ءۇش الەۋمەتتىك نىسان پايدالانۋعا بەرىلدى

سارىومىردە – دارىگەرلىك امبۋلاتوريا

بۇرىنعى ەكى اۋداندى بىرىكتىرگەن, جايىق وزەنىن بويلاي جۇزدەن اسا شاقىرىمعا سوزىلىپ جاتقان تەرەكتى اۋدانى – باتىس قازاقستان وبلىسىنداعى ىرگەلى ءوڭىر. توعىز جولدىڭ تورابىندا ورنالاسقان بۇل اۋدان – قاي كاسىپپەن شۇعىلدانۋعا دا قولايلى مەكەن. اۋداننىڭ نەگىزى لوكوموتيۆى اگروسەكتور بولسا, ونىڭ قوس قاناتى – ەگىن مەن مال شارۋاشىلىعى قاتار دامىپ كەلە جاتىر. ديقان قاۋىمى وزىق تەحنولوگيانى قولعا الىپ, ساننان ساپاعا كوشسە, اۋىلدا مال باسى دا ەرەكشە كوبەيىپ كەلەدى.

ال ەندى وسى شارۋانىڭ ءبارىن دوڭگەلەتىپ وتىرعان اۋىل حالقى­نىڭ الەۋمەتتىك جاعدايى قانداي؟ ساراپتاپ قاراساق, تەرەكتى اۋدانى قۇرامىنداعى 15 وكرۋگتە 40 مىڭعا تارتا تۇرعىن بار ەكەن. اۋدان بويىنشا 24 ەلدى مەكەن اۋىز سۋمەن, 96 پايىز اۋىل گازبەن قامتىلعان. شىنىن ايتۋ كەرەك, كەيىنگى جىل ەلىمىزدە اۋىل حالقىنا مەملەكەت تاراپىنان ەرەكشە قولداۋ, قامقورلىق سەزىل­گەن كەزەڭ بولدى. مۇنى مەم­لەكەت باسشىسى قاسىم-جومارت توقاەۆتىڭ تاپسىر­ماسى­­نا سايكەس قولعا الىن­عان مەملە­كەت­تىك باعدار­لاما­لاردان كورىپ, كۋا بولىپ وتىرمىز. تەرەك­تى اۋدانىن­دا ءبىر كۇندە پاي­دالانۋعا بەرىلگەن ءۇش نىسان – سونىڭ ايعاعى.

«2023-2025 جىلدارى باتىس قازاقستان وبلىسىندا 50 مەدي­تسينالىق نىسان سالىن­سىن». بۇل – وتكەن جىلدىڭ سوڭىندا ۇكىمەت قاۋلىسىمەن قابىلدانعان «اۋىلدا دەنساۋلىق ساقتاۋدى جاڭعىرتۋ» قاناتقاقتى ۇلت­تىق جوباسىنىڭ تاپسىرماسى. مىنە, قازىردىڭ وزىندە وڭىردە 12 نىساننىڭ قۇرىلىسى باستالىپ, بەسەۋى حالىق يگىلىگىنە بەرىلىپ تە ۇلگەردى. ولاردىڭ كەيبىرىن گازەتىمىزگە جازدىق تا.

ال بۇگىنگى التىنشى نىسان ءسارىومىر اۋىلىنىڭ ماڭدايىنا بۇيىرعان ەكەن. ءسارىومىر – تەك تەرەكتى اۋدانى ەمەس, باتىس قازاق­ستان وڭىرىنە تانىمال ەرەكشە ەلدى مەكەن. «دالا تەڭىزى» اتانعان شال­قار كولىنىڭ جاعاسىندا تۇر­عان اۋىلدىڭ بولاشاعى زور. جاز كۇندەرى مۇندا كۇن سايىن 2 مىڭداي تۋريست دەمالۋعا كەلەدى. وقۋشى­لار­دىڭ جازعى دەمالىس لاگەرى دە وسىندا. اۋىلدىڭ تاعى ءبىر تۋريس­تىك نىسانى – ساساي تاۋىندا قىس­قى شاڭعى سپورتىن دامىتۋعا, كوپ­­شىلىك سىرعاناق دەمالىسىن ۇيىم­­داس­تىرۋعا ارنالعان جوبالار دا ايتىلىپ ءجۇر. ورال قالاسى­مەن اراداعى 90 شاقىرىم جول اسفالت­تالعان. بيىل جازدا ساۋلەتتى مەشىت بوي كوتەرىپتى. ال كىتاپ­سۇيەر قاۋىم بەلگىلى جازۋشى, وسى جەردىڭ پەرزەنتى حامزا ەسەن­جانوۆ­تىڭ «اق جايىق» تريلوگيا­سىنان بۇل توپىراقتىڭ تاريحى مەن تابيعاتىنا قانىق تا شىعار.

ء«بىز بۇعان دەيىن 1968 جىلى سالىن­عان عيماراتتا قىزمەت ەتتىك. ول ەسكى ءارى تار ەدى. جالپى, ءبىز­دىڭ شالقار وكرۋگىندە 1 550 تۇر­عىن بولسا, ونىڭ ىشىندە بالا ءوربىتۋ جاسىندا 218 ايەل, 1 جاسقا تول­ماعان 24 ءسابيىمىز بار. جالپى, جاڭا عي­ماراتقا وتە مۇقتاج ەدىك. قۋا­نى­شى­مىزدا شەك جوق», دەيدى ءسارىومىر اۋىلدىق دارىگەرلىك امبۋلا­تورياسىنىڭ مەڭگەرۋشىسى الماگۇل سالاحيەۆا.

«فيرما يسكوم» جشس 4 ايعا جەتكىزبەي سالىپ شىققان عيماراتتى ارالاپ كوردىك. جىلى دا جارىق بولمەلەر سىڭعىرلاپ تۇر. 8 ادامعا ارنالعان كۇندىزگى ستا­تسيونار, بارلىق جابدىعى ورنا­تىل­عان ستوماتولوگيا كابي­نەتى, اناليزدەر زەرتحاناسى, پروتسە­دۋرا­لىق, فيزيوتەراپەۆتىك كابي­نەت­تەر, اكۋشەر-گينەكولوگ كابي­نەتى, ءدارىحانا, تاعى باسقا ەمدەۋ بولمەلەرى بار. 374 ملن­ تەڭگەگە جۋىق رەسپۋب­لي­كا­لىق بيۋدجەت قاراجاتىنا سالىنعان وتبا­سىلىق-دارىگەرلىك امبۋلاتوريا كۇنىنە 35 ادام قابىلداي الادى ەكەن. مۇندا 22 ادام تۇراقتى جۇمىسپەن قامتىلماق.

– ومىردە تارتىپ تا, ساتىپ تا, تاۋىپ تا, سۇراپ تا الا المايتىن ەڭ باستى بايلىق – دەنساۋلىق. اۋىلداستارىم مىنا شالقار كولىندەي شالقىپ, قۋانىپ جاتىر. ەندى ءسال سىرقاتتانساق, اناليز تاپسىرۋ ءۇشىن ەشقايدا سابىلمايمىز. ەلدىڭ اتىنان العىس ايتامىن. ەندى وسى مەكەمەگە بىلىكتى دارىگەر تارتىلسا ەكەن, – دەيدى اۋىل تۇرعىنى, زەينەتكەر جانتەمىر تاسقاليەۆ.

مامان دەمەكشى, جوعارى ءبىلىم­دى دارىگەر باتىس قازاقستان وبلىسىندا قاسقالداقتىڭ قا­نىنداي قات بولىپ تۇرعانى راس. ءدال وسى ءسارىومىر امبۋ­لاتورياسىنا دا جوعارى ءبىلىمدى دارىگەر كەرەك, زەرتحاناعا مامان لابورانت كەرەك. ازىرگە ەڭبەك اۋرۋحاناسىنان مامان دارىگەر اپتاسىنا 2-3 مارتە كەلىپ, قابىلداۋ وتكىزىپ تۇرماق.

– 2023 جىلدىڭ باسىندا ءبىزدىڭ وبلىستا 279 مامان-دارىگەردىڭ ورنى بوس تۇردى. سودان بەرى كوپ جۇ­مىس اتقارىلدى. بىرىنشىدەن, رەزي­دەنتتەردىڭ وقۋىنا گرانت ءبو­لىندى, قازىر 18 ادام رەزيدەنتۋرادا وقىپ جاتىر. ودان بولەك, وبلىس بيۋدجەتىنەن باكالاۆرعا 66 گرانت بەرىلدى. وڭىرگە جاڭادان كەل­گەن ماماندارعا 5 ملن تەڭگەدەن بىر­جولعى ۇستەمەاقى بولدىك. قازىر وب­لىس­قا 115 مامان كەلدى, سونىڭ 48-ءى اۋدان-اۋىلدارعا ورنالاستى. اري­نە, ەندى ءسارىومىر اۋىلىنا دا تۇ­راقتى مامان كەرەك, – دەي­دى وب­لىس­تىق دەنساۋلىق ساقتاۋ باس­­قار­­ماسىنىڭ باسشىسى ەرلان توقسانوۆ.

ءسارىومىر اۋىلدىق دارىگەرلىك امبۋ­لاتورياسىنىڭ اشىلۋىنا باتىس قازاقستان وبلىسىنىڭ اكىمى ناريمان تورەعاليەۆتىڭ ءوزى كەلدى. ءوڭىر باسشىسى اۋىل حال­قىن الداعى تاۋەلسىزدىك مەرە­كە­سى­مەن قۇتتىقتاپ, مەملەكەت باس­شى­سىنىڭ تاپسىرماسىمەن اتقا­رىلىپ جاتقان جۇمىستاردى ايتىپ ءوتتى.

– پرەزيدەنتىمىز قاسىم-جومارت كەمەل ۇلى جەرگىلىكتى اتقا­رۋ­شى ورگانداردىڭ الدىنا تاپسىرما قويىپ, اۋىلدىق جەردى دامىتۋ ماسەلەسىن قاتاڭ قاداعالاپ وتىر. ءاربىر تۇرعىن مەملەكەت قولداۋىن سەزىنۋى كەرەك. بيىل وبلىستا قىرۋار جۇمىس اتقارىل­دى. جاقىندا 1,7 ملرد تەڭگەدەن اسا قا­راجات ءبولىپ, سۋ جاڭا 81 «جەدەل جاردەم» كولىگىن الدىق. سونىڭ ءبىرى وسى سارىومىرگە ءتيىپ وتىر. جاڭا عيماراتتاردان بولەك, وڭىردە 1,733 ملرد تەڭگەگە جۋىق قار­جىعا 22 دارىگەرلىك نىسانعا كۇردەلى جوندەۋ جۇرگىزدىك. ونىڭ سىرتىندا 5,5 ملرد تەڭگەگە 204 بىر­لىك مەديتسينالىق قۇرال-جاب­دىق ساتىپ الدىق. وسىنىڭ ءبارى – اۋىل تۇرعىندارىنا كومەك. اۋىل حالقى ءسال سىرقات ءۇشىن اۋدان ورتالىعىنا, قالاعا سابىلىپ جۇر­مەۋى كەرەك. 2024 جىلى 25 ملرد تەڭگە تەك قانا مەديتسينالىق قۇرال-جابدىققا ءبولىپ جاتىرمىز. ال وڭىرگە كەلگەن دارىگەرلەرگە بىر­جولعى كوتەرمەاقى كولەمىن 2,5 ملن تەڭگەدەن 5 ملن تەڭگەگە دەيىن كوتەردىك. كەلەسى جىلى 5-8 ملن تەڭگە تولەيمىز. ەگەر ەرلى-زايىپتى مامان كەلسە, 16 ملن تەڭگە الا الادى. ءبىز, وسىلايشا, اۋىلدا دارىگەر تاپشىلىعىن تۇبەگەيلى شەشۋ ءۇشىن جۇمىس ىستەپ جاتىرمىز, – دەيدى ناريمان تورەعالي ۇلى.

ايتپاقشى, دارىگەرلىك امبۋ­لا­توريا قۇرىلىسىنا اۋىل تۇر­عىندارى دا ەرەكشە كومەك­تەسىپ­تى. ونداعى ماقسات اۋىلداعى جۇ­مىس­سىز جاستار ەڭبەك ەتىپ, اقشا تاپسا, ەكىنشىدەن, ولار ءوز اۋى­لى­نىڭ يگىلىگىنە جارار قۇرىلىستىڭ ساپا­لى سالىنۋىن قاداعالاپ تا ءجۇرىپتى. سالتاناتتى جيىندا مەر­دىگەر كومپانيا وكىلى ارمان جان­توريەۆ نۇرلان عالىمجان ۇلى, نۇرتاي جانۇزاق ۇلى, نۇرعالي ناسىپ­قالي ۇلى, تورەحان بەرىك ۇلى, داۋلەت باقىتجان ۇلى, اسىلحان ۇزاق­باي ۇلى سىندى اۋىل ازاماتتارىنا العىسحات تاپسىرىپ, اقشالاي سىي­لىق بەردى.

ۇلكەن ەڭبەكتە – نەگىزگى مەكتەپ

تەرەكتى اۋدانىنىڭ اقسوعىم اۋىلدىق وكرۋگىنە قارايتىن ۇلكەن ەڭبەك اۋىلى بۇرىن ۆوس­حود اتالعان. تاۋەلسىزدىكتىڭ ءتاڭ­سارى جىلدارىندا اۋىل قيىن جاعدايدى باستان كەشىردى. كوپ حالىق ۇدەرە كوشتى. الەۋمەتتىك نىساندار ازىپ-توزدى. اۋىلداعى نەگىزگى مەكتەپ عيماراتى 1964 جىلى سالىنعان ەكەن. پرەزيدەنت حالىققا جولداۋىندا ناقتى تاپسىرما بەرىپ, «اپاتتى مەكتەپتەر, ءۇش اۋىسىمدى مەكتەپتەر ماسەلەسىن جەدەل شەشۋ» تۋرالى ايتقان سوڭ, 2023 جىلى باتىس قازاقستان وبلىسىندا 27 مەكتەپ قۇرىلىسى باستالىپ كەتكەن ەدى. سونىڭ ءبىرى ۇلكەن ەڭبەك اۋىلىنا تيگەندە, اۋىل تۇرعىندارىنىڭ قۋانىشىندا شەك بولمادى.

– بۇل مەكتەپ ءبىزدىڭ اۋىلعا, ءبىزدىڭ تىرلىگىمىزگە, بالا-شاعا­مىز­دىڭ ومىرىنە, اسىرەسە مۇعالىم­دەر­دىڭ ومىرىنە ۇلكەن سەرپىلىس, ۇم­تىلىس اكەلدى. ەرتەڭگى كۇنگە سەنىم اكەلدى. كورىپ وتىرمىز, كەيىنگى جىلدارى ەل ءۇشىن, اۋىل ءۇشىن جاقسى جاعداي جاسالىپ جاتىر. شىنىن ايتايىقشى, ءبىر جىلدارى سەنىمنەن ايىرىلىپ, ەسەڭگىرەپ قالعان كەزدەر دە بولدى عوي. كەيبىر اۋىلدار جوعالىپ تا كەتتى. شۇكىر, اۋىلداستاردىڭ بىرلىگىنىڭ ارقاسىندا قيىن كەزدەردەن وتتىك. قازىر گازىمىز بار. قۇدىقتا سۋ بار, قۇبىر دا كەلە جاتىر. جول سالىندى. ەندىگى جاس­تارعا تەك جۇمىس ىستەۋ كەرەك, – دەيدى اۋىلدىڭ بايىرعى تۇرعى­نى, ارداگەر ۇستاز كۇلاش امانجولوۆا.

شىنىندا دا, اۋىلدىڭ كىرە­بەرى­سىندە بوي كوتەرگەن جاڭا مەك­تەپ عيماراتى كوز تارتادى. جاڭا عيماراتتا 10 وقۋ كابينەتى, سونىڭ ىشىندە بىرىكتىرىلگەن حيميا-بيولوگيا, فيزيكا-ماتەماتيكا, تىلدەر, ينفورماتيكا جانە باستاۋىش سىنىپتار كابينەتتەرى بار ەكەن. بۇعان قوسا 2 شەبەرحانا, سپورتزال, كىتاپحانا, اسحانامەن جابدىقتالعان. جاڭا عيماراتتا اۋىلدىڭ 45 تۇرعىنى جۇمىس تاپقان.

– ءبىز شاعىن جيناقتى مەكتەپ­پىز, 23 ۇستاز, 43 وقۋشىمىز بار. مەكتەپالدى دايارلىق بولى­­مىندەگى 10 بالانى قوسقاندا, 53 بالامىز بار. ۇستازدار قۇرامى تولىق, پەدا­گوگ-زەرتتەۋشى, پەداگوگ-ساراپ­شى, پەداگوگ-مودەراتورلار بار. ۇجىم­نىڭ 70 پايىزى – كاتە­گوريا­لى, – دەيدى ەڭبەك نەگىزگى مەك­تەبىنىڭ ديرەكتورى وركەن بيجانوۆ.

وسى مەكتەپتىڭ بايىرعى قىز­مەت­كەرىنىڭ ءبىرى, 31 جىلدىق ەڭبەك ءوتى­لى بار رايا نۇرتاەۆامەن دە سوي­لەس­­تىك.

– بۇرىنعى عيماراتىمىز شا­عىن ءارى كونەلەۋ بولدى. بىراق ول كەزدە دە جامان بولعان جوقپىز. مەك­تەپتە 160-قا دەيىن وقۋشى بولاتىن. بالالار سىيماي, ەسىكتىڭ قىر كوزىنە دەيىن ءتىزىلىپ وتىرۋشى ەدى. كەيىن كەلە ازايدى. قازىر جوعارعى 8-9-سىنىپتاردا ءۇش-اق وقۋشىدان بار. بىراق باستاۋىش سىنىپتار كوبەيىپ كەلەدى. 2-سىنىپتا 8 وقۋشى, دايارلىق توبىندا 10 بالا بار. مەكتەبىمىزدىڭ ەكىنشى تىنىسى اشىلىپ, قايتادان وقۋشى كوبەيەتىنىنە سەنەمىن, – دەيدى رايا امانگەلدىقىزى.

– بۇل وسى اۋىلدا 50 جىلدان كەيىن سالىنىپ تۇرعان جاڭا مەكتەپ عيماراتى ەكەن. وركەنيەتتى ەلدەر قاتارىنا قوسىلۋ ءۇشىن بىزگە ءبىلىمدى ۇرپاق كەرەك. اۋىل مەن قالا بالالارىنىڭ ءبىلىم ايىرماشىلىعى بولماۋعا ءتيىس. بۇل – مەملەكەت باسشىسىنىڭ ءوزى تالاپ ەتىپ وتىرعان ماسەلە. بۇگىن شاعىن اۋىلدىڭ ۇلكەن قۋانىشىنا ورتاقتاسايىن دەپ ارنايى كەلدىم. ەلىمىزدە ءبىلىم سالاسىنا ەرەكشە كوڭىل ءبولىنىپ جاتىر. ۇستازداردىڭ جالاقىسى 100 پا­يىز كوتەرىلدى. ەندى تاربيەشىلەردىڭ جالاقىسى ءوسىپ جاتىر. از قام­تىل­عان, وسال توپ بالالارىنا تەگىن تاماق بەرىلەدى. وسىنىڭ ءبارى – مەملەكەتتىڭ قامقورلىعى. بيىل باتىس قازاقستان وبلىسىندا ءبىر جىلدا 27 مەكتەپ قۇرىلىسىن باس­تادىق. سونىڭ 17-ءسىن بيىل بىتىرەمىز. قازىر 12 مەكتەپتى سالىپ, تاپسىردىق. ەندى ۇستازدار قاۋىمىنان سۇرايتىنىم, جاس ۇرپاققا ساپالى ءبىلىم بەرىڭىزدەر! وسى مەكتەپتەن ءبىلىم الىپ شىق­قان جاستار ەلىمىزدىڭ ايتۋلى ازاماتتارى بولسىن! – دەدى وبلىس اكىمى ن.تورەعاليەۆ.

بۇدان كەيىن اۋىلى ءۇشىن جانى اۋى­ر­ا­تىن كەيۋانانىڭ سوزىنە قۇلاق تۇردىك.

– وسى قۋانىشتىڭ ءبارى رەسپۋب­ليكادان بەرى قاراي باسشى­لىقتىڭ بىرلىگىنىڭ ارقاسىندا بولىپ جاتىر. مۇنداي ۇلگىلى ىستەر بىرلىكپەن عانا بىتسە كەرەك. سونىڭ قادىرىن بىلەيىك. ءبىر-ءبىرىمىزدى قولداپ جۇرەيىك. جاقسى ءومىر سۇرەيىك. «ادال ارەكەتكە – باياندى بەرەكەت» دەيدى حالقىمىز. ءبىزدىڭ اۋىلدا ۇرپاقتار ساباقتاستىعى جاقسى ساقتالعان. بۇرىن كونە مەكتەپتە قىزمەت ەتكەن كارى مۇعالىمدەردىڭ بالالارى قازىر جاڭا مەكتەپتە ءبىلىم بەرىپ ءجۇر. كەرەمەت قوي! ەل ازباسىن, اۋىل توزباسىن. كۇننەن كۇنگە جاعدايىمىز جاقسارىپ كەلە جاتىر. ەندى ءبىر ءوتىنىشىم, جاس مۇعالىمدەر كەشكە دەيىن الاڭسىز ەڭبەك ەتۋ ءۇشىن بالاباقشا كەرەك. كەيبىر اۋىلداستار بالاسىن اقجايىققا سۇيرەيدى. كەيبىرى ۇيدە قالادى. نەشە ءتۇرلى وقيعانى ەستىپ جاتامىز. قۇداي ساقتاسىن, سوندىقتان قاۋىپتىڭ الدىن الۋ كەرەك, – دەيدى ءوڭىر باسشىسىنىڭ بىلەگىنەن ۇستاعان كارى ۇستاز كۇلاش سماعۇلقىزى.

اباي اۋىلىندا – اباي مەكتەبى

جوعارىدا ايتىلعان 27 مەك­تەپ­تىڭ ءبىرى اباي اۋىلىنداعى اباي مەكتەبىنىڭ عيماراتى ەكەن. اق­جايىق اۋىلدىق وكرۋگىنىڭ قۇرا­مىنا كىرەتىن شاعىن ەلدى مەكەن دە – جايىقتى جاعالاي ورنا­لاس­قان جايلى قونىستىڭ ءبىرى. ءاۋ باس­تا مەكتەپ 1952 جىلى اشىل­عان. كونە عيماراتى 1974 جىلى سا­لى­نىپ, نەبارى 60 ورىنعا ەسەپتەل­گەن, سپورتزالى, اكت زالى جوق بولا­تىن. 2023-2024 وقۋ جىلىندا بارلىعى 132 وقۋشى ءبىلىم السا, ولارعا 30 پەداگوگ مامان ساباق بەرىپ جاتىر.

«جايكسەلستروي» جشس سا­لىپ­ شىققان 108 ورىندىق جاڭا عيما­راتتا 9 وقۋ كابينەتى بار. سونىڭ ىشىندە بىرىكتىرىلگەن حيميا-بيولو­گيا, فيزيكا-ماتەماتيكا, قازاق ءتىلى, ورىس ءتىلى, شەتەل ءتىلى, مۋل­تي­مە­ديا كابينەتتەرى قا­راس­تى­رىلعان. سونىمەن قا­تار 2 شە­بەر­حانا, 1 سپور­تزال, 8 ورىن­دىق وقۋ زالى بار كىتاپحانا, 48 ورىندىق اسحا­نامەن جابدىقتالعان. مەكتەپ قۇرى­لىسىنا 807 ملن تەڭگە جۇم­سالعان.

– مەملەكەت باسشىسى قاسىم-جومارت توقاەۆ ەگەمەن ەلدىڭ كەلەشەك ۇرپاعىنا ۇلكەن سەنىم ءبىلدىرىپ, ء«بىلىمدى ءارى سانالى ۇرپاق تاربيەلەۋ – بۇل اسا ما­ڭىزدى مەملەكەتتىك مىندەت. ەلى­مىزدىڭ بولاشاعى دارىندى, وتان­شىل جاستاردىڭ قو­لىندا بولۋى كەرەك» دەگەن ەدى. وسىعان وراي مەم­لەكەت تاراپىنان پرەزيدەنتى­مىزدىڭ تاپسىرماسىنا سايكەس ءبىراز كۇردەلى ماسەلە قولعا الىندى. جىل باسىنان بەرى وبلىس­تا 10 مەكتەپتى قولدانىسقا بەرگەن ەدىك. جاڭا عانا ۇلكەن ەڭبەك اۋىلىندا 60 ورىندىق نەگىزگى مەكتەپ عيماراتىن اشتىق. ەندى, مىنە, اباي مەكتەبىنىڭ دە تۇساۋى كەسىلمەك. جىل سوڭىنا دەيىن تاعى 5 مەكتەپ تاپسىرىلادى, – دەدى ن.تورەعاليەۆ.

ءوڭىر باسشىسى كەلەر جىلى اباي مەكتەبىنىڭ اينالاسىن قور­شاپ, اباتتاندىرۋ ءۇشىن وبلىس بيۋدجەتىنەن قارجى قاراس­تىرى­لاتىنىن ايتتى. جاڭا مەكتەپ عيماراتىنىڭ اشىلۋ سالتاناتىندا وسى ءبىلىم ورداسىنىڭ ارداگەرى ەربولات قاپەز ۇلى قاراعويشين تەبىرەنىپ ءسوز سويلەدى.

– قادىرمەندى اۋىلداستارىم, بۇگىن – اباي اۋىلىنداعى اباي مەكتەبى ۇجىمى ءۇشىن دە, بۇكىل اۋىل ءۇشىن دە ۇلكەن قۋانىش. بۇل – ءبىزدىڭ اۋىلدا 71 جىلدان كەيىن قايتالانىپ وتىرعان زور قۋانىش. بالالارىمىز ءبىز ارمانداعان جاڭا مەكتەپتە وقيتىن بولدى. قۇرمەتتى ۇستازدار, مەن بۇگىن سىزدەرگە ۇلكەن امانات تاپسىرعىم كەلەدى. ول اماناتىم – بولاشاق جاس ۇرپاققا سانالى تاربيە, ساپالى ءبىلىم بەرىپ, ولاردى مەيىرىمدىلىككە, قا­يى­رىم­دى­لىققا تاربيەلەپ, جاڭا ادى­لەت­تى قازاقستاندى قۇرۋعا ۇل­كەن ۇلەس قوساتىن ۇرپاق دايىن­داسا­ڭىز­دار ەكەن دەيمىن! قيىن دا قى­زىعى مول قىزمەتىڭىزگە تولا­عاي تابىس تىلەيمىن. سىزدەردى قۋان­تاتىن شاكىرت­تەرىڭىز كوپ بولسىن! – دەدى قارت ۇستاز.

وسى ساپاردا ناريمان تورەعا­لي­ ۇلىنىڭ اۋزىنان ەستىگەنىمىز, وڭىردە «قالادان – اۋىلعا» اتتى جاڭا باعدارلاما قولعا الىنباق ەكەن. ونىڭ ءمانىسى – اۋىلدىق ەلدى مەكەندەردىڭ الەۋمەتتىك جاعدايىن كوتەرىپ, حالىقتى تۇراقتاندىرۋ.

– ءبىز بولاشاقتا الەۋمەتتىك نىسانداردى, تۇرعىن ۇيلەردى قالادان ەمەس, اۋىلداردان كوپتەپ سالا باستايمىز. مىسالى, سپورت كە­شەن­دەرى بارلىق 12 اۋداندا سا­لىندى. ەندى ۇلكەن ەلدى مەكەندەردە سالۋعا كىرىسىپ جاتىرمىز. مۇنداي سپورت كەشەنى جوق جەرلەردە اۋىل مەكتەبىنىڭ سپورتزالدارى كەشكىسىن جاستارعا اشىق بولادى. اۋىلدارعا تۇرعىن ءۇي سالا­مىز, جول اپارامىز, سۋ اپارا­مىز. الداعى 10-15 جىلدا ءبىز­دىڭ مەملەكەتىمىز ادام تانىماس­تاي وزگەرەدى. جاقسىلىقتى ايتا جۇرە­يىك! – دەيدى ءوڭىر باسشىسى.

باتىس قازاقستان وبلىسى