سەنات توراعاسى ماۋلەن اشىمباەۆ Digital Nomads قاۋىمداستىعىنىڭ وكىلدەرىمەن كەزدەستى. بۇل – شەتەلدە تۇراتىن جانە الەمنىڭ جەتەكشى تەحنولوگيالىق كومپانيالارىندا جۇمىس ىستەيتىن ازاماتتارىمىزدى بىرىكتىرەتىن جوبا. ولار قازىر ەلوردامىزدا ءوتىپ جاتقان Digital Bridge حالىقارالىق تەحنولوگيالىق فورۋمىنا قاتىسۋ ءۇشىن استاناعا ارنايى كەلگەن.
پالاتا سپيكەرى سوڭعى جىلدارى Digital Bridge فورۋمى ايتارلىقتاي كەڭەيىپ, IT-يندۋستريانى دامىتۋ سالاسىندا تانىمال جانە بەدەلدى الاڭعا اينالعانىن ايتتى. بيىل اتالعان فورۋمعا 20 مىڭنان استام ادام قاتىسىپ جاتىر. ولاردىڭ قاتارىندا 300-دەن استام IT-كومپانيانىڭ وكىلدەرى مەن 30 ەلدەن كەلگەن دەلەگاتسيا مۇشەلەرى بار.
سەنات توراعاسى ەلىمىزدە ءىت سالاسىنا جوعارى دەڭگەيدە باسا ءمان بەرىلىپ كەلە جاتقانىن تىلگە تيەك ەتتى. ەلىمىز ەلەكتروندى ۇكىمەت پەن فينتەحتى دامىتۋ يندەكسى بويىنشا الەمدىك كوشباسشىلار قاتارىندا ەكەنىن جەتكىزدى.
«مەملەكەت باسشىسى تاياۋدا جاريالاعان جولداۋىندا ءىت سالاسىنا ەرەكشە كوڭىل ءبولدى. پرەزيدەنتىمىز 2026 جىلعا قاراي ءىت قىزمەتتەرىنىڭ ەكسپورتىن ءبىر ميلليارد دوللارعا جەتكىزۋ جونىندە ستراتەگيالىق مىندەت جۇكتەدى. وسىعان بايلانىستى پارلامەنتتىڭ الدىندا اتالعان تاپسىرمانىڭ ورىندالۋىن قاجەتتى قۇقىقتىق بازامەن قامتاماسىز ەتۋ مىندەتى تۇر. ەلىمىزدەگى قازىر قولدانىستاعى جانە قالىپتاسىپ جاتقان قۇقىقتىق جاعداي حالىقارالىق كومپانيالاردىڭ ءبىزدىڭ نارىققا كەلۋىن ىنتالاندىرۋى كەرەك. سونداي-اق قازاقستاندىق IT-كومپانيالاردىڭ دامۋىنا ىقپال ەتۋگە ءتيىس», – دەدى ماۋلەن اشىمباەۆ.
كەزدەسۋ بارىسىندا قازاقستاندا IT-سالانى قوعامنىڭ سۇرانىستارى مەن جاھاندىق ترەندتەردى ەسكەرە وتىرىپ دامىتۋدىڭ كەلەشەگى تالقىلاندى. جاساندى ينتەللەكتتىڭ دامۋىنا قاتىستى سىن-قاتەرلەر دە نازاردان تىس قالعان جوق. سونىمەن قاتار ءىس-شارادا جاستار ءوز تاجىريبەلەرىمەن ءبولىسىپ, سالانىڭ ساپاسىن ارتتىرۋعا ارنالعان جوبالاردى ىسكە اسىرۋ جونىندەگى ۇسىنىستارىن ورتاعا سالدى.