ەلىمىزدە اقشا اۋدارۋ جۇيەسى (ااج) ارقىلى حالىقارالىق اقشا اۋدارىمدارىنىڭ كولەمى ايتارلىقتاي قىسقاردى. 2023 جىلدىڭ قاڭتار-قازانىندا ااج ارقىلى شەتەلگە جىبەرىلگەن قاراجات كولەمى 806,9 ملرد تەڭگەنى قۇرادى, بۇل بىلتىرعى سايكەس كەزەڭدەگىدەن 7,2 پايىزعا از.
2022 جىلدىڭ قاڭتار-قازانىمەن سالىستىرعاندا شەتەلدەن تۇسكەن اقشا كولەمى 2,2 ەسە ازايىپ, بىلتىر 10 ايدا 258,5 ملرد تەڭگەنى قۇرادى. ەلدەر بويىنشا 2023 جىلدىڭ قاڭتار-قازانىندا ەلىمىزدەن جىبەرىلگەن قاراجاتتىڭ جارتىسىنان كوبى تەك ەكى ەلگە كەتتى – وزبەكستان مەن رەسەي: تيىسىنشە 232,8 ملرد تەڭگە جانە 195,2 ملرد تەڭگە. سونداي-اق تۇركيا (184,5 ملرد تەڭگە) مەن گرۋزياعا (76,7 ملرد تەڭگە) ايتارلىقتاي اقشا جىبەرىلدى.
ااج ارقىلى تۇسكەن قاراجاتتىڭ ۇشتەن بىرىنەن استامى رەسەيدەن اۋدارىلعان: 94,2 ملرد تەڭگە. تاعى ۇشتەن ءبىرىن وزبەكستان (28,5 ملرد تەڭگە), اقش (27,8 ملرد تەڭگە) جانە وڭتۇستىك كورەيا (27,4 ملرد تەڭگە) قۇرادى.
اقشا اۋدارىمدارى جۇيەلەرىنىڭ ىشىندە شەتەلگە جىبەرىلگەن اقشا اۋدارىمدارىنىڭ ەڭ كوپ كولەمى «زولوتايا كوروناعا» تيەسىلى: 643,4 ملرد تەڭگە – 2022 جىلدىڭ قاڭتار-قازانىمەن سالىستىرعاندا 4,8 پايىزعا از. بۇل رەتتە جۇيەنىڭ ۇلەسى 77,8 پايىزدان 79,7 پايىزعا دەيىن ءوستى. ودان كەيىن – Contact (93,4 ملرد تەڭگە), Western Union (46,3 ملرد تەڭگە) جانە MoneyGram (13,1 ملرد تەڭگە). باسقا جۇيەلەردىڭ ۇلەسىنە 10,8 ملرد تەڭگە عانا تيەسىلى.
شەتەلدەن تۇسكەن اقشا اۋدارىمدارىنىڭ كولەمى بويىنشا دا «زولوتايا كورونا» ااج اراسىندا دا كوش باستاپ تۇر: 130,8 ملرد تەڭگە – 2022 جىلدىڭ قاڭتار-قازانىمەن سالىستىرعاندا 3,1 ەسە از. جۇيەنىڭ ۇلەسى ءبىر جىلدا 70,7 پايىزدان بىردەن 50,6 پايىزعا دەيىن تومەندەپتى. ودان كەيىن Western Union (57,6 ملرد تەڭگە), MoneyGram (32,4 ملرد تەڭگە) جانە Contact (11,9 ملرد تەڭگە) تۇر. باسقا جۇيەلەردىڭ ۇلەسىنە 25,8 ملرد تەڭگە تيەسىلى.