جاستار بويىندا وتانشىلدىق سەزىمدى قالىپتاستىرۋ جانە ولارعا اسكەري-پاتريوتتىق تاربيە بەرۋ – قاي ۋاقىتتا دا مەملەكەتىمىز ءۇشىن ماڭىزدى باسىمدىقتاردىڭ ءبىرى. وسى ماقساتتا بەس جىل بۇرىن قورعانىس مينيسترلىگى وزگە مەملەكەتتىك ورگاندارمەن بىرلەسىپ, «جاس سارباز» بالالار-جاسوسپىرىمدەر اسكەري-پاتريوتتىق قوزعالىسى» رەسپۋبليكالىق قوعامدىق بىرلەستىگىن قۇرعان بولاتىن.
«جاس سارباز» قوزعالىسىنىڭ ماقساتى – بالالاردى ەل تاريحىن قۇرمەتتەپ, اتا-بابالارىمىزدىڭ ەرلىككە تولى وتكەنىن ماقتان تۇتارلىق رۋحتا تاربيەلەۋ. وسىنداي تاربيە العان جاستار ناعىز پاتريوت بولىپ ءوسىپ, ەل تاۋەلسىزدىگىن ەڭ جوعارى قۇندىلىق دەپ تۇسىنەتىن بولادى», دەيدى اسكەري-پاتريوتتىق قوزعالىس توراعاسى, مايور مەيىربەك مەڭدىعاليەۆ.
بۇگىندە اسكەري-پاتريوتتىق كلۋبتىڭ ەلىمىزدەگى 20 فيليالىندا 280 مىڭنان استام بالا تاربيە الىپ جاتىر. بەس جىل ىشىندە قوزعالىس اياسىنا 9 مىڭعا جۋىق اسكەري-پاتريوتتىق ۇيىم ەنگەن. ونىڭ ىشىندە جۇزدەن استام ۇجىم اسكەري بولىمدەردە جۇمىس ىستەپ كەلەدى. وعان قالا مەكتەپتەرىندە اشىلعان «جاس سارباز» سىنىپتارى مەن «Smart sarbaz» ۇيىرمەلەرىن قوسۋعا بولادى.
«جاس سارباز» قوزعالىسى – 2025 جىلعا دەيىنگى جاستارعا اسكەري-پاتريوتتىق تاربيە بەرۋ باعدارلاماسىنىڭ نەگىزگى قۇرامداس بولىگى. مايور م.مەڭدىعاليەۆتىڭ ايتۋىنشا, بۇل قۇجات تاۋەلسىزدىك جىلدارىندا جيناقتالعان ءبىلىم مەن تاجىريبە, سونداي-اق اسكەري-پاتريوتتىق تاربيە داستۇرلەرى نەگىزىندە دايىندالعان. باعدارلامادا جاستاردىڭ كۇردەلى گەوساياسي جاعدايلاردا وتاندى قورعاۋعا دايىندىعىن قالىپتاستىرۋداعى ۇزدىكسىز تاربيە ءۇردىسىنىڭ ماڭىزى ەسكەرىلگەن. ول اسكەرگە شاقىرىلعانعا دەيىنگى جاستاردىڭ اسكەري قىزمەتكە ىنتاسى مەن دايىندىعىنا قاتىستى كوپتەگەن ماسەلەنى شەشۋدە مەملەكەتتىك قۇرىلىمدار مەن ازاماتتىق قوعامنىڭ ءوزارا ءىس-قيمىلىنىڭ نەگىزىن قالايدى.
سونىمەن قاتار توراعا قوزعالىستاعى تاربيە جۇمىستارى نەگىزگى باعىتتارعا بولىنەتىنىن اتاپ ءوتتى. ونىڭ ىشىندە ء«بىلىمدى «جاس سارباز» باعىتى بالالار, جاسوسپىرىمدەر مەن جاستار اراسىندا ءبىلىم بەرۋ كۋلتىن, تاريحي ءبىلىمدى, شەت تىلدەرىن, زاماناۋي تەحنولوگيالاردى مەڭگەرۋدى ناسيحاتتاۋعا, باسەكەگە قابىلەتتى تۇلعانى قالىپتاستىرۋعا ارنالعان. ال «سانالى «جاس سارباز» باعىتى وسكەلەڭ ۇرپاقتىڭ بويىندا جوعارى مورالدىق-ىسكەرلىك قاسيەتتەردى دامىتۋ, مادەني بىرەگەيلىكتى ساقتاۋ, ەتنوسارالىق تاتۋلىق پەن كەلىسىمدى نىعايتۋ ماقساتتارىن قامتيدى.
«جىگەرلى «جاس سارباز» جاستاردىڭ سالاماتتى ءومىر سالتى ۇستانۋىنا, دەنەشىنىقتىرۋمەن جانە سپورتپەن شۇعىلدانۋىنا, جوعارى ەرىكتى قاسيەتتەردى نىعايتۋعا دەگەن ۇمتىلىسىن جاپپاي قالىپتاستىرۋعا باعىتتالعان. «بولاشاعى جارقىن «جاس سارباز» وسكەلەڭ ۇرپاقتى تاريحقا, تاۋەلسىزدىك جەتىستىكتەرىنە باۋلۋعا, قازاقستاندىق ءپاتريوتيزمدى جانە ءوز وتانىنا دەگەن ادالدىقتى نىعايتۋعا نەگىزدەلگەن.
قورعانىس ءمينيسترى, گەنەرال-پولكوۆنيك رۋسلان جاقسىلىقوۆ بۇل باعىتتاعى ءىس-شارالارعا ءجىتى كوڭىل ءبولىپ كەلەدى. ادامدى پاتريوت ەتىپ قالىپتاستىراتىن كۇش – ءتالىم-تاربيە, ساپالى ءبىلىم, سانالى ورتا جانە جاۋاپكەرشىلىك. قورعانىس ءمينيسترى جاس وتان قورعاۋشىلاردىڭ تاربيەسىندە وسى قاعيدالارعا بارىنشا باسىمدىق بەرىپ وتىر.
بۇل تۇرعىدا رەسپۋبليكالىق اسكەريپاتريوتتىق قوزعالىستىڭ ىرگەتاسىن قالاۋشى ءارى العاشقى كۇننەن قوعامدىق ۇيىمنىڭ توراعاسى, قورعانىس ءمينيسترىنىڭ ورىنباسارى, گەنەرال-لەيتەنانت مۇحامەدجان تالاسوۆتىڭ ەڭبەگىن ەرەكشە اتاپ ءوتتى.
بۇگىندە جاس سارباز بولىپ تاربيەلەنىپ جاتقان ءاربىر ءجاسوسپىرىم اسا ماقتانىشپەن كيەتىن, جاي عانا كيىم ەمەس, ۇلتتىق رۋح پەن قازاقستاندىق پاتريوتتار كەلبەتىنىڭ كوركىن اشاتىن «جاس سارباز» فورماسى بەكىتىلدى. كەۋدەسىندە ەلدىڭ ابىرويى مەن ەگەمەندىگىن ارقالايتىن ءاربىر جاستىڭ تەگى كورسەتىلەتىن بۇل كيىم ۇلگىسى جاس ساربازداردىڭ قۇرمەتتى كيىم ۇلگىسىنە اينالدى. سونىمەن قاتار ارقاشان باعا جەتپەس تىنىشتىق پەن بىرتۇتاستىقتى, بۇلتسىز اشىق اسپاندى, ەلىمىزدىڭ تاۋەلسىزدىگىن, بەيبىت كۇندى بەينەلەيتىن, ايبىندىلىقتى, قۋاتتىلىق پەن نىق قوزعالىستى, كوشباسشىلىقتى, كۇش پەن جىگەرلىلىكتى سيپاتتايتىن «جاس سارباز» قوزعالىسىنىڭ لوگوتيپى بەكىتىلگەن.
«جاس سارباز» قوزعالىسى تەك پاتريوتتىق تاربيە بەرەتىن ۇيىم عانا ەمەس, بۇل كەمەل كەلەشەككە دەگەن ورتاق ماقساتى بار جاستاردىڭ ورتاسىنا اينالعانىن ايتا كەتۋ كەرەك», دەيدى قوزعالىس توراعاسى. – بۇل رەتتە جاس پاتريوتتىڭ بەينەسىن قالىپتاستىرۋدا 2015 جىلدان بەرى ءوتىپ كەلە جاتقان «ايبىن» رەسپۋبليكالىق اسكەري-پاتريوتتىق جيىنى دا ەرەكشە ورىن الادى».
2019 جىلى پرەزيدەنت – قارۋلى كۇشتەردىڭ جوعارعى باس قولباسشىسى قاسىم-جومارت توقاەۆتىڭ قاتىسۋىمەن V «ايبىن» رەسپۋبليكالىق اسكەري-پاتريوتتىق جاستار جيىنى وتكەنى بەلگىلى. وندا مەملەكەت باسشىسى «جاس سارباز» قوزعالىسىنىڭ تاربيەلەنۋشىلەرىمەن بىرگە اسكەري-پاتريوتتىق جيىننىڭ اشىلۋىندا « ۇلى دالا جاس ساربازى – 2050» ۋاقىت كاپسۋلاسىن سالدى.
«جاس سارباز» قوزعالىسىنىڭ بازاسىندا «Smart sarbaz» ۇيىرمەلەرىن قۇرىلۋىنا دا قاسىم-جومارت توقاەۆ 2019 جىلعى مامىردا قورعانىس مينيسترلىگىنىڭ كەڭەيتىلگەن القا وتىرىسىندا باستاماشىلىق ەتكەن بولاتىن. كادرلار دايارلاۋ جانە اسكەري-پاتريوتتىق تاربيە بەرۋ شەڭبەرىندە «Smart sarbaz» بولاشاق اسكەري ينجەنەرلەردى, IT-مامانداردى, روبوتتەحنيكتەردى, جاساندى ينتەللەكت بويىنشا مامانداردى تاربيەلەۋ قاجەتتىگىن اتاپ وتكەن پرەزيدەنت مۇنداي ۇيىرمەلەردى ەڭ الدىمەن فيزيكا-ماتەماتيكالىق بەيىمدىلىگى بار مامانداندىرىلعان مەكتەپتەردە قۇرۋ قاجەت ەكەنىنە توقتالدى.
«Smart sarbaz» ۇيىرمەلەرىندە پاتريوتتىق ءىس-شارالاردان بولەك بالالار جاڭا يننوۆاتسيالاردى يگەرىپ, وزدەرىنىڭ تەحنيكالىق يدەيالارىن ىسكە اسىرادى, – دەيدى قوزعالىس توراعاسى. – بۇل رەتتە, جۇمىستى تالداۋ ناتيجەلەرى جالپى ءبىلىم بەرەتىن مەكەمەلەردەگى اسكەري-پاتريوتتىق كلۋبتار, «جاس سارباز» سىنىپتارى جانە «Smart sarbaz» ۇيىرمەلەرى سانىنىڭ 2018 جىلعى 2828-دەن 2,5 ەسە ءوسىپ, بيىل 5 مىڭعا دەيىن جەتۋى بۇل باعىتتاعى وڭ ديناميكانى كورسەتەدى».
سونداي-اق مايور م.مەڭدىعاليەۆ «جاس سارباز» قوزعالىسى اياسىندا بەلگىلى ءبىر ناتيجەلەرگە قول جەتكىزىلگەنىن دە اتاپ ءوتتى. بىرىنشىدەن, وقۋشىلاردىڭ ساباق ۇلگەرىمى ارتىپ, ءتارتىبى جاقسارعان. بالالار مەن جاسوسپىرىمدەر قىلمىسىنىڭ دەڭگەيى 26,8 پايىزعا تومەندەگەن. «جاس ۇلان» رەسپۋبليكالىق اسكەري مەكتەپتەرىندە, اسكەري كوللەدجدەردە جانە ەلىمىزدىڭ جوعارى اسكەري وقۋ ورىندارىندا ءبىلىم العىسى كەلەتىن جاسوسپىرىمدەر سانى ايتارلىقتاي كوبەيدى. العاشقى ناتيجەسى دە جوق ەمەس. ماسەلەن, ارىس قالاسىنان «ۇزدىك سارباز» اتالىمى بويىنشا 2020 جىلعى «ايبىن» جيىنىنىڭ جەڭىمپازى مەيىرحان ءتولباسى قۇرلىق اسكەرلەرىنىڭ اسكەري ينستيتۋتىنا وقۋعا ءتۇستى. باتىس قازاقستان وبلىسى «جاس سارباز» قوزعالىسى فيليالىنىڭ توراعاسى شاۆكات جۇماليەۆ دەسانتتىق-شابۋىلداۋ اسكەرلەرىندە مەرزىمدى قىزمەت اتقارىپ, اتالعان اسكەري وقۋ ورنىنىڭ كۋرسانتى اتاندى.
ءار جىلدارداعى «ايبىن»» جيىنىنىڭ جەڭىمپازدارى شەتەلدە اسكەري ءىستى ۇيرەنۋگە مۇمكىندىك الدى. مىسالى, رۇستەم جادىگەر رەسەي فەدەراتسياسى قورعانىس مينيسترلىگىنىڭ اسكەري ۋنيۆەرسيتەتىنە قابىلدانسا, دميتري يايتسكي ءنوۆوسىبىر جالپىاسكەري كوماندالىق ينستيتۋتىندا, ال داۋلەت ايداربەكوۆ سانكت-پەتەربۋرگ قالاسىنداعى اسكەري-تەڭىز ينستيتۋتىندا وقىپ جاتىر. جامبىل وبلىسى «جاس سارباز» قوزعالىسى فيليالىنىڭ توراعاسى دۋلات ءابدىسامات قازىر مەملەكەتتىك كۇزەت قىزمەتىندە ەڭبەك ەتەدى. «ايبىن-2022» جەڭىمپازى, جەتىسۋ وبلىسى «جاس سارباز» قوزعالىسىنىڭ تاربيەلەنۋشىسى سۇلتان سەرىك ۇلى – بۇگىندە راديوەلەكترونيكا جانە بايلانىس اسكەري ينستيتۋتىنىڭ كۋرسانتى.
باتىل ارەكەتىمەن جول-كولىك وقيعاسىنىڭ الدىن العان «جاس سارباز» اسكەري-پاتريوتتىق كلۋبىنىڭ تاربيەلەنۋشىسى, الماتى وبلىسىنىڭ ىلە اۋدانىنا قاراستى وتەگەن باتىر كەنتىندەگى №24 ليتسەيدىڭ 8-سىنىپ وقۋشىسى اقجول گەرويدىڭ ەرلىگىن بۇگىندە بۇكىل ەل بىلەدى. قورعانىس ءمينيسترى رۋسلان جاقسىلىقوۆ سىندارلى ساتتە اتىنا زاتى ساي ناعىز باتىر ەكەنىن دالەلدەگەن جاس باتىردى «ەل قورعانى» مەدالىمەن ماراپاتتادى.