ازەربايجان پرەزيدەنتى يلحام اليەۆ شۋشا جاھاندىق مەديا فورۋمىندا ورتالىق ازيا مەملەكەتتەرىمەن سەرىكتەستىك قارقىندى دامىپ كەلە جاتقانىن ايتتى, دەپ حابارلايدى Egemen.kz.
يلحام اليەۆ ەكىنشى قاراباق سوعىسىنان كەيىن قولداۋ بىلدىرگەن ەلدەردى اتادى.
«قازاقستان فيزۋلي اۋدانىندا جاستار شىعارماشىلىق ورتالىعىن, وزبەكستان مەكتەپ سالىپ جاتىر. مەكتەپ تامىزدا, ال ورتالىق جىل سوڭىنا دەيىن دايىن بولادى. بۇل - قولداۋدىڭ سيمۆولى. سوعىستان كەيىن شەت ەلدەر قانشاما قولداۋ ءبىلدىردى. اتاپ ايتايىن, بۇل وتە ماڭىزدى قيمىل ءارى ىنتىماقتاستىقتىڭ ۇلگىسى بولدى», دەدى ازەربايجان پرەزيدەنتى.
ايتا كەتەيىك, وتكەن جىلى قازاقستان پرەزيدەنتىنىڭ شەشىمىمەن فيزۋلي قالاسىندا قۇرمانعازى اتىنداعى شىعارماشىلىقتى دامىتۋ ورتالىعىنىڭ ىرگەسى قالانعان ەدى.
مەملەكەت باسشىسى قازاق حالقىنىڭ اتىنان جاسالعان بۇل سىيلىق قوس ەل اراسىنداعى دوستىقتىڭ, باۋىرلاستىقتىڭ جانە ءوزارا قولداۋدىڭ تاعى ءبىر نىشانى بولاتىنىن اتاپ وتكەن.
ونەر ورتالىعىنىڭ جالپى اۋدانى – 3100 شارشى مەتر. ەكى قاباتتى عيمارات 600 ادامعا ارنالعان. ورتالىق وسى جىلدىڭ جەلتوقسانىندا پايدالانۋعا بەرىلەدى.