ءبىر كۇندىك اكتسيا الماتىدا دا ءساتتى ءوتتى. مۋزەيى كوپ شاھاردىڭ تۇرعىندارى بۇل مەرەكەنى اسىعا كۇتەدى. رۋحانياتتىڭ باعا جەتپەس بايلىعىن كوزدىڭ قاراشىعىنداي ساقتاپ, ونەر مەن مادەنيەتتىڭ شىراقشىسى مىندەتىن ابىرويلى اتقارىپ, كاسىبي مەرەكەسىن بۇكىلحالىقتىق ايتۋلى شاراعا اينالدىرا بىلگەن مۋزەي قىزمەتكەرلەرى بۇل كۇنى كەلگەندەرگە ەسىگىن اقىسىز ايقارا اشادى.
ادام اياعى سيرەكتەۋ كەلەتىن مادەنيەت مەكەمەسىنە قوناقتاردى تارتۋ ماقساتىندا ويلاپ تابىلعان جاقسى جوبا كوپشىلىك سيپات الىپ, داستۇرگە اينالعالى باي باعدارلاماسىمەن قۋانتىپ كەلەدى. بيىل دا حالىقارالىق مۋزەي كۇنى قارساڭىندا الماتى قالاسى وڭىرلىك كوممۋنيكاتسيالار قىزمەتى الاڭىندا مەملەكەتتىك ورتالىق مۋزەي مەن «الماتى قالاسى مۋزەيلەر بىرلەستىگى» وكىلدەرى ارنايى ءباسپاسوز ءماسليحاتىن وتكىزدى.
قۇرامىنا 8 مۋزەي كىرەتىن «الماتى قالاسى مۋزەيلەر بىرلەستىگى» وزگەشە لەپپەن وتكىزەتىن يگى ءداستۇرىن جەتىلدىرە وتىرىپ, «تاريح. تۇلعا. مۋزەي» تاقىرىبىندا اۋقىمدى مادەني-كوڭىل كوتەرۋ شاراسىن ۇسىندى. «مۋزەيلەر الماتى قالاسىنىڭ رۋحاني جانە مادەني ءومىرىنىڭ اجىراماس بولىگى بولىپ تابىلادى. ءبىزدىڭ مۇراجايلارعا كەلۋشىلەر ارتەفاكتىلەرمەن تانىسىپ, ولاردىڭ تاريحى مەن الماتى قالاسىنىڭ تاريحى تۋرالى ءبىلىپ قانا قويماي, ءتۇرلى رۋحاني-تاريحي جانە مادەني ءىس-شارالارعا قاتىسىپ, وي-ورىستەرىن كەڭەيتەدى. وسىنداي اكتسيالاردىڭ ءبىرى «مۋزەي ءتۇنى» بولىپ تابىلادى»,– دەدى الماتى قالاسى مۋزەيلەر بىرلەستىگى ديرەكتورىنىڭ دامۋ جونىندەگى ورىنباسارى قايرات تارباەۆ.
الماتى مۋزەيىندە ء«تىرى مۋزەي» تەاترلاندىرىلعان قويىلىمى ۇيىمداستىرىلدى. رەترو ستيلدە ۇيىمداستىرىلعان شارا تاماشالاي كەلگەن مەيماندى بىردەن وتكەن كەزەڭنىڭ ساپار-ساياحاتىنا شاقىرادى. كەلگەندەردى قولا داۋىرىندەگى ايەل, قازاق باتىرلارى, سونداي-اق الاش كەزەڭىندەگى باسقا دا بەلگىلى تاريحي تۇلعالار قارسى الدى.
ءىس-شارا باعدارلاماسىندا س. مۇقانوۆ پەن ع.مۇسىرەپوۆتىڭ ادەبي-مەموريالدىق مۋزەي كەشەنىندە جادىگەرلەر جايلى اسەرلى اڭگىمە ايتىلىپ, قوس كلاسسيكتىڭ ءومىرى مەن شىعارماشىلىعى بويىنشا تانىمدىق سوزجۇمباق ويىنى ۇسىنىلدى. جازۋشىلاردىڭ ادەبي مۇراسىمەن جاقسى تانىس قالا تۇرعىندارى, ستۋدەنت جاستار ءبىلىمىن ورتاعا سالىپ, زەيىنى ەرەك بەلسەندى وقىرمان سىيلىق پەن كىتاپ يەلەنىپ جاتتى. كوپشىلىككە قالامگەردىڭ ستسەناريى بويىنشا تۇسىرىلگەن «امانگەلدى», «قىز جىبەك» كوركەم فيلمدەرى, جەكە ءومىرىن باياندايتىن «كلاسسيكتىڭ كەشىككەن ماحابباتى» اتتى دەرەكتى فيلم كورسەتىلدى. «جاڭا عاسىر» جاستار تەاترىنىڭ اكتەرلەرى ءسابيت پەن عابيت رولىندە وينادى.
ىقىلاس اتىنداعى حالىق مۋزىكالىق اسپاپتار مۋزەيىندە جانە مۋلتيمەديالى ءداستۇرلى مۋزىكا ورتالىعىندا ءداستۇرلى انشىلەر مۇرات ابۋعازى, نۇرجان جانپەيىسوۆ, رامازان ستامعازيەۆ, «Steppe Sons» مودەرن ەتنو-دجاز توبىنىڭ قاتىسۋىمەن كونتسەرت ءوتتى. مۋزەيدىڭ ەكسپوزيتسيالىق زالدارىندا كەلۋشىلەردى قورقىت, قۇرمانعازى, اقان سەرى, تاعى باسقا كەيىپكەرلەر قارسى الدى.
ا.بايتۇرسىن ۇلى مۋزەي ۇيىندەگى باستى شارا – «ۇلتتىڭ ۇلى ۇستازى» اتتى تۇلعانىڭ 150 جىلدىعىنا وراي دايىندالعان ۇجىمدىق جيناقتىڭ تۇساۋكەسەر ءراسىمىنىڭ جاسالىپ, سىيعا تارتىلۋى بولدى. تۇنگى مۋزەيدى تاماشالاپ كەلگەن مەكتەپ وقۋشىلارى ا.بايتۇرسىن ۇلى ولەڭدەرىن مۇدىرمەستەن جاتقا وقىپ, جينالعان جۇرتتى ءسۇيسىنتتى. د.قوناەۆ مۋزەيىندە, ن.تىلەنديەۆتىڭ مەموريالدى مۋزەيىندە دە تاقىرىپتىق ەكسكۋرسيالار, تانىمدىق اڭگىمە, ينتەللەكتۋالدى كۆەست-ويىندار ۇيىمداستىرىلدى.
«وسىدان تۋرا 18 جىل بۇرىن وتاندىق مۋزەي كەڭىستىگىندە العاش رەت ەرەكشە ءىرى وقيعا ورىن الدى – قازاقستان رەسپۋبليكاسىنىڭ مەملەكەتتىك ورتالىق مۋزەيى «حالىقارالىق مۋزەيلەر كۇنى» كاسىبي مەرەكەسىنە ارنالعان «مۋزەي ءتۇنى» الەۋمەتتىك ماڭىزى بار اكتسياسىن وتكىزدى», – دەدى ءوز كەزەگىندە مۋزەي ديرەكتورىنىڭ عىلىمي جۇمىستار جونىندەگى ورىنباسارى عاليا تەمىرتون. ورتالىق مۋزەيگە كەلۋشىلەر ءۇشىن ء«ححى عاسىردىڭ كوشباسشىلارى مەن تانىمال تۇلعالارى. بىرلەسكەن شىعارماشىلىق» كورمەسى رەسمي اشىلدى. مۇندا كاسىبي قىلقالام شەبەرلەرىنىڭ شىعارماشىلىعى تانىستىرىلدى. الۋان ءتۇرلى تاقىرىپتى قامتىعان مەرەكە باعدارلاماسىنا سايكەس كەلگەن قوناقتار مازمۇنى باي تارتىمدى كورمەلەردى تاماشالاۋمەن بولدى. مۋزەي قورىنان ۇسىنىلعان «ەر جىگىتتىڭ بەس قارۋى بويىندا» قارۋ-جاراق كورمەسىنىڭ اشىلۋى, قازاقستان سۋرەتشىلەر پلەنەرى قاتىسۋشىلارىنىڭ «ۇلتتىق مۇرا – ۇرپاققا امانات» جوباسى, سۋرەتشى-ديزاينەر ايدان ءابدۋبايتوۆانىڭ «زەرلەۋ» توپتاماسىنىڭ ەتنوكورسەتىلىمى – بيىلعى مەرەكەنىڭ باستى جاڭالىعى.
بۇل كۇنى مۇراجاي باعدارلاماسىندا ينتەراكتيۆتى ءبىلىم بەرۋ باعدارلامالارى, تەاترلاندىرىلعان ساباقتار جانە بالالارعا ارنالعان ەكسكۋرسيالار تۇرىندەگى كوپتەگەن اكتسيا بىرنەشە جوبانى قامتىدى. «ارحەولوگ ومىرىنەن ءبىر كۇن», ينستاللياتسيا-كۆەست, ء«ۇش تاقىرىپقا – ءۇش تاريح», ء«ۇش ءدىننىڭ ەرەكشە تاريحي مۇرالارى: تورا, بيبليا, قۇران» – مۋزەي ساباعى, «جەتى قازىنا», «قازاقتىڭ اشەكەي بۇيىمدارى», « ۇلى جىبەك جولى» – بالالار كوۆوركينگ ورتالىعىنداعى شىعارماشىلىق ساعاتتارى, «ۇشاتىن كەمە» قويىلىمى الماتىلىقتار مەن قالا قوناقتارىن ءبىر ساتكە زەرىكتىرە قويمادى.
جىل سايىن ونەر تۋىندىلارىن قىزىقتاپ كەلگەندەردىڭ قالىڭ شوعىرىن كەڭ زالدارىندا تولاسسىز قابىلدايتىن ءا.قاستەەۆ اتىنداعى مەملەكەتتىك ونەر مۋزەيى اۋقىمدى شاراسىن اۋلادا ۇيىمداستىرىلعان ساندىك-قولدانبالى بۇيىمدار جارمەڭكەسىمەن قارسى الدى. بەلگىلى سۋرەتشى گۇلمارال تاتىباەۆانىڭ «Great Qamzol» جانە «اڭىز» تاقىرىپتىق تۇجىرىمداماسىمەن ۇندەسەتىن ينستاللياتسيالارى بىردەن مەرەكەلىك كوڭىل كۇي سىيلادى. «مۋزەي ءتۇنى – 2023» جوباسى اياسىندا كيىز باسۋ ونەرى بويىنشا شەبەرلىك ساباعىنا تەگىن قاتىسۋعا الدىن الا 20 سەرتيفيكات ۇتىس ويىنى ويناتىلعان بولاتىن. سونداي-اق «Mediker» كومپانياسىمەن بىرلەسىپ, الەمدىك ونەر تۋىندىلارىنىڭ كەيىپكەرلەرى نەگىزىندە ەڭ جارقىن جانە ەرەكشە كوستيۋمگە بايقاۋ جاريالاندى. جەڭىمپازدار كومپانيا اتىنان باعالى سىيلىقتار ۇتىپ الدى. ەكىنتى ۋاقىتىنان باستاپ ءتۇن اۋعانشا مىڭداعان ادامدى قابىلداعان ءا.قاستەەۆ مۋزەيىندەگى «ەمدەۋ ونەر» كورمەسى, «100 جاۋھار» ەكسپوزيتسياسى جانە «قازاقستاننىڭ ساندىك-قولدانبالى ونەرى» تۇراقتى زالىندا تاقىرىپتىق ەكسكۋرسيالار, ورنەكتەپ كيىز باسۋ ونەرى, ءمۇسىن فيگۋرالارىن جاساۋ, سازبالشىقتان بۇيىم جاساۋ شەبەرلىك ساعاتتارى, «ينكليۋزيۆتى ەكوارت-مانيفەست» شەڭبەرىندەگى شەبەرلىك ساعاتى, ياعني پلاستيك پاكەتتەردەن تۋىندى جاساۋ, كوزدى بايلاپ, ەرمەكسازبەن مۇسىندەر جاساۋ, سەرگەي چەرۆياكوۆتىڭ پانتوميالىق تەاترى, الماتى ءۇندى كلاسسيكالىق بي جانە يوگا ورتالىعى, پيانيست ءلاززات المۇحامبەتوۆانىڭ ەرەكشە شىعارمالارى, اباي اتىنداعى ۇلتتىق وپەرا جانە بالەت تەاترى سوليستەرىنىڭ ونەرى كورەرمەندەردى تاڭىرقاتپاي قويمادى.
الماتى