جەتىسۋدا نوسەرلەپ قۇيعان جاۋىن-شاشىننىڭ سالدارىنان بىرنەشە ەلدى مەكەندى اعىن سۋ باسىپ, تۇرعىندار ابىگەرگە ءتۇستى. قۋانىشقا وراي, قازا تاپقاندار جوق, جاۋاپتى ماماندار جانتالاسا جۇرتتى قاۋىپسىز جەرگە كوشىردى. جەدەل شتاب قۇرىپ, وبلىس اكىمى بەيبىت يساباەۆ ارنايى جيىن وتكىزدى. قازىر, تابيعي اپات سەيىلگەنىمەن, جەتىسۋلىقتارعا ءالى دە ساق بولعان ءجون.
بەيۋاق توقتاۋسىز جاۋعان جاۋىن القام-سالقام حالىقتىڭ توبەسىنەن جاي تۇسكەندەي اسەر ەتتى. جولعا شىققان جولاۋشىلار قايدا بارارىن بىلمەي, جاڭبىردىڭ باسىلعانىن كۇتكەنىمەن, جاعداي ۋشىعىپ كەتتى. سايداعى اۋىل كوشەلەرىن سۋ باسىپ, ءۇيدىڭ ىرگەسى لايعا تولدى. وسىعان بايلانىستى وبلىس اكىمىنىڭ ورىنباسارى الىبەك جاقانباەۆتىڭ توراعالىعىمەن جەدەل شتاب قۇرىلىپ, قۇتقارۋ جۇمىستارى جۇرگىزىلدى.
وبلىستىق توتەنشە جاعدايلار دەپارتامەنتىنىڭ مالىمەتىنە قاراعاندا, تۇسكى ساعات 12:36-دا ەسكەلدى اۋدانىنىڭ ەشكىولمەس اۋىلىندا اۋلالارعا سۋ كىرگەنى تۋرالى قوڭىراۋ تۇسكەن. اتالعان اۋىلدا 40 اۋلادا وسىنداي جاعداي ورىن العان. وسىنداي اقپارات ساعات 13:54-تە كوكسۋ اۋدانى مامبەت اۋىلىنان دا تۇسكەن. بۇل اۋىلدا 5 اۋلانى سۋ باسقانى انىقتالدى. ودان بولەك «تالدىقورعان – ۇشتوبە» وبلىستىق ماڭىزداعى اۆتوكولىك جولىنىڭ 35-شاقىرىمىندا نوسەر جاۋىننىڭ سالدارىنان ەڭىس اعىنى پايدا بولعانى بەلگىلى بولدى. سونىڭ سالدارىنان تيۋبينگ وتكەلى جولعا قۇيىلعان بيىكتىگى 10-15 سم جاۋىن سۋىنىڭ ەكپىنىنە شىداماعان. جاڭبىر سۋى قاراتال وزەنىنىڭ ءتۇسىرۋ ارناسىنا كەتەدى.
وبلىس اكىمىنىڭ ءباسپاسوز قىزمەتىنىڭ مالىمەتىنشە, قازىر وقيعا ورىن العان ەلدى مەكەندەردە تجد كۇشى مەن قۇرالدارى جۇمىلدىرىلعان. سونىڭ ىشىندە ارنايى قۇرالدارمەن جاراقتانعان 103 قۇتقارۋشى مەن ارنايى تەحنيكالار ىسكە كىرىستى. وعان قوسا پد, جەرگىلىكتى اتقارۋشى ورگاندار, «قازسەلدەنقورعاۋ» مەكەمەسى, 18386 اسكەري ءبولىمى, ت.ب. قۇرىلىمدار جۇمىلدىرىلدى. قازىر وقيعا ورىندارىندا ينجەنەرلىك جۇمىستار, ءىشىنارا تۇرعىنداردى ەۆاكۋاتسيالاۋ, سۋ شىعارۋ جۇمىستارى ءجۇرىپ جاتىر.
ەسكەلدى اۋدانىنىڭ ەشكىولمەس جانە اباي اۋىلدارىنداعى توتەنشە جاعدايعا بايلانىستى اۋلالارىن سۋ باسقان اۋىل تۇرعىندارىن اۋدان اكىمدىگى جەدەل شتابتىڭ شەشىمىمەن قارابۇلاق اۋىلىنداعى شەستاكوۆ اتىنداعى مەكتەپكە ورنالاستىرا باستادى. ولارعا سول جەردەن ىستىق تاماق, جاتىن ورىن ۇيىمداستىرىلادى. اۋدان اكىمدىگىنىڭ مالىمەتىنشە, قازىرگى كەزدە 19 ادام مەكتەپكە جايعاستىرىلدى. ونىڭ 10-ى ەرەسەك ادام, 9-ى بالا.
ەسكەلدى اۋدانىنىڭ اكىمدىگى توتەنشە جاعداي دەپارتامەنتىمەن بىرگە نوسەر جاۋىننان بولعان توتەنشە جاعدايدىڭ سالدارىن جويۋعا بار كۇش پەن تەحنيكانى جۇمىلدىرۋدا. سونىمەن قاتار ارىق جۇيەلەرىن تازارتۋ مەن اۋلالاردى باتپاقتان تازارتۋ جۇمىستارىنا ۇلتتىق گۆارديانىڭ 5514 اسكەري ءبولىمى, قورعانىس مينيسترلىگىنىڭ 18386 اسكەري ءبولىمى تارتىلدى.
جەدەل شتاب جەتىسۋ وبلىسىنىڭ پد-سىنا توناۋشىلىقتى بولدىرماۋ ءۇشىن قوعامدىق ءتارتىپتى ساقتاۋ مىندەتتى. ەسكەلدى اۋداندىق اكىمدىگى كەلتىرىلگەن شىعىندى ەسەپتەۋ ءۇشىن ارنايى كوميسسيا قۇردى, كوميسسيا شىعىندى انىقتاۋ ءۇشىن ەلدى مەكەندەردىڭ اۋلالارىن ارالاپ ءجۇر. سۋ باسقان تۇرعىن ۇيلەردىڭ جاي-كۇيىن زەردەلەۋدىڭ ناتيجەسىندە توتەنشە جاعدايدىڭ سالدارىن جويۋ ءۇشىن قارجى ءبولۋ ماسەلەسى قاراستىرىلادى.ءوز كەزەگىندە تاتەك مەكەمەسى دە ەلەكتر جەلىلەرىن تەكسەرىپ, ەلدى مەكەندەردى ەلەكتر جۇيەسىنە قوسۋ جۇمىستارىن اتقارادى.
قاراتال اۋدانىندا نوسەر جاۋىن مەن قاتتى جەلدىڭ سالدارىنان زاقىمدانعان ەلەكتر جەلىسى قالپىنا كەلتىرىلىپ, اۋدانعا ەلەكتر جارىعى بەرىلدى. ال ەلتاي اۋىلدىق وكرۋگىنە قاراستى اباي اۋىلىنىڭ ۇزىلگەن ەلەكتر جەلىسىنە اپاتتىق بريگادا جوندەۋ جۇرگىزۋدە. وبلىستىق ەنەرگەتيكا جانە تۇكش باسقارماسىنىڭ باسشىسى اسەت قاناعاتوۆتىڭ سوزىنە سۇيەنسەك, تالدىقورعان – ۇشتوبە 110 كۆ جوعارى ۆولتتى جەلىسىنىڭ بويىنداعى اپاتتىق ورىندى كەزەكشى بريگادا ساعات 15.05-تە انىقتاپ, قالپىنا كەلتىرۋ جۇمىستارىن اتقارعاننان كەيىن ساعات 19.05-تە قاراتال اۋدانىنا تۇتاستاي ەلەكتر جارىعى بەرىلگەن. «وعان دەيىن ءبىز قاراتال اۋدانىنىڭ ومىرلىك ماڭىزى بار نىساندارىن كوكسۋ اۋدانىنىڭ جەلىسى ارقىلى ەلەكترمەن ۋاقىتشا قامتىدىق. قازىر اۋدانعا ەلەكتر جارىعى تولىق ءۇزىلىسسىز بەرىلدى», دەدى ءا.قاناعاتوۆ.
سونىمەن قاتار «تالدىقورعان –ۇشتوبە» اۆتوجولىنىڭ 35-شاقىرىمىندا بولعان ەلەكتر جەلىلەرىنىڭ ءۇزىلۋى مەن باعانالاردىڭ زاقىمدانۋى سالدارىنان جول ارالىعىنداعى اباي اۋىلىنىڭ دا جارىعى سونگەن بولاتىن. بۇل جەردە 7 باعانا زاقىمدانىپ, 13 ارالىق ۇزىلگەن. وسىعان بايلانىستى قازىر جوندەۋ جۇمىستارى ءجۇرىپ جاتىر.
جەتىسۋ وبلىسى