قىلمىسقا قارسى كۇرەستە الدىڭعى شەپتەن كورىنىپ, بەيبىت تۇرعىنداردىڭ ۇيقىسى تىنىش بولۋى ءۇشىن قاۋىپسىزدىكتى كۇزەتەتىن ارنايى جاساقتىڭ قيىن ءارى جاۋاپتى قىزمەتى تۋرالى كوركەم دۇنيە كوگىلدىر ەكراندا كوپ ەمەس. ۇستارانىڭ جۇزىندە تۇرعانداي, ءوز ءومىرىن قاتەرگە تىگە وتىرىپ, جانىن شۇبەرەككە ءتۇيىپ ءجۇرىپ, شيەلەنىس ءتۇيىنىن شەشەتىن سىندارلى ءسات ارنايى جاساق ساربازدارى قىزمەتىنىڭ نەگىزگى قىرى ەكەنى بارشاعا ايان.
مەملەكەت قاۋىپسىزدىگى مەن ەل تۇرعىندارىنىڭ ومىرىنە قاۋىپ توندىرەتىن قىلمىستارعا قارسى جەدەل ارەكەت ەتەتىن «بۇركىت» ارنايى جاساعى تۋرالى جارىققا شىققان جاڭا تۋىندى – وسى بوس كەڭىستىكتى تولتىرۋعا باعىتتالعان وتاندىق كينەماتوگرافياداعى ءۇشىنشى فيلم. مادەنيەت جانە اقپارات مينيسترلىگىنىڭ تاپسىرىسىمەن, ۇلتتىق كينونى قولداۋ مەملەكەتتىك ورتالىعىنىڭ قارجىلاندىرۋىمەن تۇسىرىلگەن كينوكارتينا بولعان وقيعالاردىڭ نەگىزىندە جانكەشتى جاساقتىڭ قات-قابات, قاۋىرت جۇمىسىن بوياماسىز باياندايدى.
ۇلتتىق كينونى قولداۋ مەملەكەتتىك ورتالىعى باسقارما توراعاسى قۇرمانبەك جۇماعاليدىڭ ايتۋىنشا, بۇگىنگى كورەرمەننىڭ تالعامى بيىك, سۇرانىسى جان-جاقتى. سوندىقتان, كورەرمەنگە ءارتۇرلى جانرداعى, وسىنداي ءتۇرلى تريۋكقا تولى ەكشن فيلمدەردى دە ۇسىنعان ءجون. فيلمدە «بۇركىت» ارنايى جاساعىنىڭ ساربازدارى «كۇرەڭ بەرەت» كيۋ قۇقىعىنا يە بولۋ ءۇشىن سىنعا تۇسەدى.
«ەلىمىزدە 200-گە جۋىق «كۇرەڭ بەرەت» يەگەرى بار ەكەن. كۇرەڭ بەرەت كيۋ مارتەبەسىنە ارنالعان بىلىكتىلىك سىناعىنان ءوتۋ – جاۋىنگەرلىك رۋحتىڭ بەلگىسى. سوندىقتان, جاڭا ءفيلمىمىز جاستاردى وتانعا دەگەن ادالدىق پەن رياسىز ماحابباتقا تاربيەلەيدى دەپ سەنەمىز», دەدى قۇرمانبەك جۇماعالي.
ءفيلمنىڭ رەجيسسەرى – دانيار يبراگيموۆ, بۇل كارتينا ونىڭ دەبيۋتتىك جۇمىسى. بۇعان دەيىن دانيار «قازبات» جانە «التىنشى بەكەت» اسكەري فيلمدەرىنىڭ پروديۋسەرى بولىپ, تىڭ تاقىرىپتا ەلەۋلى تاجىريبە جيناقتاعان.
فيلمگە داۋرەن سەرعازين, سانجار ءمادي, اسىلحان تولەپوۆ, گۇلناز جولانوۆا, اسەل ساعاتوۆا, جاندوس ايباسوۆ جانە ازامات ساتىبالدى سىندى ەلىمىزدىڭ تانىمال اكتەرلەرى ءتۇستى. سونىمەن بىرگە قازاق مۋزىكاسىنا جاڭا ستيل سىيلاعان بەلگىلى ەسترادا ءانشىسى عالىمجان مولدانازاردىڭ دا انتاگونيست كەيىپكەردىڭ رولىندە كورىنۋى فيلم شىنايىلىعىن ارتتىرا تۇسكەن. باستى رولدەگى اكتەرلەر ءتۇسىرىلىم جۇمىستارىنا كىرىسپەس بۇرىن بىرنەشە اپتا بويى جاۋىنگەرلىك وقۋ-جاتتىعۋلارىنا قاتىسىپ, اسكەري ارەكەتتىڭ ءادىس-تاسىلدەرىن ۇيرەنگەن.
«فيلمگە ءتۇسۋ ءۇشىن ءبىز ارنايى نورماتيۆتەردى تاپسىردىق. شىنايى ساربازداردان ايىرماشىلىعىمىز بولماۋى ءۇشىن ولاردىڭ كۇندەلىكتى تىنىس-تىرشىلىگىمەن جەتە تانىستىق. ءتۇسىرىلىم اياقتالعانشا 30 كيلودان اۋىر فورمانى كيىپ جۇردىك. ءبىر ەپيزودتىڭ ءتۇسىرىلىمى كەزىندە ارقامدى وڭباي جاراقاتتاپ الدىم. ءبىر اپتا بويى ەم الۋىما تۋرا كەلدى. كاسكادەر جاسايتىن بارلىق تريۋكتى ءوزىم ورىنداۋعا تىرىستىم», دەيدى باس كەيىپكەرلەردىڭ ءبىرى سانجار ءمادي.
«Burkit» ءفيلمىنىڭ تۇسىرىلىمىنە ارنايى جاساق, اسكەري تەحنيكا جانە اۆياتسيا, سونداي-اق ەكى جۇزدەن استام بەلسەندى اسكەري قىزمەتشى قاتىسقان. جەدەل-ىزدەستىرۋ شارالارىنا ارقاۋ بولعان كارتينانىڭ ءتۇسىرىلىمى الماتى وبلىسىنىڭ كورىكتى جەرلەرىندە, قوناەۆ قالاسىندا, ەسىك كولىنىڭ تاۋ سىلەمدەرىندە جانە ىلە وزەنىنىڭ بويىندا وتكەن.
«Burkit» ەكشن ءفيلمى 2 قاراشادان باستاپ بارلىق كينوتەاتردا قازاق جانە ورىس تىلدەرىندە كورسەتىلەدى.
الماتى