باتىس قازاقستان وبلىسى بايتەرەك اۋداندىق مادەنيەت ۇيىندە «كىتاپ-اmanat» جوباسى اياسىندا كىتاپ ورتالىعى اشىلدى.
«Amanat» پارتياسىنىڭ ەلىمىزدە وقۋ مادەنيەتىن دامىتۋعا جانە وتاندىق ادەبيەتتى قولداۋعا باعىتتالعان جاڭا الەۋمەتتىك جوباسى باتىس قازاقستان وبلىسىندا ۇلكەن شاھاردان ەمەس, شەكارالاس ەلدى مەكەننەن باستاۋ الدى. الماتىدان اكەلىنگەن 600-گە جۋىق جاڭا كىتاپ توپتاماسىندا بالالار ادەبيەتى دە, كلاسسيكالىق شىعارمالار دا, جەرگىلىكتى قالامگەرلەردىڭ تۋىندىلارى دا بار. بۇل جوبانىڭ ەڭ باستى ەرەكشەلىگى – كىتاپتار دەلدالسىز, باسپاحانا باعاسىمەن ساتىلماق. ونىڭ ۇستىنە جاڭا ورتالىقتا ادەبيەتتى ناسيحاتتايتىن, كىتاپ وقۋعا دارىپتەيتىن ءىس-شارالاردى جۇيەلى تۇردە وتكىزۋ جوسپارلانعان.
كىتاپ ورتالىعىنىڭ اشىلۋ سالتاناتىنا «Amanat» پارتياسىنىڭ حاتشىسى شولپان كارينوۆا ارنايى قاتىسىپ, جوبانىڭ ماقسات-مىندەتىن ايتىپ ءوتتى.
– بۇگىنگى ءىس-شارانىڭ باستى ماقساتى – قوعامىمىزدى رۋحانياتقا جاقىنداتۋ, كىتاپ وقۋ مادەنيەتىن ارى قاراي دامىتۋ, ەلىمىزدى كىتاپ وقيتىن ۇلتقا اينالدىرۋ. سوندىقتان بۇل ءبىزدىڭ پارتيالىق 17 جوبانىڭ ىشىندەگى ۇلكەن يدەولوگيالىق باعىتىنىڭ ءبىرى بولىپ وتىر, – دەيدى ش.تاڭاتقىزى.
بۇل كۇنى قازاقستان جازۋشىلار وداعى باتىس قازاقستان وبلىستىق فيليالىنىڭ توراعاسى, جازۋشى-جۋرناليست, «ورال ءوڭىرى» گازەتىنىڭ باس رەداكتورى باۋىرجان عۇبايدۋللين, اۋداندىق ارداگەرلەر كەڭەسىنىڭ مۇشەسى, ارداگەر ۇستاز نيكولاي انتسيپروۆيچ جانە باسقا دا قالامگەرلەر مەن زيالى قاۋىم وكىلدەرى, اۋىلدىڭ جاس اقىندارى وسى ورتالىقتان تابىلدى.
اق جايىق وڭىرىندەگى العاشقى كىتاپ ورتالىعىنىڭ بايتەرەكتە اشىلۋى تەگىن ەمەس. ويتكەنى بۇل اۋدان – شەكارا شەبىندەگى ايماق. رۋحاني قازىنا, قازاق ادەبيەتىنىڭ جاڭا تۋىندىلارى ەلىمىزدىڭ رۋحاني كۇزەتىندە دە قىزمەت ەتەتىن بولادى.
– بۇگىننەن باستاپ بۇل ورتالىق جاستاردىڭ دا رۋحاني قازىعىنا اينالادى. الداعى ۋاقىتتا بۇل جەردە كىتاپ وقۋعا دارىپتەيتىن ءىس-شارالاردى جۇيەلى تۇردە وتكىزىپ وتىرامىز, – دەيدى باۋىرجان مومىش ۇلى اتىنداعى مەكتەپتىڭ جاس مۇعالىمى قۇباش رايىمبەك.
ءىس-شارا كەزىندە پارتيا مەن باسپاگەرلەر, پوليگرافيستەر جانە كىتاپ تاراتۋشىلار قاۋىمداستىعى اراسىندا ءوزارا ىنتىماقتاستىق تۋرالى مەموراندۋمعا قول قويىلدى. ياعني ورتالىقتىڭ كىتاپ قورى ۋاقتىلى تولىقتىرىلادى ءارى باعاسى دا ۇستەمەسىز ارزان بولادى دەگەن ءسوز.
باتىس قازاقستان وبلىسى