باتىس قازاقستان وبلىسىندا جول-كولىك اپاتى كوبەيىپ تۇر. قاڭتاردىڭ العاشقى ونكۇندىگىندە وڭىردە 11 جول اپاتى بولىپ, 12 ادام قازا تاپسا, 21 جولاۋشى ءتۇرلى دەنە جاراقاتىن العان.
وسى وقيعاعا وراي وبلىستىق پوليتسيا دەپارتامەنتىنىڭ باسشىسى, پوليتسيا پولكوۆنيگى ارمان ورازاليەۆ شۇعىل ءباسپاسوز-كونفەرەنتسياسىن وتكىزدى.
«وبلىستا جول قاۋىپسىزدىگى بويىنشا توتەنشە جاعداي بولىپ تۇر», دەپ مالىمدەدى پوليتسيا باستىعى. مۇنداي جاعداي كەيىنگى 5 جىلدا بولماعان. سالىستىرۋ ءۇشىن ايتساق, 10 كۇن ىشىندە بولعان جول-كولىك وقيعالارى وتكەن جىلدىڭ 2 ايىنىڭ كورسەتكىشىمەن تەڭەسىپ وتىر.
5 قاڭتاردا ورال قالاسىنا ىرگەلەس جاتقان ۆەتەلكي اۋىلىندا اۆتوكولىككە سۇيرەتپە تىركەپ سىرعاناپ, تىركەمەدە وتىرعان 17 جاستاعى بويجەتكەن قازا تاپتى. ال 6 قاڭتاردا ورال قالاسىندا «وكرۋجنوە شوسسە» اينالما جولىندا 3 اۆتوكولىك سوقتىعىسىپ, 1 ادام قايتىس بولدى. كەلەسى كۇنى «ورال-اتىراۋ» رەسپۋبليكالىق ماڭىزى بار اۆتوجولىنىڭ 62-شاقىرىمىندا «شەۆرولە نەكسيا» اۆتوكولىگىنىڭ جۇرگىزۋشىسى قارسى كەلە جاتقان «تويوتا يپسۋم» ماركىلى اۆتوكولىككە سوقتىعىسىپ, سالدارىنان 3 ادام دۇنيە سالدى, 8 ادام دەنە جاراقاتىن الدى.
سول كۇنى «قازتالوۆ-جانىبەك» اۆتوجولىندا «ۆاز-2110» اۆتوكولىگىنىڭ جۇرگىزۋشىسى قارسى كەلە جاتقان «شەۆرولە لاچەتي» اۆتوكولىگىمەن سوقتىعىسىپ, 1 ادام قازا تاپتى. «بۇل جول اپاتىنىڭ بارلىعى جۇرگىزۋشىلەردىڭ قارسى جولاققا شىعىپ كەتۋىنەن بولعان, وعان دالەل بەينەجازبالارى بار», دەيدى ا.ورازاليەۆ.
تاعى ءبىر جول اپاتى 9 قاڭتار كۇنى «چاپاي-جاڭاقالا-سايحىن» وبلىستىق ماڭىزى بار تاس جولىنىڭ 103-شاقىرىمىندا تىركەلدى. جانتۇرشىگەرلىك اپات سالدارىنان 5 ادام قازا تاپتى. ءبىر وتباسى مۇشەلەرىنىڭ ءومىرى قيىلدى. ءبىر كىشكەنتاي ءسابي دەنە جاراقاتىن الىپ, اۋرۋحانانىڭ جانساقتاۋ بولىمىندە جاتىر.
«بۇل جەردە دە جۇرگىزۋشى قارسى جولاققا شىعىپ, قارسى كەلە جاتقان كولىككە سوقتىعىسقان. ونىڭ ۇستىنە, اۆتوكولىك جازعى دوڭگەلەگىن اۋىستىرماعان», دەيدى پوليتسيا باسشىسى.
وبلىس اۋماعىنداعى بارلىق رەسپۋبليكالىق ماڭىزى بار اۆتوجولداردا پاترۋلدىك پوليتسيا قىزمەتكەرلەرى جۇرەدى. جۇرگىزۋشىلەردىڭ كوپشىلىگى پاترۋلدىك اۆتوكولىكتى كورگەن كەزدە جىلدامدىقتى ازايتىپ, جول ەرەجەسىن ساقتايدى. ال ودان وتىسىمەن «تىزگىندى جىبەرىپ» الاتىنى وتىرىك ەمەس. سوندا جول قاۋىپسىزدىگى كىم ءۇشىن كەرەك؟! پوليتسيا ءار شاقىرىم سايىن پاترۋل قويا المايدى. جولدا ءجۇرۋ مادەنيەتىن قالاي قالىپتاستىرامىز؟ مىنە, بۇل ۇلكەن ماسەلە بولىپ تۇر.
باتىس قازاقستان وبلىسىندا رەسپۋبليكالىق ماڭىزى بار اۆتوجولدارعا كۇندەلىكتى 47 پاترۋلدىك اۆتوكولىك شىعادى ەكەن. ولار بارىنشا جول قاۋىپسىزدىگىن قامتاماسىز ەتەدى. مۇنىڭ ىشىندە اۆتوماتتى رەجىمدە جۇمىس ىستەيتىن 3 «كيبەرشەريف» جۇيەسى بار. ا.ورازاليەۆ بيىل تاعى وسىنداي 17 كولىك الۋدى جوسپارلاپ وتىرعانىن جەتكىزدى.
وڭىردە ورتا ەسەپپەن كۇندەلىكتى 100-150 اكىمشىلىك حاتتاما تولتىرىلىپ, 500 مىڭنان 1,5 ملن تەڭگەگە دەيىن ايىپپۇل سالىنادى. 2023 جىلى وبلىستا 445 جول-كولىك وقيعاسى بولىپ, ونىڭ سالدارىنان 107 ادام قازا تاپقان. 540 جولاۋشى ءارتۇرلى دارەجەدە جاراقات العان.
باتىس قازاقستان وبلىسى