وركەنيەتتى ءومىر سالتىنا ءوتۋى ءۇشىن قوعامدىق ۇدەرىستە بىرقاتار جوبا-جوسپار ىسكە اسىرىلۋ كەرەك ەكەنى اقيقات. وسى ورايدا حالىقتىڭ تۇرمىستىق ءال-اۋقاتى مەن رۋحاني كەمەلدىگى قاشاندا ماڭىزدى ءرول اتقاراتىنى ءسوزسىز. انا ءتىلدىڭ اياسىن كەڭەيتۋ, ۇلتتىق تانىمنىڭ جاسامپاز ۇلگىسىن قالىپتاستىرۋ, سونىمەن قاتار ساپالى تۇرمىستى قامتاماسىز ەتۋ, مۇنىڭ ءبارى – كەزەك كۇتتىرمەيتىن ماڭىزدى مىندەتتەر. وسى ماسەلەلەر جونىندە پارلامەنت ءماجىلىسىنىڭ دەپۋتاتى جارقىنبەك امانتاي ۇلىنىڭ قابىلداۋىندا ويىمىزدى ورتاعا سالعان ەدىك.
ەڭ الدىمەن, اۋىل ەڭبەككەرلەرى شىعىندارىن سۋبسيديالاۋ ماقساتىندا بىرقاتار جۇمىس اتقارىلۋ كەرەك ەكەنىن جەتكىزدىم. اگروونەركاسىپ كەشەندەرىنە ءتيىستى نازار اۋدارىلسا, حالىقتىڭ تۇرمىس ساپاسى ءبىرشاما جاقسارىپ, جۇمىسسىزدىق ازايار ەدى.
سونىمەن قاتار حالىققا اۋىر سوعىپ وتىرعان تاعى ءبىر ماسەلە – وڭىردەگى قولدان جاسالعان تاپشىلىق پەن قىمباتشىلىق. ناۋقان كەزىندە اۋىل شارۋاشىلىعىنا اۋاداي قاجەت شيكىزات باعاسىنىڭ نەگىزسىز ارتىپ كەتەتىنى حالىقتىڭ شامىنا ءتيىپ بولدى. وعان ازىق-ت ۇلىك باعاسى مەن كوممۋنالدىق قىزمەت تولەمىنىڭ قىمباتشىلىعىن قوسىڭىز. دەپۋتاتتاردىڭ وسى ماڭىزدى ماسەلەنى شەشۋگە بەلسەنە اتسالىسۋىن سۇرادىم.
سونداي-اق قازىنالى قارتتارىمىزعا دا ەرەكشە نازار اۋدارماسا, بولمايدى. جوعارىدا ايتقان قىمباتشىلىق بۇل كىسىلەرگە ەكى ەسە اۋىر تيەتىنى جاسىرىن ەمەس. سونداي قيىندىقتاردىڭ ءبىرى – ايىپپۇلدار. كولىك تىزگىندەگەن اقساقالدار جول ەرەجەسىن ساقتاعانىمەن, كەيبىر بولماشى بەلگىلەردى اڭعارماي قالادى دا, ۇلكەن كولەمدەگى ايىپپۇلداردى تولەۋگە ءماجبۇر بولادى. مەنىڭ ۇسىنىسىم, قارتتارعا سالىناتىن سول ايىپپۇلدى ازايتساق دەر ەدىم.
ۇلتتى جاڭا ساپاعا كوتەرەتىن – ونىڭ ىشكى رۋحانياتى مەن مادەنيەتى. قوعامدى العا جەتەلەيتىن ءدال وسى قۇندىلىقتارعا ايرىقشا ءمان بەرۋىمىز قاجەت. قازاق حالقى ەجەلدەن سالت-داستۇرگە ەرەكشە قاراپ, ءاربىرىن كەرەك جەرىندە ورىنداپ, ساقتاپ وتىرعان. بۇل – ۇلتقا رۋح بەرىپ, ونىڭ ىشكى-سىرتقى كەلبەتىن ورنەكتەپ كورسەتىپ تۇراتىن سيپاتتاردىڭ ءبىرى. وسى ورايدا جاستار تاربيەسىندەگى جۇگەنسىزدىك مەنى ەرەكشە الاڭداتادى. بىزگە ۇلتتىق تانىمدى قايتا قالىپتاستىرۋ كەرەك. مەكتەپتەگى بالادان مەملەكەتتىك قىزمەتشىلەرگە دەيىن ورىسشا ويلاناتىن ازاماتتار ۇلتىنا قىزمەت ەتە المايدى. ءتىل – حالىقتىڭ جانى. ءتىلى قۇرىسا, حالىق تا جەر بەتىنەن جوعالادى.
بۇعان قوسا قاراكوز قىزدارىمىزدىڭ شەتەلدىك ازاماتتارعا تۇرمىسقا شىعۋى جيىلەپ بارادى. بۇل دا – ۇلتتىق گەنوفوندىمىزعا تۋاتىن قاۋىپ. سول سەبەپتى بۇل ماسەلەنىڭ الدىن الاتىن ارنايى زاڭ شىعارىلۋ كەرەك دەگەن ۇسىنىسىمدى جەتكىزدىم. سوزدەن ىسكە كوشەتىن ۋاقىت جەتتى. سوندىقتان دەپۋتاتتار ۋاقىتتى حالىقپەن كەزدەسۋگە ەمەس, حالىقتىڭ ماسەلەسىن شەشۋگە جۇمساعانى ءجون.
وڭداسىن نازاروۆ,
« ۇلى دالا اۋىلدارى» قوعامدىق بىرلەستىگىنىڭ توراعاسى
تۇركىستان وبلىسى