساتى بولىپ سانالاتىن بىرلەسكەن اگروازىق-ت ۇلىك ميسسياسى اياسىنداعى جەمىستى ىنتىماقتاستىقتى اتاپ ءوتتى.
كەزدەسۋ بارىسىندا ەۋروپا ەلدەرىنىڭ ەلشىلەرى مەن شەتەلدىك كومپانيالاردىڭ وكىلدەرى سۋدى ۇنەمدەيتىن تەحنولوگيالاردى ەنگىزۋ جانە اۋىل شارۋاشىلىعى سالاسىن دامىتۋ تاجىريبەسىمەن ءبولىستى. اۋستريا ەلشىسى ۆيللي كەمپەل يننوۆاتسيالىق سۋارۋ تەحنولوگياسىن, سونداي-اق سۋدى تۇتىنۋدى ايتارلىقتاي ازايتۋ ارقىلى جوعارى ءونىم الۋعا مۇمكىندىك بەرەتىن جاڭبىرلى ەگىن شارۋاشىلىعى سالاسىنداعى يننوۆاتسيالىق شەشىمدى تانىستىردى.
گەرمانيا-قازاقستان اگرارلىق-ساياسي ديالوگىنىڭ جەتەكشىسى دوكتور ولگا حۋنگەر سۋ رەسۋرستارىن ۇنەمدەۋ گەرمانيانىڭ دا, قازاقستاننىڭ دا اۋىل شارۋاشىلىعى سالاسى ءۇشىن ىرگەلى باعىت ەكەنىن اتاپ ءوتتى. وسىعان بايلانىستى سۋارۋ تەحنولوگياسىنا جاساندى ينتەللەكت ەنگىزۋ سالاسىنداعى ءبىلىم مەن يننوۆاتسيا ترانسفەرتىنىڭ, توپىراقتىڭ قۇنارلىلىعى مەن ىلعالدىلىعىن ساقتاۋ ماقساتىندا وڭدەۋدىڭ جاڭا ادىستەرىن قولدانۋ كەلەشەگى زور.
كەزدەسۋدە سونداي-اق كۇن ەنەرگياسىنان قۋات الاتىن اۆتونومدى ونلاين ستانسالاردى پايدالانا وتىرىپ, جەرۇستى جانە جەراستى سۋلارىنىڭ ساپاسىن باقىلاۋداعى فينليانديا تاجىريبەسى قاراستىرىلدى. قازاقستاندا تاجىريبەلىك زاۋىتتاردى ىسكە قوسۋ پەرسپەكتيۆالارى اتاپ ءوتىلدى. تسيفرلىق پلاتفورما بوگەتتەرمەن بايلانىستى تاۋەكەلدەردى باقىلاۋعا جانە سۋ ينفراقۇرىلىمىنىڭ تۇراقتىلىعىن قامتاماسىز ەتۋگە كومەكتەسەدى.
سونىمەن قاتار كەزدەسۋگە قاتىسۋشىلار اعىندى سۋلاردى تازارتۋعا يننوۆاتسيالىق تەحنولوگيالاردى ەنگىزۋ سالاسىنداعى شۆەتسيانىڭ, ال ماجارستاننىڭ وزىق اگروتەحنولوگيالارعا, ونىڭ ىشىندە تۇقىم شارۋاشىلىعىنا كوشۋ بويىنشا تاجىريبەسىن تالقىلادى.
وتىرىس قورىتىندىسى بويىنشا ۇكىمەت باسشىسى ولجاس بەكتەنوۆ سۋ رەسۋرستارى ماسەلەسى اۋىل شارۋاشىلىعىن دامىتۋدىڭ تيىمدىلىگىنە تىكەلەي اسەر ەتەتىنىن اتاپ ءوتتى. سوندىقتان قازاقستاننىڭ ەو ەلدەرىمەن ءوزارا ءىس-قيمىلى ەكى باعىتتا دا قارقىندى جانە قاتار جۇرگىزىلۋى كەرەك.
«مەملەكەت باسشىسى قاسىم-جومارت توقاەۆ ۇكىمەتكە اگروونەركاسىپ كەشەنىن دامىتۋ جانە سۋ رەسۋرستارىن ۇتىمدى پايدالانۋدى قامتاماسىز ەتۋ مىندەتىن قويدى. اۋىل شارۋاشىلىعى جانە تاماق ونەركاسىبى ەكونوميكامىزدىڭ ماڭىزدى سالالارىنىڭ ءبىرى بولىپ تابىلادى. بىزدە جوعارى ساپالى جانە ورگانيكالىق اۋىلشارۋاشىلىق ونىمدەرىن, سونداي-اق ازىق-ت ۇلىك ونىمدەرىن وندىرۋگە ۇلكەن الەۋەت بار. ءبىز ەو نارىعىنا ازىق-ت ۇلىك ەكسپورتىن ارتتىرۋعا مۇددەلىمىز. ەۋروپالىق كومپانيالاردىڭ وزىق اگروتەحنولوگيالارىن ەسكەرە وتىرىپ, سىزدەردى اۋىل شارۋاشىلىعى ونىمدەرىن ءوندىرۋ جانە قايتا وڭدەۋ بويىنشا بىرلەسكەن جوبالار جاساۋعا شاقىرامىز. ءبىز ءوز تاراپىمىزدان بيزنەستى جۇرگىزۋگە قولايلى جاعداي جاساۋ ءۇشىن بار كۇش-جىگەرىمىزدى سالۋعا دايىنبىز», دەدى ولجاس بەكتەنوۆ.