ستالين مەن گيتلەردىڭ نە ايىرماشىلىعى بار؟ ەشقانداي, ماسەلە مۇرتتارىندا عانا… ءسىز وسىعان كەلەسىز بە؟ ءبىز سوعىستى قولداعان ەمەسپىز. ويتكەنى وندا ادامشىلىق, سەزىم جوق.
ەكىنشى دۇنيەجۇزىلىك سوعىس قانشاما مەملەكەتتى ەسەڭگىرەتكەنىمەن, سول داۋىردە جاڭا وركەنيەتتى ءتۇزدى. ەۋروپانىڭ قايتا تۇلەۋىنە جول اشىپ, ەزىلگەن حالىققا ەس جيعىزدى. سوعىستىڭ ميسسياسى دا سول, بىرەۋدى جانشۋ ەمەس, مايداننان كەيىنگى جاڭا ومىرگە بەتبۇرىس جاساۋ. ال وعان بارار جولدىڭ ەڭ وڭايى قولىڭىزعا قارۋ ۇستاعاندا عانا اشىلادى. ءيا, تىنىشتىقتى بىرەۋ ايقالاعاندا عانا سەزىنەسىز, قالعان ۋاقىتتا وعان مازمۇن بەرۋدىڭ قاجەتى جوقتاي…
كورشىمىز سوعىسىپ جاتقاننان كەيىن بە, تۇسىمىزگە بومبا كىرەتىن بولىپتى. ءارى الەمدە سوعىس جايلى فيلمدەرگە سۇرانىس ارتقان. قازىر وسى تاقىرىپ ءبۇتىن ادامزاتتىڭ ساناسىنا قونىستانىپ العانداي. بۇل جولى رەجيسسەر دەۆيد ەيەردىڭ «اشۋ» كينوكارتيناسى جايىندا ءسوز قاۋزاماقپىز. فيلمنەن العان اسەر ءبىزدى قايتادان مايدان ماسەلەسىنە ورالۋعا ماجبۇرلەدى. ارينە, كينو شىنايى ءومىردىڭ گولوگرامماسى سەكىلدى. ءبارىبىر جاساندىلىق ءھام كوركەمدىك كەڭىستىكتىڭ بوياۋى بولادى. دەگەنمەن دە يدەيالىق مازمۇنى اقىلعا جۇك بولارداي ەموتسيا مەن ءمان سىيلايدى. سونىسىمەن دە قۇندى.
1945 جىلدىڭ ءساۋىرى. ءۇشىنشى رەيح ىدىراپ جاتقان ۋاقىت. بىراق ناتسيستەر ءالى دە اش قاسقىرداي العا جىلجىپ كەلەدى. بۇلارعا بوگەت بولۋ ءۇشىن ءبىر توپ امەريكالىق جاۋىنگەر باتىل اسكەري وپەراتسيا جوسپارلايدى. مۇزداي قارۋلانعان مىڭداعان جاۋعا تانكىمەن قارسى تۇرماساڭىز, تالقانىڭىز شىعۋى مۇمكىن. سوندىقتان كۇش «وكىل اكە» دەگەن لاقاپ اتىمەن تانىمال, شايقاستا شىڭدالعان سەرجانت دون كولەرگە تۇسەدى. سەبەبى ول بۇرىن تالاي مايداننان امان شىققان شەرمان تانكىسىن (M4A3E8) باسقارادى. ونىڭ بەس ادامنان تۇراتىن ەكيپاجى بار. ايتكەنمەن العاشقى ۇرىستا ەكيپاج شىعىنعا ۇشىراپ, وقىستان پۋلەمەتشىنىڭ كومەكشىسى قايتىس بولادى.
سىرالعى ساربازدان ايىرىلعان سەرجانت كومانديردەن ونىڭ ورنىنا بىلىكتى جاۋىنگەر جىبەرۋدى سۇرايدى. ايتسە دە الاپات ۇرىستا ءتاۋىر سارباز تابۋ مۇمكىن ەمەس ەدى. ءسويتىپ, پولكوۆنيك بۇرىن شتابتا قىزمەت ەتكەن بالاۋىز نورمان ەلليسوندى جىبەرەدى. نورمان مايداندا ىسىلماعان ءارى جاۋمەن بەتپە-بەت كەلمەگەن اسكەري مامان. قولىنا قارۋ الىپ ادام ولتىرۋگە دە قاۋقارسىز ەدى.
سونىمەن برونەترانسپورتەر كولونناسىنىڭ قوزعالىسى كەزىندە نورمان تانكى ىشىندە پانتسەرفاۋستپەن قارۋلانعان گيتلەرلىك ءجاسوسپىرىمدى كورەدى. بىراق سويتە تۇرا وعان وق اتۋعا باتپايدى. مۇنى باقىلاپ تۇرعان مايدانداستارى ەكيپاج مۇشەسىنىڭ بۇل ارەكەتىن باسسىزدىققا بالايدى. ابىروي بولعاندا امەريكالىقتار جاۋ كولونناسىن شەگىندىرەدى. بازاعا ورالعاننان كەيىن دون كولەر جاس ساربازدىڭ جاعاسىنان الىپ, ناتسيستەردى اياۋعا بولمايتىنىن ەسكەرتەدى. «ەگەر سەن ولتىرمەسەڭ, سەنى عانا ەمەس, قارۋلاستارىڭنىڭ دا تاعدىرى قيىلادى», دەيدى اشۋعا بۋلىعىپ.
مايداندا كوماندير قايتىس بولعاننان كەيىن دون تانك روتاسىن باسقارادى. ونىڭ قولباسشىلىعىمەن تانكىشىلەر اتقىشتار ۆزۆودىنا كومەككە كەلىپ, نەمىستىڭ تانكىگە قارسى باتارەياسىن جويىپ جىبەرەدى. بۇل شايقاستا تا نورمان السىزدىك كورسەتەدى. جەكپە-جەكتەن كەيىن كوماندير ونىڭ قولىنا رەۆولۆەرىن ۇستاتىپ, تۇتقىنعا الىنعان نەمىس سولداتىن اتۋعا ماجبۇرلەيدى. نورمان تاعى دا باتىرعا ءتان مىنەز كورسەتپەيدى. وسىلايشا, كەلەسى شايقاستا ول سنارياد ءتيىپ, ازاپ شەككەن نەمىستەرگە جاناشىرلىق تانىتىپ, قينالماي ءولۋى ءۇشىن پۋلەمەتپەن اتادى.
كەسكىلەسكەن ۇرىستان كەيىن, كوپ ۇزاماي امەريكالىقتار گەرمانياعا تيەسىلى قالانى باسىپ الادى. شەرمان تانكىسىنىڭ مۇشەلەرى شاعىن شاھارعا ەركىن بويلاپ, كوپقاباتتى ءۇيدىڭ بىرىنە باسا-كوكتەپ كىرىپ كەلەدى. بولمەدە تىعىلىپ وتىرعان بويجەتكەن ەمما مەن اناسى شوشىپ كەتەدى. ولارعا امەريكالىقتار تيىسۋگە وقتالعاندا كوماندير اراشا بولادى. ال جاس پۋلەمەتشى مۋزىكاعا اۋەس نەمىس قىزىنا عاشىق بولىپ قالادى. ەكەۋى سوعىستان كەيىن كەزدەسۋگە سەرتتەسىپ تە ۇلگەرەدى. بىراق تانكيستەر كەتە سالىسىمەن, قالاعا ناتسيستەر وق جاۋدىرادى. سناريادتىڭ ءبىرى ەممانىڭ پاتەرىنە ءتۇسىپ, جاس ارۋ قازا بولادى. نورمان قۇتقارۋعا وقتالعانىمەن, ۇلگەرە المايدى.
رەيد كەزىندە تانكىشەلەر نەمىس تانكىسىنىڭ ەكيپاجى قۇرعان بۋكسيرگە تۇسەدى. دون مەن ونىڭ قارۋلاستارى ميناعا سوقتىعىسىپ, ناتيجەسىندە شاسسيگە ايتارلىقتاي زيان كەلەدى. بارلاۋعا جىبەرىلگەن نورمان جاۋدىڭ باتالونى جاقىن قالعانىن ايتىپ, تانكىنى تاستاپ قاشۋدى ۇسىنادى. بىراق ەرجۇرەك كوماندير جاۋمەن جالعىز الىسۋعا بەل بايلايدى. ءسويتىپ, ولار بىرلەسىپ قالىڭ باتالونعا قارسى تۇرادى. قانشا مىقتى قارۋلانعانىمەن ەكيپاج مۇشەلەرى بىرىنەن سوڭ ءبىرى ەرلىكپەن قازا تابادى. ەڭ سوڭىندا كوماندير نورماندى تانكىنىڭ استىنا جاسىرىپ, ءوزى گراناتا جارىلىسىنان كوز جۇمادى.
ەڭ قىزىعى, كينوكارتينا سوڭىندا نورماننىڭ ءوزى سەكىلدى اڭعال دا رومانتيك نەمىس ساربازى ونى بايقاپ قالادى. بىراق باتىرعا اينالعان پۋلەمەتشىنى ولىمگە قيماي, كورمەگەندەي ءوتىپ كەتەدى.
اتالعان فيلمدە گوللليۆۋد جۇلدىزى برەد پيتت باستاعان اكتەرلەردىڭ شەبەرلىگىنە تاڭعالماسقا بولمايدى. شىعارمانىڭ شىنايى شىعۋىنا ءھام كورەرمەندى ەرىكسىز سەندىرگەن كينو ارتىستەرىنىڭ ەڭبەگى كول-كوسىر.